¹ Palabra que veu a Xeremías de parte de Iahveh no ano décimo de Sedequías, rei de Xudá, que foi o ano décimo oitavo de Nabucodonosor. ² Naquel tempo o exército do rei de Babilonia tiña sitiado a Xerusalém, e o profeta Xeremías estaba encerrado no patio da garda, que estaba na casa do rei de Xudá, ³ porque Sedequías, rei de Xudá, foi quen de encerralo, acusándoo: - Ti profetizas, dicindo: así di Iahveh: velaí, vou entregar esta cidade nas mans do rei de Babilonia, para que a conquiste. ⁴ Sedequías, rei de Xudá, non fuxirá da man dos caldeos, senón que certamente será entregado nas mans do rei de Babilonia que falará con el cara a cara, e os seus ollos verán os ollos del; ⁵ e el levará a Sedequías a Babilonia, e estará alí ata que Eu o visite. Se loitades contra os caldeos, non teredes éxito, di Iahveh ⁶ E Xeremías dixo: -Veu a min a palabra de Iahveh, dicindo: ⁷ Velaí, Hanameel, fillo do teu tío Salum, vén a ti, dicindo: merca o campo que teño en Anatot, porque ti tes o dereito de rescate para mercalo. ⁸ E veu onda min Hanameel, fillo do meu tío, ao patio da garda conforme a palabra de Iahveh, e díxome: -Rógoche que merques o campo que teño en Anatot, que está na terra de Benxamín, porque ti tes o dereito de posesión e o rescate é teu; mercao para ti. Entón comprendín que esta era a palabra de Iahveh. ⁹ E merquei a Hanameel, fillo do meu tío, o campo que estaba en Anatot, e pesei a prata, dezasete siclos de prata. ¹⁰ Escribín o contrato e púxenlle un selo, fíxeno certificar con testemuñas, e pesei a prata na balanza. ¹¹ Logo tomei o contrato de venda, a copia selada segundo o dereito e o costume, e tamén a copia aberta; ¹² e deille a escritura da propiedade a Baruc, fillo de Nerías, fillo de Maasías, en presenza de Hanameel, fillo do meu tío, en presenza das testemuñas que firmaron a escritura da propiedade e diante de todos os xudeus que se atopaban no patio do cárcere. ¹³ E dei orde a Baruc en presenza deles, dicindo: ¹⁴ -Así di Iahveh dos exércitos, o Deus de Israel: -Toma estas escrituras, esta escritura da propiedade selada e esta escritura aberta, e gárdaas nun vaso de barro para que se conserven por moito tempo. ¹⁵ Porque así di Iahveh dos exércitos, o Deus de Israel: “Aínda se mercaran casas, campos e viñas nesta terra.” ¹⁶ Entón orei a Iahveh, despois de dar a escritura da propiedade a Baruc, fillo de Nerías, dicindo: ¹⁷ -Ai, Iahveh Deus! Velaí que ti fixeches os ceos e a terra co teu gran poder e co teu brazo estendido; nada é demasiado difícil para ti, ¹⁸ que amosas misericordia a milleiros, pero que castigas a maldade dos pais nos seus fillos despois deles, Oi Deus grande e poderoso, Iahveh dos exércitos é o seu nome; ¹⁹ grande en consello e poderoso en obras, os seus ollos están abertos sobre todos os camiños dos fillos dos homes, para dar a cada un conforme os seus camiños e conforme o froito das súas obras. ²⁰ Ti fixeches sinais e portentos en Exipto, lembrados ata hoxe en Israel e entre todas as nacións; fixécheste un renome, como se ve hoxe. ²¹ E sacaches o teu pobo Israel da terra de Exipto con sinais e portentos, con man forte e con brazo estendido e con fazañas terribles, ²² e decheslle esta terra, que xuraches dar aos seus pais, terra da que flúe leite e mel. ²³ E eles entraron e tomaron posesión dela, pero non obedeceron a túa voz nin camiñaron na túa lei. Non fixeron nada de todo o que lles mandaches facer; por iso ti fixeches vir sobre eles toda esta calamidade. ²⁴ Velaí, as torres de asalto chegan á cidade para conquistala, e a cidade vai ser entregada nas mans dos caldeos que pelexan contra ela, por mor da espada, a fame e a pestilencia. Aconteceu tal como anunciaches, e ti estás a velo. ²⁵ E ti, Iahveh Deus disme: "Merca o campo con cartos, e chama as testemuñas; aínda que a cidade sexa entregada nas mans dos caldeos? ²⁶ Entón veu a palabra de Iahveh a Xeremías, dicindo: ²⁷ Velaí, Eu son Iahveh, o Deus de toda carne, haberá cousa imposible para min? ²⁸ Polo tanto, así di Iahveh: "Velaquí, entregarei esta cidade nas mans dos caldeos e nas mans de Nabucodonosor, rei de Babilonia, e el ha tomala. ²⁹ E entrarán os caldeos que atacan esta cidade, e prenderanlle lume e queimarana, xunto coas casas nas que ofreceron incenso a Baal sobre as súas terrazas e derramaron libación a outros deuses para provocarme ira. ³⁰ Porque os fillos de Israel e os fillos de Xudá só fixeron o malo aos meus ollos dende a súa mocidade; en verdade os fillos de Israel non fixeron máis ca provocarme a ira coa obra das súas mans -di Iahveh- ³¹ Porque motivo da miña ira e do meu furor foi esta cidade para min, dende o día en que a edificaron ata hoxe, de xeito que será quitada da miña presenza ³² por todo o mal que os fillos de Israel e os fillos de Xudá fixeron para provocarme a ira, eles, os seus reis, os seus príncipes, os seus sacerdotes, os seus profetas, os xudeos e os habitantes de Xerusalém. ³³ Eles déronme as costas, e non o rostro; aínda que lles ensinaba dende o abrente, unha e outra vez, non escoitaron nin aceptaron corrección, ³⁴ senón que puxeron as súas abominacións na casa que é chamada polo meu nome, profanándoa. ³⁵ E edificaron os lugares altos de Baal que están no val de Ben-Hinom, para facer pasar polo lume os seus fillos e as súas fillas en honra de Moloc, o que Eu nunca lles mandara, nin me pasou pola mente que eles cometesen esta abominación, para facer que Xudá pecara. ³⁶ Agora pois, así di Iahveh, Deus de Israel, en canto a esta cidade da que vós dicides: vai ser entregada nas mans do rei de Babilonia pola espada, pola fame e pola pestilencia. ³⁷ Velaí que os reunirei de tódalas terras ás que os botei na miña ira, no meu furor e na miña grande indignación, e fareinos volver a este lugar e fareinos vivir seguros. ³⁸ Eles serán o meu pobo, e Eu serei o seu Deus; ³⁹ e dareilles un só corazón e un só camiño, para que me teman sempre, para ben deles e dos seus fillos despois deles. ⁴⁰ Farei con eles un pacto eterno, e non me afastarei deles, para facerlles ben, e infundirei o meu temor nos seus corazóns para que non se afasten de min. ⁴¹ Heime compracer neles facéndolles ben, e certamente heinos plantar nesta terra, con todo o meu corazón e con toda a miña alma. ⁴² Porque así di Iahveh: "Como trouxen a este pobo toda esta gran calamidade así vou traer sobre eles todo o ben que lles prometín. ⁴³ E mercaranse campos nesta terra da que vós dicides: é unha desolación, sen persoas nin animais; entregada está nas mans dos caldeos. ⁴⁴ A xente mercará campos por cartos, firmará e selará escrituras e chamará a testemuñas, na terra de Benxamín, nos arredores de Xerusalém, nas cidades de Xudá, nas cidades da rexión montañosa, nas cidades da chaira e nas cidades do Neguev. Eu farei volver os seus cativos, di Iahveh.