¹ Obat nat ebushag-ot cabegbatdi, shotdawaot jainotdig-ot caicanaŕg-li alica oyat camog-li: Epin-ot Israelat wín-ot, sacerdoteot oyat pri Levitaot caicashansheoli epin-otshrt brt nitiotshrt oyat pri i,tcashanjewit: cananeos, hititas, ferezeos, jebuseos, amonitas, moabitas, egipcios oyat pri amorreoot. ² Ooshrmdi olat catep-óg itrmnog-ot calowot oyat pri cawaot oyat otjetdi cajŕiwau

epin-ot ijeinog-ot brt epin-otjet bŕiniti jaá win-ot. Oyat pri shotdawaot jainotdig-ot oyat cajŕiot otdi irigjuwrg-ot ebuteishau-ryutee.

³ Jajuibatdi naa, jajoulagyrg ajuiot oyat pri ayuiot-ipat oyat ajú jariayrlag-li ajuyagshrt oyat pri

awrg-otshulot, oyat ateg-li, atep-epdi wrijin.

⁴ Wrijin cajaipañatdi jaubata jayerug-ot Israel jŕi Dios jashrmdi naa moteishau-ryú cajŕibeg-li tŕm-u ajet ategbatdi aúyig-lig onyau jabigye minoca ijei

cabŕg-lig mirig icubat-u.

⁵ Obat jatbrgbat ofrenda cup, ajuimig naa alig-lig aúyiyu ayuilotjaa oyat pri ayuiot ipalot it-ashegprnot, oyat ashog autjiyagjet oyat alabot awryrg aŕyat ajŕi Dios. ⁶ Amog: Ajŕi Dios, aúyig-la am oyat amitep-ŕi ajeuyrg-lig malica, ooshrm itmínrg-ot iebot jainojeiyiyucat bijuyagjaa, oyat itbishanmín-ŕiot camín onyau wryotteja. ⁷ Obatdi cawryubat birom-ot dumatpatjei oira bipatjeirí iyíg iep-imínrliprntee. Ishanjeyit itbimínrg-ot, bitú, bijŕiwairig-ot, oyat bisacerdoteot bibibŕgli calap-uye nat icuyut iyinog-ot naa wryutee, catumat, catcawauliprn-ot, oyat pri ebuishegliprn oyat bijeuyuot uyíg-ot, oje birijani shiruu. ⁸ Ooshrmdi, dumat itrm ipom wryu tee, moubittjaluyu Biŕyat bijŕi Dios jayug-li jatdirbŕgjee ibag-ot

iyŕijug-otdi oyat jatbrgjee itrm jajaluliprn ijei jaliliprn ijei. Oola naa bijŕi Dioat jaiwaujee bibig-ot oyat jatbrgjee iyaijet jijacaliyu catcawauyujet.

⁹ Ooshrm itcawaurgprn-otdabitú, ooshrm bijŕi Dioat bijashantepdiŕt ooshrm jajanojeiyírg tái jaliyu bijaá. óat jamínrg naa jatdugjee iyíg icuyuat Persia at jashrm jatbrgjee jujut mowairiyuot, jabicrt-ŕgjeeya jabimínrg-lig jaot bijŕi Dios oyat jabiwryrgjee

iepprn-ot. óat jamínrg naa jatbrgjee itŕm ebushiwayu tái imog Judája oyat Jerusalén-na pri.

¹⁰ Ooshrm dumat, bijŕi Dios, ¿brjé jabbicrtŕg-lig

bimog-lig oyem jashrm naa? Bit-út cajaibitepdiŕg-la ebujacuyuot.

¹¹ Ebuicuyuot itmabŕg-otdi ibebrlatman mayerugshipinirat mamogbatdi: Naa niti jaá jalug jaa jalica itŕmnitira óo ishanjeyi. Jajuitun iepjet epín-otjet irig-ot nitiotjaa cajuyu yíishandujijet. Otdi jajuitúnrt jaúyecani mojuyu ishanjeyijet. ¹² Ooshrmda, dumat, ŕira yalowot yabŕg-lig cawaolat-ot; ŕira calowot yaóg-lig yawaolat, oyat ŕira yayŕg-liglig jabigŕiriyushrm oyat jajeyu japrnshipatya, yam yawairigjeeya oyat jayawogjeeya ijei nitijaat, caligjeeya yatriot caliglig oiricawiat. ¹³ Ŕi japrnat wrijin iyug-li bijaa itbimínrg-otshrmdi iebot oyat jashrm iyíg ieb imimínrg, ooshrm mam, bijŕi Dios, jamawauŕg bishrt iep ibijŕi Dios, jamawauŕg bishrt iep ibimínrg oyat bitmaliŕg oje iyaishrmbr iyug-otni. ¹⁴ ¿Jabishanmínrtshii jujujet ebumacuyuot oyat jabishimínrg moujut ioyu brnijetjalig-uwi otnat epin-otjet juyuebotjet? ¿Jashanŕmtewrn oyat bitjashanbérttewrn onyau bŕishiirutta irig, on pri yaubriutta icut?. ¹⁵ Ajŕi, Israel jŕi Dios, ijeira mam, ooshrmda biyŕiri oje iyáiotni iyug-otni onyau naa wryu.¡Jamaulug! Namda birí maubata jashrm iep ibimínrg, ooshrm brirutda jacrtŕrm jaliglig maubata jashrm óo naa.