¹ Ja̧u̧nu̧ o'comenä Tu̧ru̧hua̧ Diosmä pä'äji ta'anö Jonásrö ucuocuinödo: ² Täi, pä'inödo Nínive ötahuiyära̧'a̧, ötahuiyä rö̧ȩnä̧ jo̧mȩ. Juhua'attö jicuhuähuaja ttö chi̧huȩnȩ huedä̧cuȩmä̧. ³ Ja̧'hua̧ ja̧'a̧ 'chi̧nö̧do Jonásmä Nínive ötahuiyära̧'a̧ Tu̧ru̧hua̧ Dios hueäji ta̧'a̧nö̧. Nínive ötahuiyämä rö̧ȩnä̧ ji̧no̧mȩdo. Níneve ötahuiyä öotomä huäbodäcuä mo̧ro̧ 'cha̧cuä̧huo̧mȩ ji̧na̧'a̧do. Jonás Nínive ötahuiyära̧'a̧ rȩbȩu̧ ya'ute mo̧ro̧ 'chä̧cuä̧huo̧mȩ jubö cue'ächinödo ötahuiyänä. Juhuorö ji'ähuinödo: ⁴ Jonás Nínive ötahuiyära̧'a̧ rȩbȩu̧ ya'ute mo̧ro̧ 'chä̧cuä̧huo̧mȩ jubö cue'ächinödo ötahuiyänä. Juhuorö ji'ähuinödo: ¡Pi̧yȩ Nínive ötahuiyämä, ttö̧ja̧ ta̧ju̧ mo̧ro̧ o'come toei'ä̧cuȩ! ⁵ Ja'huanö jiähuä̧u̧ Nínive ötahuiyä ttö̧ja̧mä̧ esenätödo Tö̧ä̧nä̧hua̧ Diosrö. Ja̧u̧ huȩnȩ ä̧ju̧cu̧ ttu̧cuȩ a̧do̧chä̧cuä̧huä̧ jȩta̧ja̧ pä'ähuinätödo. Ja̧'hua̧ta̧nö̧ o'ca toi'önä ruhuotö'inä usurä isotö'inä ̧ imi̧cu̧nä̧ jö̧ idicu o̧ta̧ 'ca̧tä̧hui̧nä̧tö̧do, “Ujutumä suronä jȩpä̧tö̧jä̧” pä'ö i̧jȩcuä̧ päi'önä jȩtta̧ pä'ö. ⁶ Ötahuiyä ru̧hua̧ ja̧u̧ huȩnȩ ä̧ju̧cuo̧mȩnä̧ i̧dȩä̧cä̧ttö̧ ä̧rä̧mi̧'ö̧, ö̧'ca̧tä̧huä̧ta̧ pärocuä̧ta̧ idicuä̧ta̧ ȩmo̧po̧'ö̧ 'ca̧tä̧hui̧nö̧do “ö'inä suronä jȩpö̧sä̧” pä'ö i̧jȩcuä̧ päi'önä jȩa̧ pä'ö. Ja̧u̧nu̧ o'comenä pä̧mä̧di̧nö̧do ocurä i̧sa̧ppȩ huä̧mȩ. ⁷ Nínive ötahuiyä ru̧hua̧cu̧, chucu aditätö'inä tti̧huȩnȩ hue'inätödo ötahuiyä ttö̧ja̧rö̧. Pä'inätödo: Ttö̧ja̧'i̧nä̧, pä̧cä̧yö̧'i̧nä̧, äjicuäcuähuotö'inä, ttujuabiyä ku̧nä̧rä̧tö̧'i̧nä̧, yorö'iso cucuätucuoca'a ka̧cuä̧tu̧ cui̧ pä'ö. Ttu̧cuȩ ttucu juiya pä'ö'inä, ajiya ttau juiya pä'ö'inä hue'inätödo. ⁸ O'ca toi'önä ttö̧ja̧'i̧nä̧, isotö'inä idicuo̧ta̧ 'ca̧tä̧u̧ pä̧i̧cu̧nä̧ cucuocuätucu'a̧nö̧ ja̧'a̧ Tö̧ä̧nä̧hua̧ Diosrö. O'ca toi'önä pärocuätä pärou cuicuätucu'anö ja̧'a̧ suronä jȩcu̧'ä̧tu̧cu̧mä̧ pä'inätödo. ⁹ ¿Di jä̧ttö̧ huo̧jua̧mä̧ Tö̧ä̧nä̧hua̧ Dios jȩä̧cuȩmä̧? Ja̧'hua̧nö̧ jȩto̧mȩnä̧mä̧, ¿Tö̧ä̧nä̧hua̧ Diosmä pärocuätä amöcuädö'a̧nö̧ ja̧'a̧cö̧ ujuturu ö̧ra̧huä̧rö̧ juiyatö pä'ö? Iso päi'önä Tö̧ä̧nä̧hua̧ Dios ja̧'hua̧nö̧ amöcuädöttötä toei'ocotöjä ujutumä, pä'inätödo. ¹⁰ Ja'huanö suronä jȩttö̧ jarotti'a'a toomenä Tö̧ä̧nä̧hua̧ Diosmä pärocuätä amöcuädinödo jahuätörö. Jahuätörö be'epäjipö icua päjimä pärocuätä amöcuädinödo. Be'epäjipö icuocö pinödo jahuätörömä.