CAPITULO 3
1
Siete jrbŕt prnat Israel-couot cauprtdi cayanshuwaiotta, cajuibegbat tŕm-u oje itŕm boni Jerusalén-na.
2
Jesúa, Josadac wá oyat pŕi japetwat Sacerdoteot oyat pŕi Zorobabel, Salatiel wá oyat pri japetwat cajuimig oyat jatmín-rgli ijeicabŕliprn Israel jŕiDioat jatbŕgjee ofrendaot iyŕgprn-ot oje jamojani Moisés-at icuirig, bon Dios pin.
3
Ooshrmda olat jali-ŕg ijei cali-ŕliprn jajŕiteyuotjaá, ooshrm cajáala jaliri moómyu cashrm epin-ot irig-ot niti jaá. Otdi jabŕt ofrendaot iyŕgrn-ot Biŕyat iwryugbat oyat pri ibŕwojocat-u.
4
Olat capŕiyíjeoli cajíjayu caolottee oje jajŕinalouni oyat jatbŕg-li ofrendaot iyŕgprn-ot wryushitojani cawryutee.
5
Ojeriwi jatbrg-lig caofrendaot iyŕgprn-ot wryushitojani oyat pri jrbrlotjet oyat ofrendaot wrijin cabigye minog-bat cajíjaibat Biŕipinit, tŕm-u cajet ofrendaot cajiteat itbŕg-li.
6
Otdiwi jajuiwrt jatbrg-lig ofrendaot iyŕgprn-ot Biŕyat jatŕmdouli wryu siete jrbŕt jaliyutee, jatshanjumín-rtshicomdi jajée jajŕiteyu.
7
Ojeri jatbrg-lig iáuolat palatá oyat pri ebuishijirat; oyat mowog pri, iiwog pri oyat jet-ebuiship-ŕg Sidón couolat oyat tiro couolat pri, pulot cedrocon-ot cabŕyugjee líbanoat jopeja rtshuwai-uye, ojeriwi Ciroat cacuirig, persiaa jŕiwairig.
8
Ooshrm jacauyu jrbŕt jacauyu wigtee caliyugquetyemdi Biŕi otteja Jerusalén-na, Zorobabel, Jesúa, Josadac wá, otpŕi capet Sacerdoteot, levitaot oyat jŕt iyug-otdi catcawauyutee caupŕtdig Jerusalén-na, jajuicawrg-li itbepdig. Otdi jabŕt levitaolat Veinte wig iriinog-olat. Oyat quepaolatdi jatbŕ jatcajeojee mobep irig Biŕi ottee.
9
Jesúa-li caliŕrm jatŕiot oyat japetwatdi pŕi, cadmiel oyat jatŕiotdi oyat Judá jŕinog-ot pri caicajeojee epin-ot jamínrt mobep Dios otteja.
tŕm-uli calícajet Henadad jŕinog-ot, jajŕinog-ot oyat pri jajŕot Levitaot.
10
Ibebet jatmín-rgli jajŕiteyu cajuiberiprn Biŕyat. Ooli naa jaliŕrm cajuimig-lig Sacerdoteot, wrijin cayuiolotjet oyat catrompetaotjet oyat pŕi Levitaot, Asaf wáot, ijei cabŕgjee Biŕyat jet ebunotcalirg-ot, oje jalapni David, Israel jŕiwairigcat icuirig-li.
11
Otdi iauot mojíjayujet oyat pri ijei ibŕyujet Biŕyat,
¡Ijeira óo! Itmín-rg, tái imog Israelat, oirigwi jalig-lig. Wrijim epin-olat jaŕm mowŕ-ayushuwaijet mojíjayujet ijeicabrg-lig Biŕyat ooshrmdi
catcamín-rgshrm jajée jajŕiteyuot cajuiberiprn.
12
Cabag-li Sacerdoteot, Levitaot, ca-ŕiot caíjit caolottee oyat ijúi-rt Diosyerogshipinit jalugjuetdi mo itmín-rgjuŕg, catmín-rgbat jateyuot naa mo catcatg-li itdug-jet, ot caquic-li ishrg-jet. Oprnat cabag cajíjeyujet iwŕ-ag-ot cajíjayujet pri oyat itŕm monot mojíjayu.
13
Ojeriwi epin-olat jatshancrtdi janotpishicawag-li ebunolot mojíjeyoot oyat mojíjayuot canot caquíyo epin-ot, ooshrm
epin-olat jaŕmdi mojíjeyujet oyat janot-ijuiri iyaujet.