¹ Veu a min a palabra de Iahveh, dicindo: ² Ti, fillo de home, así di Iahveh o Señor á terra de Israel: "Chega a fin! A fin vén sobre os catro extremos da terra. ³ Agora vén a fin sobre ti, e mandarei sobre ti a miña ira, e xulgareite segundo os teus camiños; e porei sobre ti todas as túas abominacións. ⁴ O meu ollo non terá misericordía de ti, nin te ha perdoar; senón que porei sobre ti os teus camiños, e no medio de ti estarán as túas abominacións; e saberedes que Eu son Iahveh. ⁵ Así di Iahveh o Señor: "vai vir unha desgraza tras outra”. ⁶ Chegou a fin, veu a fin! Espertou contra ti, velaí que vén. ⁷ A mañá chegou para ti, habitante da terra; o tempo chegou, está preto o día, día de rebumbio e non de ledicia sobre os montes. ⁸ Agora, axiña derramarei sobre ti a miña ira, e cumprirei en ti a miña ira; e xulgareite segundo os teus camiños, e has pagar as túas abominacións. ⁹ O meu ollo non perdoará, nin terei compaixón; conforme os teus camiños porei sobre ti, e as túas abominacións estarán no medio de ti; e saberedes que eu, Iahveh, son o que castiga. ¹⁰ Velaí o día: está a chegar! Saíu a mañá, a vara floreceu, a soberbia reverdeceu. ¹¹ A violencia ergueuse en vara de maldade; non quedará nada deles nin da súa multitude, nin da súa facenda, nin haberá quen se laie por eles. ¹² Chegou o tempo, achegouse o día! Non se alegre o que merca, e non chore o que venda, porque a ira está sobre toda a súa multitude. ¹³ Pois o vendedor non recobrará o que vendeu nin o compardor reterá o comprado; porque a ira está sobre toda a multitude e non se reverterá, e por mor da súa iniquidade ninguén poderá defender a súa vida. ¹⁴ Soarán a trompeta e todo estará listo, pero non haberá quen saia ao combate, porque a miña ira está sobre toda a multitude. ¹⁵ De fóra a espada, de dentro a peste e a fame! O que estea no campo morrerá a espada; e o que estea na cidade a fame e a peste consumirano. ¹⁶ E os que escapen fuxindo aos montes, estarán coma as pombas dos vales, xemendo todos, cada un pola súa iniquidade. ¹⁷ Tódolos brazos desfalecerán, todos os xeonllos han ser febles. ¹⁸ Cinguiranse de cilicio, e cubriranse de terror; toda faciana estará avergoñada, e tódalas cabezas serán rapadas. ¹⁹ Botarán a súa prata nas rúas, e tratarán o seu ouro coma lixo. A súa prata e o seu ouro non poderán rescatalos no día da ira de Iahveh, porque iso foi a súa pedra de tropezo e o seu pecado. Non lles quitarán a fame nin encherán o seu ventre. ²⁰ Porque converteron a gloria das súas xoias en soberbia e fixeron con elas imaxes dos seus ídolos abominables, polo tanto Eu converterei todo iso en lixo, ²¹ e entregareino coma botín nas mans dos estranxeiros, e será presa dos impíos da terra, e a profanarán. ²² E afastarei deles o meu rostro, e o meu lugar secreto será profanado; e os invasores entrarán nel e profanarano. ²³ Prepara uns grillóns, porque o país está cheo de delitos de sangue e a cidade reborda violencia. ²⁴ Por tanto, Eu traerei os pobos máis feroces para que se fagan donos das súas casas; e porei fin ao orgullo dos poderosos, e os seus santuarios serán profanados. ²⁵ Cando chegue o pánico buscarán a paz, pero non a haberá. ²⁶ Virá destrución sobre destrución, e haberá alarma tras alarma; pedirán visión sao profeta, pero a lei afastarase do sacerdote e o consello dos anciáns. ²⁷ O rei vestirase de desolación, e o príncipe de medo, e as mans do pobo do país tremerán. Heinos tratar conforme os seus camiños, e xulgareinos conforme á súa xustiza; e saberán que Eu son Iahveh.