20 Otdi itcali-ŕg-otdi itbepjee cajuiberipŕntee, otdi DAvid-at oyat pri jashotdawaot jainatdig-ot jatbŕg-li itberg-jeeri Levita-olat: doscientos veinte itŕmnogjet ot catcaág-li catamjet. 21 Oosrmdi amat jajipín itŕm mayeshanwaiyu prnpóm o prnpatpri monolprnye Ahava-ja biuyig-jee jaubata bijŕi Dios, jabijeojee itŕm dŕg ishalalig óo birat, bipinit ishrmmog-ot oyat wrijin itbijeo-ot. 22 Aúyíg ja-ŕmdig iyíg icuyo shotdawaotjet o shotdawaot caballojaá ibóg-ot bijaicajeojee bibalot ubata dŕg-uu, jabipín-rcatdi iyíg icuyo: jalap bijŕi Dios óo jaala jalí dut jajewerat ijei,oo prnat jawairiyu oyat janrmyu otjaala jalí wrijin jŕt jajaitemdi-rt. 23 Ooshrmda biyeshanwayí oyat jabijeo bijŕi Dios jashŕm naa oyat pri jabi-ŕm. 24 Ooshrmda amat jaóg doce itog-ot mot catee jainotdig-ot Sacerdoteot: Serebías, Hasabías oyat diez catog-li capetwat. 25 Abig-ashagli olat palatá, oro oyat pri ebushag-ot oyat ofrendaot jaotyawana bijŕi Dios iyíg icuyushrt, otpri ebupín-rt oyat jainotdig-ot shotdawaot oyat wrijin Israelat iipínbrg-li ishanpajijet. 26 Ojeri abíg-ashag-lig malap-uu seiscientos cincuenta jamŕmyu palatá, cien jamŕmyuot palatá cón-ot, cien jamŕmyu oro. 27 Veinte tazashuwaiot mirig-ot mil jamŕmyuot oyat caculi bujuot bronce-con-ot jaibŕlot ijeijet, mirig-ot oje oroni. 28 Ooshrmda amog: yam ebuyabeŕg Biŕyat oyat pri nat ebushag-ot. oyat naa palatá oyat oro pri ofrendaotda-ot ityabŕg-ot yajiteat biŕyat, cajŕi Dios yalom-otjin. 29 jaíyajeo oyat jayauwáu onyau yamat jajŕiwŕm-rca caubata jainotdig-ot sacerdoteot, Levitaot, oyat pri cajŕijuyag-ot cajŕ-ot calomjin-ot Israel-ta Jerusalén-na ebuiruliprn-otye jaotteja Dios. 30 Sacerdoteolat oyat pri Levitaot jatwau-ŕg-li palatá oyat pri oro jaŕiwŕnprn-ot oyat pri ebushag-ot catca-ŕnogjee Jerusalén-na, jaotteja bijŕi Dios. 31 Biyŕg-li monolipŕn-ye Ahavaja oolouli doce jatolouli wryu jatrmdouli jrbŕt binogjeeli Jerusalén-na. Jalap bijŕi Dios jalig-li bijaá;óoli bijaijewe jalapjet bibalotshrt oyat pri nat jajewetdi bitcaliŕg-lig itŕm moteishauŕyu tee dŕg-uu. 32 Ooshrmdi birug Jerusalén-na oyat omid birí pŕi wryu irigjet. 33 Ooshrmdi jacaunolouli wryu palatá, oro, oyat ebushag-ot cajŕicawínrg-li bijŕi Dios ottee Meremot dap-uu, Urías wa Sacerdote. Natdi irig-ot jajet Eleazar, finees wa, Jozabad, Jesús wa, oyat Noadías, Binúi Levita wa. 34 Jamrmyu oyat cajriwrnyu jajricanag-li obatdi. 35 Uprlotdi catcawáwali, epin-ot inogprn-ot cayanshrt, ofrendaot iyŕgprn-otdu itcabrg-ot Israel jri Diot: doce catog-li vacatŕiot wrijin Israelat ibŕg-ot, noventa y seis catog-li carneroot, setenta y siete catog-li corderoot oyat doce catog-li mot cabraat oje ofrendani iep itmínrgshrm. Wrijindi ofrenda iyrprn Biŕyat. 36 Ooshrmda olat jatbrg-li ebuicuyuot iyíg icuyuat iyinog jainotdig-olat iyíg icuyupinit oyat pri ishaog-olat epin-otjryat jŕnyau rtshrt oyat olat ijeimín-gli epin-olat oyat pri joat jaá Dios.