¹ Dumat japrnat naa, ebujacuyuteeri Artajerjes-at, iyíg icuyu persia-a Esdras jóndi Babilonia-at. Jalop-otjindi Esdras natdi Seraías, Azarías, Hilcías. ² Salum, sadoc, Ahitob. ³ Amarías, Azarías, Meraiot, ⁴ Zerahías Uzi,Buqui. ⁵ Abisúa, Finees, Eleazar, ooli jawá Aarón Sacerdote jainotdig. ⁶ Esdras jóndi Babilonia-at oyat óoli itŕm ebunam

ijui-rŕmdi Moisés-at icuibat Biŕyat, Israel jŕi Dios, itbŕirig ebushagjalig-u it-ŕmdi jalap biŕi jalíg-li jajet.

⁷ Itŕmnog-ot jajŕinog-ot Israel oyat pri sacerdoteot, Levitaot, iáuot cajuibeŕntee, cayeshijéwet oyat pri itcali-ŕgprn-otdi ibebetta cajuiberipŕntee caprijóndi Jerusalén-na siete wig jatogbatdi itcuyu iyíg icuyuat Artajerjes. ⁸ óo jamínyug-li Jerusalén-na japtŕm jatolouli jrbŕt oo wígteewi. ⁹ óo jayrg-li Babilonia-at jatŕmbatdi wryu jalug-lig oo jrbŕt jalígbat obatdi jamínyu

Jerusalén-na, ijei jalap Dios jajetdiwi jali.

¹⁰ Esdras-at jali-rgli jajiteat jajuirig, jatdi-ŕglig mobepshrm oyat itjui-ŕglig itcuyuot jŕinag prn-ot jaá oyat pri itcuyuot brjalig-u itcuirig Biŕyat. ¹¹ Ooli naa iicuyu iyíg icuyuat Artajerjes-at ibŕg-li Sacerdote Esdras-at oyat jrinagprn-ot itcuyuot oyat pri ebiuicuyuot jrinágprn-ot biŕi pinit Israel-lat: ¹² Artajerjes iyíg icuyu bŕt icuyutjaá, Sacerdote

Esdras-at, itŕm ebujrinam jayerog Bijŕi Dios

shrnr-at win.

¹³ Amda icuyu bŕnijalig-u Israelat win jatee naa ayam, tŕm-u Sacerdoteotjet oyat Levitaot, inogshug-ot Jerusalén-na, jatcrt-ŕg canog-lig ajet. ¹⁴ Am, iyíg icuyu, oyat siete itog-ot apínit mopín-rt bicacoujet, catbicuinobrgyan wrijin yamát jatjeojee Judá jaá oyat Jerusalén pŕi oje brjalig-u itcuirig Dios-at brjalig-u jayajuirig. ¹⁵ Oyat jayashi-ŕyug Jerusalén-na, jaot, palatá oyat pri oro olat ibŕgprndi ofrendani ishapajíjet Israel jŕi Dios-at. ¹⁶ Jayaubŕg ishanpajijet wrijin palatá oyat pŕi oro wrijin Babilonia-at ibŕgprn itŕm-u ishanpajijet itbŕgprn

epin-olat oyat pŕi Sacerdoteolat moat Dios pin Jerusalén-na.

¹⁷ Oosrm jamiyaubŕg wrijin iyajeo buey-ot, carnero-ot, cordero-ot, trigo-ot oyat ofrenda-ot mŕipog-ot. Jayaubŕg ijei yabŕliprn-u jŕr iricat jaottje yaŕi Dios Jerusalén-na. ¹⁸ Jayaumín-rg isholigjet palatájet oyat pŕi orojet brnijalig-u inojeijeibŕgman oyat ojepŕi mapetwalat, jajíyajai-rgjee yajŕi Dios. ¹⁹ Cayauli-ŕg ebushag-ot ityabŕgprn-ot ishanpajijet jaubata óo jet-iibepa jaotteja majŕi Dios

Jerusalén-na.

²⁰ Brigigjalig-uwi bŕishii ebushag iyajeo jaolat yajŕi Dios iyapatjeibŕgshug, jamíyau-óg apalatá-awaulipŕnat. ²¹ Am, iyíg icuyu Artajerjes, jaiapín itŕm icuyu wrijin jawawalat palatá jŕnshirig-yau Ŕt-shrt, bririgjalig-uwi Esdras-at iŕm jashŕt, jayaubŕgya juiduligjetjan. ²² Onyau cien jamŕmyu jajŕiwrnyu jalica palatá, cien jamŕmyuot trigo, cien jamŕmyuot japóg vino, cien jamŕmyuot japóg iyg, oyat pri sayuot itshanyái-ot. ²³ Bririgjalig-u iyug itcuyutee Dios wryu ŕyat, jayamín-rg ŕg-ibrgjet jaot pina. Ooshrm,¿Brirígshrm jamashiŕ manŕmyu ayan jaá oyat pri atŕiot jaá?. ²⁴ Bit-utyawi cashipín-rt ot yashŕm yam jatcuishrtya jamiyabŕg-lig itŕm ebujaimiíbryu itŕm cugjín Sacerdoteot jaá, Levitaot jaá, itoca-ŕtjaá, moyeshijewet jaá, ŕipri epín-otjaá itcalug-ŕgprnot itbepjee cajuiberiprntee oyat pri ibepet jaottee naa Dios. ²⁵ Esdras, mobicacouyujet Dios-at ibŕgjan, catammashicagya cashiri-rt epin-ot jajeira o jaep imog-ot oyat pri mot ebupishiwajat itbebrgjee wrijin epin-olat jŕnijalig-ual japishiwaja itcurig majŕri Dioat. Otda itmashijui-ŕg-ot dut japishíshanwajit itcurig. ²⁶ Jayauli-rg ebupajacŕtdig brniatjalig-uwi naa jashanmin-ryat wrijin itcuyu Dioat, o otcuyupŕi iyíg icuyu, mo-ŕyushrmjalig-u, mot-inamyushrm,

cat-iwau-ryu irig-ot jalica, o presojacat-iŕyu.

²⁷ Esdras mog: yajicujai Biŕijet, cajŕi Dios bilom-otjin, jali-ŕrmdi naa jajítee iyíg icuyu cajijáijee jaottee Biŕi Jerusalen-u. ²⁸ Oyat bŕr jajai-yírrm naa ibimín-rg tai iríg ajet jaubatta iyíg icuyu, otpŕi ebupín-rt oyat wrijin iwairig-ot icuyut.Am awairiyujabrg-la Biŕyat jalap jabŕgshrm an ajŕi Dios oyat cajúiabé-rg ca-ŕiot Israel-u canog-jee ajet.