¹ Palabra que veu a Xeremías de parte de Iahveh cando o rei Sedequías o mandou a Pasur, fillo de Malquías, e ao sacerdote Sofonías, fillo de Maasías, dicindo: ² "Consulta agora da nosa parte a Iahveh, porque Nabucodonosor, rei de Babilonia, fai a guerra contra nós; poida que Iahveh faga con nós conforme todas as súas marabillas, para que o inimigo se retire de nós." ³ Entón Xeremías díxolles: -Así lle diredes a Sedequías: ⁴ -Así di Iahveh, Deus de Israel: "Velaí, Eu farei volver as armas de guerra que tedes nas vosas mans, coas que loitades contra o rei de Babilonia e contra os caldeos que vos sitian fóra dos muros. A eles hei de reunilos no medio desta cidade. ⁵ E Eu mesmo pelexarei contra vós con man estendida e brazo poderoso, cheo de ira, furor e grande anoxo. ⁶ Ferirei os habitantes desta cidade, ben sexan persoas ou animais, que morrerán de gran pestilencia. ⁷ E despois disto -di Iahveh- entregarei a Sedequías, rei de Xudá, e aos seus servos, e ao pobo e aos que sobrevivan nesta cidade da pestilencia, da espada e da fame, nas mans de Nabucodonosor, rei de Babilonia, nas mans dos seus inimigos e nas mans dos que buscan as súas vidas; e el feriraos a espada. Non os perdoará nin lles terá piedade nin compaixón. ⁸ E dirás a este pobo: así di Iahveh: velaí que poño diante de vós o camiño da vida e o camiño da morte. ⁹ O que quede nesta cidade morrerá á espada, de fame e de pestilencia; pero o que saia e se entregue aos caldeos que vos asedian, vivirá, e terá a súa propia vida por botín. ¹⁰ Porque puxen o meu rostro contra esta cidade para mal, e non para ben, di Iahveh: será entregada en mans do rei de Babilonia, que a queimará con lume. ¹¹ E dixen á casa do rei de Xudá: -Escoitade a palabra de Iahveh: ¹² Casa de David, así di Iahveh: -Ide pronto a facer xustiza e librade o despoxado das mans do seu opresor, non sexa que a miña indignación saia coma lume, e arda de modo que non haxa quen o apague, por mor da maldade dos vosos feitos. ¹³ Velaí, Eu estou contra ti, moradora do val, rocha da chaira! di Iahveh; vós que dicides: quen descenderá contra nós? Quen entrará nas nosas moradas? ¹⁴ Eu castigareivos conforme o froito das vosas obras, di Iahveh, e prenderei lume ao seu bosque que consumirá todo ao seu arredor.