¹ Ja̧'hua̧nö̧ ja̧'a̧ Jonás ucuocuinödo U̧ru̧hua̧ Ö̧ä̧nä̧hua̧ Diosrö po̧i̧ i̧sa̧ öacuä jacuättö. ² Pä'inödo: Ttörö suronä 'cuäopomettö huopäjisä ucuru, Chu̧ru̧hua̧ Diosrö. Ja'huanö ja̧'a̧, ä̧ju̧cuä̧ji̧jä̧ ttö huochömä. 'Corupädi'ö'anö päi'äcu huopäjisä. Huochömä ä̧ju̧cuä̧ji̧jä̧ ucumä. ³ Ttörö do'opö icuäjijä täcuome aje rö̧oto kä'coto päte'ö. Aje rö̧ȩnä̧ do'ö icuome päte'ö ma̧'ä̧chä̧ji̧sä̧. Chuhuämenä'inä rö̧ȩnä̧ ppahuome päte'ö ma̧'ä̧chä̧ji̧sä̧. ⁴ Ja̧'hua̧nö̧ jä̧cu̧ pä'äjisä: Ya'opö cuicuäcusä cuä'ca jo̧mȩttö̧. Ja'huanö ja̧'a̧nä̧'i̧nä̧ amöcuädäjisä: Ji̧nä̧ pä'äji ta'anö to̧chä̧cua̧sä̧ cuojusode adihuodemä. ⁵ Ajiyamä cha̧'cua̧ri̧'i̧yö̧'a̧nö̧ rö̧nä̧rä̧jä̧cu̧sä̧. Aje rö̧oto täcuoto jacuä rö̧nä̧rä̧jä̧cu̧sä̧ chamiyu jöböhuächi'önä. Aje isä'cua chunä juäocuächäjäcusä. ⁶ Möä'quiyu kadä'cara̧'a̧ päi'önä ma̧'ä̧chä̧ji̧sä̧. Pi̧jä̧ rȩjȩ a̧ttä̧chi̧'ä̧cuȩ ttörö 'cuäopönätä pä'ö amöcuädäjisä. Ja'huanö ja̧'a̧nä̧ ucutä Chu̧ru̧hua̧ Chö̧ä̧nä̧hua̧ Dios'corupädi'ö'anö jo̧mȩttö̧ cäcuhuepäjäcusä. ⁷ Täcö cha̧'cua̧rö̧ 'corujuoächa'ö'anö päi'a'anä'inä amöcuädäjisä Chu̧ru̧hua̧ Diosrö. Chucuocuomenä ä̧ju̧cuä̧ji̧jä̧ adihuode cuojusodettömä. ⁸ Amonä tö̧ä̧nä̧huo̧tö̧ tta̧'u̧cuä̧ ucuotätömä ucuru jaropi'ätö. ⁹ Ja'huanö ja̧'a̧nä̧ ucuru eseunu ucuocu ku icu iyähuä jȩchä̧cua̧sä̧. O'ca juiyönä pädäjimä jȩchä̧cua̧sä̧. Tu̧ru̧hua̧ Diostä chu̧ä̧cua̧tä̧ pi̧jä̧ ttö̧ja̧rö̧ ttö̧ji̧ pö̧nä̧ ppä'ädömä. ¹⁰ Ja̧'hua̧nö̧ ja̧'a̧ Tu̧ru̧hua̧ Dios hue'inödo po̧i̧ i̧sa̧rö̧ jäyoto rȩba̧nä̧ ko'äu ö́ta pä'ö Jonásrö.