Ja̧'hua̧nö̧ rö̧ȩnä̧ cu̧ra̧huä̧ro̧mȩnä̧mä̧ ¿adihua'a tä̧ji̧?
5 Ja̧'hua̧nö̧ päcu Jonás rä'opächinödo ötahuiyättö. Kä̧hua̧ räopa'acu pä̧mä̧di̧nö̧do ötahuiyättö rä'opächömä. Ju̧huȩnȩ Ä̧'ä̧huä̧bä̧ jue'epo'ö pä̧mä̧di̧nö̧do ja̧huä̧bä̧ dea'a tti jo̧mȩ. Ja'huanö pä̧mä̧dö̧ to̧pä̧ri̧nö̧do tta̧'a̧nö̧ 'cuäopaja pä'ö ötahuiyä. 6 Ja'huanö ja̧ 'a̧ Tu̧ru̧hua̧ Dios hue'inödo Jonás ö̧'o̧mȩ huäme bahua pä'ö a̧jä̧ta̧ tti ja̧ pä'ö. Ja̧'hua̧nö̧ ppä'ädinödo Tu̧ru̧hua̧ Diosmä Jonás a̧ 'cua̧ tta̧'ȩcu̧ ö̧'o̧mȩttö̧ ö̧ji̧pa̧ pä'ö. Jonás juiyo esehuinödo ja̧huä̧ta̧ a̧jä̧ta̧mä̧. 7 Ja̧'hua̧nö̧ ja̧'a̧ mo̧ro̧ juomenä, Tö̧ä̧nä̧hua̧ Dios hue'inödo ju̧hui̧tö̧rö̧ ttucui'a pä'ö a̧jä̧ta̧. Ja̧'hua̧nö̧ ttucui'omenä, jo'i'ö hua'ö icuina'ado a̧jä̧ta̧mä̧. 8 Ja̧'hua̧nö̧ päi'omenä kä̧hua̧ räo'omenä Tö̧ä̧nä̧hua̧ Dios hue'inödo kä̧rö̧'coppa du'huoppa kä̧hua̧ räopa'acuttu. Kä̧hua̧ rö̧ȩnä̧ du'hui'omenä, Jonás juiyupächinödo. Ja'huanö juiyupächi'ö 'corupäi'a pä'ötä jä'ȩpä̧ri̧nö̧do. pä'inödo: Pi̧jä̧nä̧ kä̧cuä̧huä̧ttö̧'i̧nä̧ abonänö adihuäcusä hua'aretä. 9 Ja̧'hua̧nö̧ ja̧'a̧ pä'inödo Tö̧ä̧nä̧hua̧ Dios Jonásrö: A̧jä̧ta̧ hua'ö icuäja'amä, rö̧ȩnä̧ cu̧ra̧huä̧ra̧'a̧mä̧ ¿adihua'a tä̧ji̧? Jonás ädänödo: A̧, adihua'a chö̧ra̧huä̧rö̧mä̧. Juiyo chö̧ra̧huä̧ra̧'a̧ttö̧ huäinä 'corujuo'ächösä. 10 Ja'huanö päomenä Tu̧ru̧hua̧ Dios pä'inödo Jonásrö: Ucu rerö̧jö̧nä̧ topäjijä a̧jä̧ta̧mä̧ ucu cuaditähuänämä bahuocota̧ jäjä̧ta̧. Ja̧huä̧ta̧ a̧jä̧ta̧ ya'ute yodo bahui'ina'a. 11 Ja̧'hua̧ta̧nö̧ koro yodo hua'ö icuinä̧ta̧. ¿Ttö'inä cha̧cua̧ tta̧dȩcu̧ juiyö'anö ja̧'a̧ tä̧ji̧, Nínive ttö̧ja̧rö̧? Recuätö ttö̧ja̧ ka̧cuä̧tö̧ Nínive ötahuiyänä. Ciento veinte mil ttö̧ja̧ jo̧mȩttö̧'i̧nä̧ abonänö ka̧cuä̧tö̧ ja̧u̧ ötahuiyänä. Jahuätömä jerupö jȩpö̧ ka̧cuä̧tö̧. Ja̧'hua̧ta̧nö̧ isotö recuätö äjicuäcuähuotö'inä ka̧cuä̧tö̧ ja̧u̧ ötahuiyänä, pä'inödo Tu̧ru̧hua̧ Diosmä.