¹ Veu a palabra de Iahveh a Xeremías por segunda vez, mentres el aínda estaba detido no patio da garda, dicindo: ² Así di Iahveh que fixo a terra, Iahveh que a formou para establecela; Iahveh é o seu nome: ³ "Chámame, e Eu respondereiche e revelareiche cousas grandes e inaccesibles, que ti non coñeces." ⁴ Porque así di Iahveh, Deus de Israel, sobre as casas desta cidade e sobre as casas dos reis de Xudá que foron derrubadas para construír defensas contra as torres de asalto e contra a espada: ⁵ Agora veñen a pelexar contra ela os caldeos enchéndoas cos cadáveres dos homes que ferín na miña ira e no meu furor, pois eu agochara o meu rostro desta cidade por mor de toda a súa maldade, ⁶ velaí, Eu mesmo traerei saúde e sanidade; sandareinos e revelareilles a abundacia de paz e de verdade. ⁷ Farei volver aos cativos de Xudá e os cativos de Israel e restablecereinos coma no principio. ⁸ Limpareinos de toda a maldade que cometeron contra min, e perdoarei tódalas iniquidades coas que pecaron contra min e coas que transgrediron os meus mandamentos. ⁹ E a cidade será para min un nome de gozo, de loanza e de gloria diante de tódalas nacións da terra, que escoitarán de todo o ben que lle fago, e temerán e tremerán por mor de todo o ben e de toda a paz que lle dou. ¹⁰ Así di Iahveh: "Neste lugar, do que vós dicides: está desolado, sen persoas nin animais, nas cidades de Xudá e nas rúas de Xerusalém que están desoladas, sen persoas, sen habitantes e sen animais, hase sentir de novo ¹¹ a voz de gozo e voz de ledicia, a voz do noivo e a voz da noiva, a voz dos que din: dade grazas a Iahveh dos exércitos, porque Iahveh é bo, porque a súa misericordia é para sempre; e dos que traen ofrenda de acción de grazas á casa de Iahveh. Porque volverei a traer os cativos da terra coma no principio, di Iahveh. ¹² Así di Iahveh dos exércitos: "Neste lugar deserto, sen persoas nin animais, e en tódalas súas cidades, haberá de novo morada de pastores que fagan descansar os seus rabaños. ¹³ Nas cidades da rexión montañosa, nas cidades da chaira, nas cidades do Neguev, na terra de Benxamín, nos arredores de Xerusalém e nas cidades de Xudá, volverán pasar as ovellas baixo as mans do que as conta, di Iahveh. ¹⁴ "Velaí, veñen días - di Iahveh - en que cumprirei a boa palabra que falei á casa de Israel e á casa de Xudá. ¹⁵ Naqueles días e naquel tempo farei abrollar de David un xermolo xusto, e El fará xuízo e xustiza na terra. ¹⁶ Naqueles días Xudá estará salvo, e Xerusalém vivirá segura, e este é o nome con que será chamada: Iahveh, é a nosa xustiza. ¹⁷ Porque así di Iahveh: "Nunca lle faltará a David quen sente sobre o trono da casa de Israel; ¹⁸ nin lles ha faltar aos sacerdotes e os levitas un home que ofreza diante de min o holocausto e prenda a ofrenda, e que faga o sacrificio todolos días. ¹⁹ Veu a palabra de Iahveh a Xeremías, dicindo: ²⁰ Así di Iahveh: "Se puidésedes quebrantar o meu pacto co día e o meu pacto coa noite, de modo que o día e a noite non aparezan ao seu tempo, ²¹ entón tamén podería quebrarse o meu pacto co meu servo David, e el non tería fillo para reinar sobre o seu trono cos levitas e sacerdotes, os meus ministros. ²² Como non se pode contar o exército do ceo, nin se pode medir a area do mar, así multiplicarei a descendencia do meu servo David e dos levitas que me serven. ²³ Veu a palabra de Iahveh a Xeremías, dicindo: ²⁴ Non ouviches o que este pobo falou, dicindo: as dúas familias que Iahveh escolleu, rexeitounas? Deste xeito desprezan o meu pobo, xa non son unha nación aos seus ollos. ²⁵ Así di Iahveh: como é certo que creei o día e a noite e establecín os ceos e a terra, ²⁶ tamén é certo que non rexeitarei a descendencia de Xacob e do meu servo David, deixando de tomar da súa descendencia quen goberne sobre a descendencia de Abraham, de Isaac e de Xacob. Porque Eu restauro o seu benestar e teño misericordia deles.