¹ Eu son o home que viu a aflición baixo a vara do seu furor. ² El levoume e fíxome camiñar en tebras e non en luz. ³ Certamente contra min volveuse e volveu a súa man todo o día. ⁴ Fixo que se consumiran a miña carne e a miña pel, quebrantou os meus ósos. ⁵ Ergueuse contra min e rodeoume de amargura e tristura. ⁶ En lugares escurecidos fíxome morar, coma os que morreron hai tempo. ⁷ Cercoume e non podo saír, fixo pesadas as miñas cadeas. ⁸ Aínda cando clamo e pido axuda, El fecha o paso á miña oración. ⁹ Pechou os meus camiños con pedras labradas, fixo tortos os meus vieiros. ¹⁰ El é para min coma oso ameazante, coma león agachado. ¹¹ Desviou os meus camiños e esnaquizoume, deixoume desolado. ¹² Entesou o seu arco e púxome como branco das frechas. ¹³ Fixo que penetraran nas miñas tripas as frechas da súa alxaba. ¹⁴ Cheguei a ser o escarnio de todo o meu pobo, a súa burla día tras día. ¹⁵ El encheume de amargura, embebedoume con xoio. ¹⁶ Esmagou cos pedrizos os meus dentes, fixo que me revolvera no pó. ¹⁷ E a miña alma foi privada da paz, esquecín a felicidade. ¹⁸ E dixen: pereceu o meu vigor, e a miña confianza no Señor! ¹⁹ Lémbrate da miña aflición e da miña miseria, do meu pranto e da miña amargura! ²⁰ Heino ter sempre na miña memoria, e a túa alma gardará loito por min. ²¹ Isto traio ao meu corazón, por isto teño unha esperanza nova: ²² As misericordias do Señor nunca rematan, pois as súas bondades nunca faltan; ²³ son novas cada mañá; grande é a túa fidelidade! ²⁴ Iahveh é a miña porción! di a miña alma, por iso agardo nel. ²⁵ Iahveh é bo para os que o agardan, para a alma que o busca. ²⁶ É bo agardar en silencio a salvación do Señor. ²⁷ Bo é para o home levar o xugo na súa xuventude. ²⁸ Que se sente só e garde silencio xa que El llo impuxo; ²⁹ Que poña a súa boca no pó, por se aínda hai esperanza; ³⁰ Que lle dea a meixela ao que o fere; que se farte de aldraxes. ³¹ Porque o Señor non rexeita para sempre. ³² Aínda que El aflixe, tamén se compadecerá segundo a súa grande misericordia. ³³ Porque El non castiga por pracer, nin se comprace aflixindo aos fillos dos homes. ³⁴ Esmagar debaixo dos pés a tódolos presos dun país, ³⁵ privar do dereito a unha persoa na presenza do Altísimo, ³⁶ enganar a un home no seu litixio: estas cousas non as aproba o Señor! ³⁷ Quen é aquel que fala e así acontece, se o Señor non o ordenou? ³⁸ Non saen da boca do Altísimo tanto as desgrazas como o bo? ³⁹ Por que se ha queixar o ser vivo? Que sexa valente fronte os seus pecados! ⁴⁰ Examinemos os nosos camiños e escudriñémolos, e volvamos a Iahveh! ⁴¹ Ergamos o noso corazón nas nosas mans cara o Deus nos ceos. ⁴² Nós pecamos e rebelámonos; e Ti non nos perdoaches. ⁴³ Cubrícheste de ira e perseguíchesnos; mataches e non perdoaches. ⁴⁴ Cubrícheste cunha nube para que a oración non chegara a ti. ⁴⁵ Fixéchesnos lixo e escoria no medio dos pobos. ⁴⁶ Abriron a súa boca contra nós todos os nosos inimigos. ⁴⁷ O espanto e a fosa viñeron sobre nós, a desolación e a destrución. ⁴⁸ Ríos de auga derraman os meus ollos por mor da destrución da filla do meu pobo. ⁴⁹ Os meus ollos flúen sen cesar, sen ter descanso. ⁵⁰ Ata que Iahveh vexa e mire dende os ceos. ⁵¹ Os meus ollos causan dor á miña alma por todas as fillas da miña cidade. ⁵² Coma un paxáro déronme caza, aqueles que son os meus inimigos sen causa. ⁵³ Calaron a miña vida cando estaba na fosa, e botaron pedra sobre min. ⁵⁴ As augas cubriron a miña cabeza e dixen: -Estou perdido! ⁵⁵ Invoquei o teu nome, Iahveh, dende a fosa máis profunda. ⁵⁶ Ti escoitaches a miña voz: non peches o teu ouvido ao clamor dos meus suspiros! ⁵⁷ Achegácheste o día que te invoquei e dixeches: -Non temas. ⁵⁸ Ti defendiches, Señor, a causa da miña alma e redimiches a miña vida. ⁵⁹ Ti miraches a miña opresión, faime xustiza Iahveh! ⁶⁰ Miraches toda a súa vinganza, tódolos seus plans contra min. ⁶¹ Escoitaches as súas aldraxes, ó Iahveh, tódalas súas murmuracións contra min; ⁶² os beizos dos meus agresores e as súas murmuracións están na miña contra todo o día. ⁶³ Estean sentados ou en pé, eu son o obxecto da súa copla. ⁶⁴ Ti daraslles o seu pago, ó Iahveh, conforme a obra das súas mans. ⁶⁵ Daraslles dureza de corazón, a túa maldición será sobre eles. ⁶⁶ Persígueos coa túa ira e destrúeos de debaixo dos ceos, ó Iahveh!