¹ Mellor é o pobre que anda na súa integridade que o rico de beizos perversos e ncio á vez. ² De nada vale ser quen de facer algo sen pensar: o que se apresura cos pés peca. ³ A tolemia de cadaquén pervirte o seu camiño, e despois o seu corazón irrítase contra Iahveh. ⁴ Canto máis rico máis amigos tes, pero o pobre é abandonado ata polo seu amigo. ⁵ A testemuña falsa non quedará sen castigo, e o que conta mentiras non fuxirá. ⁶ Moitos buscan o favor do xeneroso, e todos son amigos daquel que dá. ⁷ Todos os irmáns do pobre aborréceno, canto máis se afastarán del os seus amigos! Perségueos coas súas ladaíñas, pero xa marcharon. ⁸ O que acada cordura ama a súa alma; o que garda a prudencia atopará o ben. ⁹ A testemuña falsa non quedará sen castigo, e o que dá alentó ás mentiras perecerá. ¹⁰ Ao necio non lle convén vivir a todo luxo; moito menos a un servo gobernar os príncipes! ¹¹ A discreción dunha persoa detén a súa ira, e a súa gloria é pasar por alto unha ofensa. ¹² A ira do rei é coma o ruxido do león, e o seu favor coma o orballo sobre a herba. ¹³ O fillo necio é unha desgraza para o seu pai, e unha pingueira continua as liortas dunha muller. ¹⁴ Casa e riquezas son herdanza dos pais, pero a muller prudente vén de Iahveh. ¹⁵ A preguiza fai caer en sono profundo, e a alma ociosa pasará fame. ¹⁶ O que garda o mandamento garda a súa vida, pero o que menospreza os seus camiños morrerá. ¹⁷ Aquel que dá ao pobre préstalle a Iahveh, e El devolverallo. ¹⁸ Corrixe a teu fillo mentres hai esperanza, pero non desexes na túa alma causarlle a morte. ¹⁹ A persoa de grande ira sufrirá o castigo, e o que se poña polo medio, será castigado tamén. ²⁰ Escoita o consello e acepta a corrección, para que chegues a ser sabio. ²¹ Moitos son os plans no corazón do home, pero o consello de Iahveh permanecerá. ²² O que todos aprecian é a lealdade, e é mellor ser pobre que falso. ²³ O temor de Iahveh leva á vida, o que o ten ha vivir satisfeito, e non será visitado polo mal. ²⁴ O preguiceiro mete a súa man no prato, pero ata se cansa só de levala á boca. ²⁵ Dádelle unha labazada ao escarnador e o simple farase prudente. Corrixe o intelixente e aumentará o seu saber. ²⁶ O que rouba a seu pai e bota fóra a súa nai é un fillo que trae vergoña e deshonra. ²⁷ Deixa, meu fillo, de escoitar consellos que están a desviarte das palabras da sabedoría. ²⁸ A testemuña perversa búrlase da xustiza, e a boca dos malvados engulipa a iniquidade. ²⁹ Hai castigos axeitados para os burlóns, e azoutes para as costas dos necios.