¹ Dumat itŕmnog-ot judá balot oyat Benjamín pŕi jatjuiri epin-olat ja-ŕnotprn-olatdi jajuca iyaujet jayanshrt dumatda jatmín-r itŕm cajuiberiprn Biŕyat, Israel jŕi Dios. ² Ooshrmdi cajaicana-ŕgl Zorobabel shrt oyat pri ca-ŕiot cajŕ-ot calom-ojin. Ojeri camo: Bityauli-rg ebubibepdig yajet, ooshrm, tŕmjaniwi yamni, oola ibijeo yajŕi Dios oyat ebubi-ŕirbrgjan jet ijei bibrcajan obat wryubatdiwi obat Esar Hadón, Siria jŕiwairig, ooli bi-ŕyuum naa moliliprn-u. ³ Oprnat Zorobabel, Jesúa oyat caŕiot caolot calomjin-ot camg-li: yamshanditte, bit-utbŕ, jashimín-rt jaot Bijŕi Dios, bit-utdawi jashimín-rt jaot Bijŕi Dios, bit-utdawi jashimín-rt Biŕyat Isarel jŕi Dios, ojewi Ciro ebujŕiwairig icuirouni Persiaat. ⁴ Ojeri epin-ot irig-ot niti jaá jatdi-ŕgli jawairiyu ŕirig calabot Judáatwin-ot; otdi jalí-rt Judáat win-ot caomdig jatmín-rglig. ⁵ otdiwi pri camíbrt ebupin-rt jatmín-rgshrt itjeo jatmín-rg-lig. Obatdi jatmín-r naa Ciro wryuótbatdi oyat pri Daríoat icuibatdi, Persia jŕiwairig, ⁶ Ooshrmdi jajuiwrgbat itcuirig Asueroat otdi janat itŕm jaepjee itŕm epin jatshanmín-rtshrm ishalaligjet caubatta epin-ot Judadat wín-ot oyat Jerusalén-nat pri. ⁷ Obatdi Artajerjes wryuotbat Bislam-di, Mitrídates, Tabeel pri oyat pri cajŕ-ot ebucanabrg-li Artajerjes-at. Moyerog jŕinagprn itmín-rgli jajŕicawu-ŕgli Arameo yerogjet. ⁸ Rehum cajŕijuyag oyat simsai ebujŕinam canabrg-li dumani Artajerjes-at Jerusalén-jaá. ⁹ Ooshrmdi Rehum, simsai oyat pri cajŕot, otdi imog-ot jajei ojaep imog-ot, oyat bŕt shotdawaot jainotdig-ot Erec-cat icuyotee, Babilonia oyat pri Susa Elam-u, otdi jajŕinat itŕm moyerog jŕnagjet. ¹⁰ Oyat cajuibeg epin-ot jajet iyíg oyat jainotdigejet Asnapar catjacuiri eberigjet caligjee Samaria-a, cajet brtjet irig-otdi niti pei jáa jŕnyau rtshrt. ¹¹ Naala bŕi itŕm jrunág jrinágprnat itbŕnocatdi Artajerjes-at: Ibebŕtjan, mot rtyabalat iríg-ot, janag naa: ¹² Japishijawagjee iyíg icuyuat Judíos-ot iyrg-otdi mashrt cajuimig biubatta Jerusalén-na jatmín-rgjee itŕm moyanshuwai moyerogshanjuyi. Otda

cajuiduli-ŕt jaiwáyuot oyat catcpŕijeicon cajŕiteyuot.

¹³ Dumat japishijawagjee iyig icuyuat naa moyanshuwai jatmín-rglicat oyat jajaíwayuot cajuiduliglig, olat bŕishanbrtya itŕmcugjin itŕg ieji-ot jainotdig-ot caliyuot pŕicugjim catcashitep-epŕgya iyinog-ot icuyut. ¹⁴ Jrjetdawi bishŕm jabiwog-li shayu mo iyig ebujŕiwairig diripŕntee, jashanjeibrt birat jabirug-lig itŕmcugjin ja-ŕg-ishanbryu iribrg iyíg icuyuat. Ooshrmdawi naa jabipín-r iyíg icuyu. ¹⁵ Jatjeojee jajŕinag-u jaí oyat jatshirugya naa moyanshuwai moyerogshanjuyi iep mín-ŕrm moyan jŕiwairg-olat oyat irig-olat niti péiot jaá. Ibag-la itmín-rg iep ebujŕiwairig-olat oyat pri niti peiot jaá irig-olat. Omdi jali itŕm moyerog-ishanjuiriprn bŕndiyawat.Ooshrmdi naa mobigshayu moyanshuwai jabeg-li. ¹⁶ Ooshrmda jabipin-rg iyig icuyu ojalig-u naa moyanshuwai oyat jaiwáyuot catcamín-rg-uli, ooshrmda bŕishiirutya ishirig mamat jŕnshirigyau niti peishrt rtshrt. ¹⁷ Ooshrmdi iyíg icuyu jatbrnog itŕm jayerog itnagprn uprtyu Rehum-mat oyat simsai-yat oyat pri jajŕolat Samaria-ja oyat simsai-yat oyat pri jajŕolat samaria-ja oyat wrijin irig-olat jŕn shirigyau rt shrt: Mobig-ŕiriyu bipínda óo. ¹⁸ Moyerog jŕinagprn iyabryubŕg-li an jŕiwugprnat oyat jatdebrcat an. ¹⁹ Ooshrmdi, amda cacuyu jatjeojee oyat jatdúg-li jŕt wryuot bŕnjin-ot olat moyerogshanjuiri oyat cajuimig-li ebujŕiwairig-ot ubata. ²⁰ Iwairig-ot ebujŕiwairig-ot itcuiri Jerusalén-jáa oyat jalig-li cawairiyu jŕn shirigyau rt jaá. Camicabrg-li ijei-ot jainotdig-ot itcabrg-otdi oyat pri caliyuot

jam-u.

²¹ Dumat, catyaucui catcawau-rgjee nat mot oyat jatmín-rgshrt naa moyanshuwai onyau amat jamica cat-acuirig. ²² Yayaujeirug oje yaligshrt itnamprn-otni jashrm naa ¿Bŕirigshrm jabishiri-ŕ naa mobigcamayo oyat ooshrm jashipatjeirig jainó-ryu nat itcajeoótshrm ŕjetwin-ot?. ²³ Obat ebujacuyu iyíg ebujŕiwairicat Artajerjes Rehum-matda jatdebŕg-li, Simsai oyat jajŕolat pri, otdi inog-ot wocaibrni Jerusalén-na oyat catcacuiri jijogjet Judío-ot jatsholi-rgjee mobep. ²⁴ Ojeri mobep jaot Bijŕi Diot Jerusalen-na jatsholi-ŕgli ondiyau jacawa wig itcuirig Daríoat, iyí´g icuyu Persiaja.