¹ Polelo, pachifukwa chakuti tuli nu bubombi ubu, ngati mo tukapokelela ichisa,tutakunonokwa. ² Mumalo mwache, tukanite ivyakufisiwa ni nzila zya kukozya insoni. Tutakkwikala mu buchevu, sona tutakughakola akabibi amazwi gha Chala.Pakulangizya ubwanaloli, tukusimikizya mu nsibo zya munthu wensi pa maso gha Chala. ³ Loli nanthi amazwi ghitu ghakupikiliwe, bo ghakupikiliwe ku banthu bo basobela. ⁴ Muvifukwa vyabo, u chala wa chisu cha pansi abavwinkhite uku sita nu lwitiko mu nyinong'ono. Pa chifukwa ichi, bate nu lusako lwa kulinga ubwelu bwa mazwi ghabuchindamu bwa Kilisitu, yo chifwani cha Chala. ⁵ Pakuti tutakwipalazyila swebene, loli u Kilisitu Yeso ngati we Mwene, loli uswe ngati ba mbombo binu chifukwa cha Yeso. ⁶ U Chala weyo akanena ukuti, ''Ubwelu buzukufumyapo ichisi.'' Atulangizizye mu myoyo yitu, ukutupa ubwelu bwa kamanyilo ka buchindamu bwa Chala pa maso gha Yeso Kilisitu. ⁷ Loli tuli nu bukabi ubu muvibombelo vya lyongo, ukuti chibe chakwivwika mwakuti amaka amakulu ghabe mwa Chala mu mwitu awe. ⁸ Swe bakutamiwa mu nzila yonsi, loli te swe bakuchenisiwa. Tukuswighisiwa loli tutakulungana sona tutakwizula nu bogha bwa kuleka. ⁹ Swe bakuvwimiwa loli tutasuliwe; Swe bakuwa loli tutavulalite; ¹⁰ akabalilo konsi swe bakunyamula ukuzyungulila imibili yithu pamfwa ya Yeso, ukuti ubumi bwa Yeso bwize buvumbukwe mu mibili yitu. ¹¹ Pakuti uswe swe tuli nu bumi inthi tubike kumfwa akabalilo konsi pa chifukwa cha Yeso, ukuti sona ubumi bwa Yeso bubonekele mu mibili yitu iya bumi. ¹² Po ubufwe buli pa mbombo mwa uswe, loli ubumi buli pa mbombo mu mwako. ¹³ Loli tuli nu Muzimu uwakuyana mu lwitiko ukuyana na vivyo vikasimbiwa: '' nkhusubila, sona nkhunena.'' Sona tukusubila, sona po tukunena, ¹⁴ chifukwa tuzimenye ukuti yumo yo akamuzusya uMwene Yeso akuzutuzusya nuswe poka nu Yeso nukutubika poka numwe po ali. ¹⁵ Pakuti vyonsi vili mumwinu, ukuti ichisa cho chikufikila nkhani ku banthu abinji chingapangisya ukusalifya ukukulu mu buchindamu bwa Chala. ¹⁶ Chochobene tutakunyokela mwisinda.Napo ubunthu bwitu ubwa kunzi bukubola, loli ubunthu bwa mukasi bukuyaniwa ubupya isiku ni siku. ¹⁷ Po pakabalilo aka, ubwelu buli pakutunozyela bwa kuyeziwa ubwa bwilebwile mu buchindamu ukuti manye bufumyeko ukuyeziwa konsi. ¹⁸ Pakuti tutakulingisya ivinthu vyo vikuboneka, loli ivinthu vyo vitakuboneka. Ivinthu vyo vikuboneka vya kabalilo ka kuchepa, loli ivnthu vyo vitakuboneka vya kusita kumala.