¹ Aquel que, despois da reprensión endurece o pescozo, de súpeto será quebrantado e non haberá menciña para el. ² Cando os xustos medran, o pobo alégrase; pero cando o malvado goberna, o pobo xeme. ³ O que ama a sabedoría alegra a seu pai, pero o que anda con prostitutas fai desaparecer a súa riqueza. ⁴ Un rei xusto establece o seu país, pero o que acepta subornos rematará destruíndoo. ⁵ O que adula ao seu próximo tende unha rede diante dos seus pasos. ⁶ A transgresión do malvado é a súa propia trampa, pero o xusto canta e alégrase. ⁷ O xusto preocúpase pola causa do pobre, pero o malvado non entende tal preocupación. ⁸ Os burladores axitan a cidade, pero os sabios afastan a ira. ⁹ Cando un sabio ten unha disputa cun necio, esté anoxado ou rindo, non ha ter acougo. ¹⁰ As persoas sanguinarias aborrecen ao íntegro, pero os xustos preocúpanse por el. ¹¹ O necio desafoga todas as súas paixóns, pero o sabio sabe controlalas dentro de si. ¹² Se un gobernante fai caso de palabras mentireiras, todos os seus servidores volveranse malvados. ¹³ O oprimido e o opresor teñen isto en común: Iahveh dá luz aos ollos de ambos. ¹⁴ O rei que xulga con verdade os desvalidos, afirmará o seu trono para sempre. ¹⁵ A vara e a reprensión dan sabedoría, pero o neno consentido avergoñará a súa nai. ¹⁶ Cando os malvados mandan os crímenes aumentan, pero os xustos verán a súa caída. ¹⁷ Corrixe a teu fillo e daráche acougo, e dará ledicia á túa alma. ¹⁸ Onde non hai visión, o pobo desenfréase, pero ditoso é o que garda a lei! ¹⁹ Un servo non se correxe só con palabras; aínda que as entenda, non lles fará caso. ²⁰ Ves a un home que fala ás carreiras? Hai máis esperanza para o necio que para el. ²¹ O que é consentido dende neno é un escravo, ao final lamentarao. ²² Un home anoxado provoca pelexas, e o furioso abunda en transgresións. ²³ O orgullo do home humillarao, pero o de espírito humilde obterá honra. ²⁴ O que se asocia cun ladrón aborrece a súa propia vida; escoita o xuramento, pero non di nada. ²⁵ O que teme ás persoas caerá na trampa, mais o que confía en Iahveh está por enriba de todo. ²⁶ Moitos buscan o favor do gobernante, pero de Iahveh vén a xustiza para cadaquén. ²⁷ Aquel que é inicuo é aborrecido polos xustos, e o de camiño recto é aborrecido polos malvados.