¹ E sucedeu que cando Adonisedec, rei de Xerusalem ouviu que Xosué conquistara a Hai e a destruíra por completo (como fixera con Xericó e co seu rei, así fixo con Hai e co seu rei), e que os habitantes de Gabaón fixeran a paz con Israel e vivían dentro da súa terra, ² colleu moito medo, porque Gabaón era unha cidade grande, como unha das cidades reais, porque era máis grande que Hai, e todos so seus homes eran valentes. ³ Adonisec, rei de Xerusalem, enviou unha mensaxe a Hoham, rei de Hebrón, a Piream, rei de Jarmut, a Jafía, rei de Laquis e a Debir, rei de Eglón, dicindo: ⁴ "Subide onda min e axudádeme, e ataquemos a Gabaón, porque fixo a paz con Xosué e cos fillos de Israel". ⁵ Reuníronse, pois, os cinco reis dos amorreos, o rei de Xerusalem, o rei de Hebrón, o rei de Jarmut, o rei de Laquis e o rei de Eglón, e subiron con todos os seus exércitos, e acamparon perto de Gabaón e loitaron contra ela. ⁶ Entón os homes de Gabaón enviaron unha mensaxe onda Xosué, ao campamento de Gilgal, dicindo: Non deixes da túa man aos teus servos; sube axiña onda nós, axúdanos e sálvanos , porque todos os reis dos amorreos que moran nos montes, achegáronse contra nós. ⁷ E Xosué subiu a Gilgal, con toda a xente de guerra , e con todos os valentes guerreiros. ⁸ E Iahveh dixo a Xosué: Non lles teñas medo, porque os entreguei nas túas mans; ningún deles poderá contra ti. ⁹ E Xosué arremeteu, de súpeto onda eles, despois de camiñar durante toda a noite desde Gilgal. ¹⁰ E Iahveh confundíunos diante de Israel, e bateunos cun grande estrago en Gabaón, e perseguiunos polo camiño da subida de Bet-horón, e mallou neles deica Azeca e Maceda. ¹¹ E sucedeu que ao furxíren de diante de Israel, cando estaban na baixada de Bet-horón, Iahveh mandou contra eles grandes pedras desde o ceo ata Azeca, e morreron; e foron máis os que morreron polas pedras de pedrazo, que os que mataron a espada os fillos de Israel. ¹² Entón Xosué falou a Iahveh o día que Iahveh entregou aos amorreos diante dos fillos de Israel, e dixo en presenza de Israel: "Sol, está quedo en Gabaón, e ti, lúa, no val de Ajalón". ¹³ E o sol detívose e a lúa parou, ata que a nación se vingou dos seus inimigos. Non está escrito no libro de Jaser? E o sol estivo parado no medio do ceo durante un día enteiro, sen bulir para poñerse ¹⁴ E non houbo día como aquel, nin antes nin despois, no que Iahveh escoitase así a voz dun home; porque Iahveh loitou do lado de Israel. ¹⁵ Entón Xosué e todo Israel volveron ao campamento en Gilgal, . ¹⁶ E aqueles cinco reis fuxiran e agocháranse na cova de Maceda. ¹⁷ E anunciáronlle a Xosué : " Deron cos cinco reis agochados na cova de Maceda." ¹⁸ E Xosué dixo: "Acarrexade pedras grandes ata a entrada da cova, e poñede onda ela homes que os vixíen, ¹⁹ pero vós non vos quededes alí; perseguide aos vosos inimigos e atacádeos pola retagarda. Non os deixedes entrar nas súas cidades, porque Iahveh, o voso Deus, entregounos nas vosas mans ²⁰ E sucedeu que cando Xosué e os fillos de Israel remataron de ferilos con grande estrago, ata que foron destruídos, e que os sobrevivintes que deles quedaron entraron nas cidades fortificadas, ²¹ todo o pobo volveu en paz ao campamento, onda Xosué, en Maceda . Ninguén dixo palabra algunha contra os fillos de Israel ²² Entón Xosué dixo: "Abride a entrada da cova e sacádeme para acó a eses cinco reis". ²³ E fixérono así, e sacaron da cova estes cinco reis: o rei de Xerusalem, o rei de Hebrón, o rei de Jarmut, o rei de Laquis, e o rei de Eglón. ²⁴ E sucedeu que cando levaron estes reis a Xosué, el chamou a todos os homes de Israel e díxolles aos xefes dos homes de querra que foran con el: "Achegádevos e poñede o voso pé enriba dos pescozos destes reis". Eles achegáronse e puxeron os pés sobre as gorxas deles. ²⁵ E díxolles Xosué:" Non teñades medo nin vos acovardedes. Sede fortes e valentes, porque así fará Iahveh con todos os vosos inimigos que loiten contra vós. ²⁶ Despois Xosué feriunos ata matalos, colgounos de cinco árbores, e quedaron pendendo delas ata o serán ²⁷ E sucedeu que ao solpor, Xosué mandou que os baixaran das árbores e botáronos na cova onde se agocharan; e puxeron grandes pedras na entrada da cova, que permanecen ata o día de hoxe. ²⁸ E aquel día Xosué conquistou Maceda, e pasouna polo gume da espada xunto co seu rei; destruíuna por completo con todas as persoas que había nela. Non deixou ningún sobrevivente; e fixo co rei de Maceda como fixera co rei de Xericó. ²⁹ Xosué, e todo Israel con el, foron de Maceda a Libna e loitaron contra Libna, ³⁰ e púxoa Iahveh tamén, xunto co seu rei, nas mans de Israel, que a pasou polo gume da espada con todas as persoas que había nela. Non deixou ningún sobrevivente nela, e fixo co seu rei como fixera co rei de Xericó. ³¹ Xosué, e todo Israel con el, pasou de Libna a Laquis, acampou perto dela, e loitou contra ela. ³² E Iahveh entregou a Laquis nas mans de Israel, tomouna ao segundo día e pasouna polo gume da espada con todas as persoas que había nela, do mesmo xeito que fixera a Libna ³³ Entón Horam, rei de Gezer, subiu en axuda de Laquis, e Xosué bateuno a el e mais ao seu pobo, ata non deixar ningún sobrevivente. ³⁴ Xosué , e todo Israel con el, pasou de Laquis a Eglón, e acamparon perto dela e a atacaron. ³⁵ Conquistárona naquel mesmo día e pasárona polo gume da espada; e aquel día destruíu por completo a todas as persoas que había nela, como fixera con Laquis. ³⁶ Entón Xosué e todo Israel subiron de Eglón a Hebrón, e loitaron contra ela. ³⁷ Tomárona e pasárona polo gume da espada, co seu rei, todas as súas cidades e todas as persoas que había nela. Non deixou ningún sobrevivente, segundo todo o que fixera con Eglón. Exterminouna con todas as persoas que había nela. ³⁸ Despois Xosué, e todo Israel con el, volveron contra Debir e loitaron contra ela. ³⁹ Conquistouna, co seu rei e todas as súas cidades, fe pasounos polo guma da espada ; e destruíu por completo todas as persoas que había nela. Non deixou sobrevivente ningún. Como fixera con Hebrón e como tamén fixera con Libna e o seu rei, así fixo con Debir e o seu rei. ⁴⁰ Xosué conquistou toda a terra: a rexión montañosa, o Neguev, a terra chá, as ladeiras, e todos os seus reis. Non deixou ningún sobrevivente, senón que exterminou todo o que tiña vida, tal e como mandara Iahveh, Deus de Israel. ⁴¹ Xosué arrasou desde Cades-barnea ata Gaza, e todo o territorio de Gosén, ata Gabaón. ⁴² Xosué venceu dunha batida a todos estes reis e os seus territorios porque Iahveh, Deus de Israel, loitaba do lado de Israel. ⁴³ E regresou Xosué, e todo Israel con el, ao campamento de Gilgal