¹ Veu a min a palabra de Iahveh, dicindo: ² Fillo de home, profetiza e di: así di Iahveh o Señor: Laiádevos! Ai daquel día! ³ Porque está preto o día, está preto o día de Iahveh; día de negras nubes, día de castigo para as nacións. ⁴ E virá a espada sobre Exipto, e haberá angustia en Etiopía cando caian acoitelados en Exipto; e leven as súas riquezas e os seus alicerces sexan destruídos. ⁵ Etiopía, Fut, Lud e toda Arabia, Libia e os fillos das terras aliadas caerán con eles a espada. ⁶ Así di Iahveh: "Caerán os que sosteñen a Exipto, e caerá a soberbia do seu poder; dende Migdal ata Sevene caerán ao fío da espada," di Iahveh o Señor. ⁷ E serán asolados entre as terras arrasadas, e as súas cidades estarán entre as cidades que quedaron desertas. ⁸ E coñecerán que Eu son Iahveh cando prenda lume en Exipto e sexan destruídos todos os seus axudantes. ⁹ Naquel tempo sairán diante de min mensaxeiros en naves para espantar á confiada Etiopía, e a anguria virá sobre eles coma no día de Exipto, porque velaí que vén. ¹⁰ Así di Iahveh o Señor: "Destruirei as riquezas de Exipto pola man de Nabucodonosor, rei de Babilonia." ¹¹ El e con el o seu pobo, os máis poderosos das nacións, serán traídos para destruír a terra; desenvaiñarán as súas espadas contra Exipto, e encherán a terra cos mortos. ¹² E farei que os ríos sequen, e entregarei a terra nas mans de malvados, e destruirei a terra e todo o que hai nela pola man de estranxeiros; Eu, Iahveh, falei. ¹³ Así di Iahveh o Señor: "Destruirei tamén os ídolos e destruirei as imaxes de Menfis; e non haberá máis príncipe da terra de Exipto; e porei temor na terra de Exipto. ¹⁴ Desolarei a Patros, prenderei lume en Zoán, e farei xuízos en Tebas. ¹⁵ E derramarei a miña ira sobre Sin, fortaleza de Exipto, e exterminarei a multitude de Tebas. ¹⁶ Hei prender lume en Exipto; e Sin terá grande dor, e Tebas será arrasada, e Menfis terá unha anguria constante. ¹⁷ Os mozos de Aven e de Pibeset morrerán a espada, e as mulleres serán levadas cativas. ¹⁸ E en Tafnes haberá escuridade no día en que Eu quebrante alí o poder de Exipto, e remate nela a soberbia do seu poder, as tebras cubrirana, e os habitantes das súas aldeas irán en cativeiro. ¹⁹ Así executarei os xuízos en Exipto, e coñecerán que Eu son Iahveh. ²⁰ E aconteceu que no ano undécimo, no primeiro mes, no sétimo día do mes, veu a min a palabra de Iahveh, dicindo: ²¹ Fillo de home, quebrei o brazo de Faraón, rei de Exipto; e velaí, non o vendaron aplicando remedios, nin foi atado con vendaxe nin inmobilizado con táboas para que solde a fractura e poida soster a espada. ²² Por tanto, así di Iahveh o Señor: "Velaí, eu estou contra Faraón, rei de Exipto, quebrarei os seus brazos, tanto o forte coma o fracturado, e farei caer a espada da súa man. ²³ E esparexerei os exipcios entre as nacións, e dispersareinos polas terras. ²⁴ E fortalecerei os brazos do rei de Babilonia, e porei a miña espada na súa man; pero quebrarei os brazos de Faraón, e el xemerá diante del con xemidos de ferido de morte. ²⁵ Si, hei fortalecer os brazos do rei de Babilonia, e os brazos de Faraón caerán; e coñecerán que Eu son Iahveh cando poña a miña espada na man do rei de Babilonia, e el a estenda contra a terra de Exipto. ²⁶ E esparexerei os exipcios entre as nacións e dispersareinos polas terras; e saberán que Eu son Iahveh.