¹ Meu fillo, se saíches por fiador do teu próximo, se deches promesa a un estraño, ² se te enredaches coas palabras da túa boca, se fuches atrapado coas palabras da túa boca, ³ fai agora isto, meu fillo, e líbrate, xa que caíches na man do teu próximo: vai, humíllate e amólate co teu próximo; ⁴ non deas sono aos teus ollos nin adormecemento ás túas pálpebras. ⁵ Líbrate coma a gacela da man do cazador, e coma a ave da man do que caza. ⁶ Vai e observa a formiga, preguiceiro, observa os seus camiños, e sé sabio. ⁷ A que sen ter xefe, nin gobernador nin señor, ⁸ prepara no verán o seu alimento, e recolle na colleita o seu sustento. ⁹ Ata cando, preguiceiro, estarás durmido? Cando te levantarás do teu sono? ¹⁰ Un pouco de sono, un pouco de durmir, un pouco de cruzar as mans para descansar, ¹¹ e virá coma un vagabundo a túa pobreza, e a túa necesidade coma un home armado. ¹² A persoa indigna, o home inicuo, é o que anda con boca perversa, ¹³ o que chisca os ollos, o que fai acenos cos pés, sinalando cos dedos, ¹⁴ o que con perversidade no seu corazón, continúa maquinando o mal, e que sementa discusión constantemente. ¹⁵ Por iso a súa desgraza virá de súpeto; nun instante será quebrantado, e non haberá remedio. ¹⁶ Hai seis cousas que Iahveh aborrece, e sete que son abominacións para El: ¹⁷ os ollos soberbios, a lingua mentireira, as mans que verten sangue inocente, ¹⁸ un corazón que maquina plans perversos, os pés que corren axiña cara o mal, ¹⁹ a testemuña falsa que fala mentiras, e o que sementa discusión entre irmáns. ²⁰ Meu fillo, garda o mandamento do teu pai, e non abandones o ensino da túa nai; ²¹ átaos de continuo no teu corazón, enlázaos ao teu pescozo. ²² Cando camiñes, guiarante; cando descanses, velarán por ti; e ao espertar, falarán contigo. ²³ Porque o mandamento é lámpada, e o ensino é luz, e camiño de vida a reprensión da instrución, ²⁴ para librarte da muller mala, da lingua suave da descoñecida. ²⁵ Non cobices a súa fermosura no teu corazón, nin deixes que te cative coas súas miradas. ²⁶ Porque se a prostituta vai na procura dun anaco de pan, a adúltera anda á caza dunha vida preciosa. ²⁷ Pode alguén coller lume no seu seo sen que arda a súa roupa? ²⁸ Ou pode unha persoa camiñar sobre as brasas sen queimar os pés? ²⁹ Así é o que se achega á muller do seu próximo; calquera que a toque non quedará sen castigo. ³⁰ Non se despreza o ladrón se rouba para saciarse cando ten fame; ³¹ pero cando é sorprendido, ten que pagar sete veces; e entegar todos os bens da súa casa? ³² Pois o que comete adulterio non ten entendemento; o que o fai destrúe a súa alma. ³³ Atopará feridas e vergoña, e a súa vergoña non será borrada. ³⁴ Porque os celos enfurecen o home, e non perdoará no día da vinganza. ³⁵ Non aceptará ningún rescate, nin se dará por satisfeito aínda que lle deas moitos presentes.