¹ No sétimo mes foi Ismael, fillo de Netanías, fillo de Elisama, da familia real, e un dos oficiais principais do rei, xunto con dez homes, onde estaba Guedalías, fillo de Ahicam, en Mizpa. E mentres comían pan xuntos alí en Mizpa, ² ergueuse Ismael, fillo de Netanías, e os dez homes que estaban con el, e feriron á espada a Gedalías, fillo de Ahicam, fillo de Safán, e mataron ao que o rei de Babilonia puxera para gobernar sobre a terra. ³ Ismael matou tamén a tódolos xudeus que estaban con el, é dicir, con Guedalías, en Mizpa, e aos homes de guerra caldeos que se atopaban alí. ⁴ E sucedeu que ao día seguinte do asasinato de Guedalías, cando ninguén o sabía aínda, ⁵ Oitenta homes viñeron de Siquem, de Silo e de Samaria, coas barbas rapadas, as vestiduras rachadas e con incisións nos seus corpos, e con ofrendas de gran e incenso nas súas mans, para levalos á casa de Iahveh. ⁶ Entón Ismael, fillo de Netanías, saíu ao seu encontro dende Mizpa, chorando mentres ía camiñando ata dar con eles, e díxolles: -Vinde a Guedalías, fillo de Ahicam! ⁷ E aconteceu que cando entraron na cidade, Ismael, fillo de Netanías, degolounos, e xunto aos homes que estaban con el, botáronos na cisterna. ⁸ Entre aqueles estaban os dez homes que dixeran a Ismael: Non nos mates; pois temos agachados no campo, depósitos de trigo, cebada, aceite e mel. E el deixounos e non os matou coma a seus irmáns. ⁹ E a cisterna onde Ismael botara todos os cadáveres dos homes que el matara xunto a Guedalías, era a que o rei Asa fixera por causa de Baasa, rei de Israel; Ismael, fillo de Netanías, encheuna de cadáveres. ¹⁰ Despois Ismael levou cativo a todo o resto do pobo que estaba en Mizpa, ás fillas do rei e a todo o pobo que ficara en Mizpa, aos que Nabuzaradán, capitán da garda, puxera baixo o mando de Guedalías, fillo de Ahicam. Colleunos, pois, cativos Ismael, fillo de Netanías, e foi a pasarse aos fillos de Amón. ¹¹ Pero como Iohanán, fillo de Carea, e tódolos capitáns das tropas que estaban con el, escoitaron de todo o mal que fixera Ismael, fillo de Netanías, ¹² colleron a tódolos seus homes e foron a pelexar contra Ismael, fillo de Netanías, e atopárono xunto ao gran estanque que está en Gabaón. ¹³ E aconteceu que cando todo o pobo que estaba con Ismael viu a Iohanán, fillo de Carea, e aos capitáns das tropas que estaban con el, alegráronse. ¹⁴ E todo o pobo ao que Ismael levaba prisioneiro a Mizpa deu volta e volveu e marchou con Iohanán, fillo de Carea. ¹⁵ Pero Ismael, fillo de Netanías, fuxiu de Iohanán con oito homes e foi cos fillos de Amón. ¹⁶ Entón Iohanán, fillo de Carea, e tódolos capitáns das tropas que estaban con el colleron de Mizpa a todo o resto do pobo que el recuperara de Ismael, fillo de Netanías, despois que este matara a Guedalías, fillo de Ahicam, é dicir, aos homes de guerra, as mulleres, os nenos e os eunucos, que trouxera de Gabaón. ¹⁷ E foron e quedaron en Gerut-quimam, que está preto de Belén, a fin de ir e entrar en Exipto, ¹⁸ por mor dos caldeos, porque lles tiñan medo, xa que Ismael, fillo de Netanías, matara a Guedalías, fillo de Ahicam, a quen o rei de Babilonia puxera para gobernar a terra.