¹ Veu a min a palabra de Iahveh, dicindo: ² Ti, fillo de home, levanta lamentación sobre Tiro. ³ E dirás a Tiro, que está situada á beira do mar, a que negocia cos pobos de moitas costas: así di Iahveh o Señor: Tiro, ti dixeches: eu son perfecta en fermosura. ⁴ Os teus confíns están no corazón dos mares; os teus armadores completaron a túa beleza. ⁵ Con cipreses do monte Senir fabricáronche todo o teu casco; escolleron cedros do Libán para facerche o mastro. ⁶ Dos carballos de Basán fixeron os teus remos, a túa cuberta con madeira de buxo das costas de Quitim, con incrustes de marfil. ⁷ De liño fino bordado de Exipto era a túa vela para que te servise de estandarte; de azul e púrpura das costas de Elisa era o teu pavillón. ⁸ Os habitantes de Sidón e de Arvad foron os teus remeiros; os expertos, Tiro, estaban en ti; eles eran os teus patróns. ⁹ Os anciáns de Gebal e os seus obreiros máis hábiles taparon as túas xuntas. Tódolos navíos e os seus mariñeiros traficaban contigo. ¹⁰ Os persas, os de Lud e os de Fut servían no teu exército, como guerreiros teus; penduraron en ti escudos e cascos, eles déronche o teu esplendor. ¹¹ Os fillos de Arvad e Ielec defendían os muros ao teu arredor, e os de Gamadim estaban nos teus baluartes, e penduraron os seus escudos arredor dos teus muros completando a túa fermosura. ¹² Tarsis negociaba contigo pola abundancia de tódalas túas riquezas; con prata, ferro, estaño e chumbo traficaba nas túas feiras. ¹³ Iaván, Tubal e Mesec traficaban contigo, con escravos e con utensilios de bronce traficaban nas túas feiras. ¹⁴ Os da casa de Togarmá cambiaban as túas mercadorías por cabalos, corceis e mulas. ¹⁵ Os fillos de Dedan traficaban contigo, e moitas costas levaban mercadorías da túa man, e tributábanche cabeiros de marfil e madeiras de ébano. ¹⁶ Edom traficaba contigo porque tiñas productos dabondo; con perlas, púrpura, vestidos bordados, liño fino, corais e rubís viña ás túas feiras. ¹⁷ Tamén Xudá e a terra de Israel traficaban contigo; dábanche polas túas mercadorías o trigo de Minit e de Panag, e o mel, o aceite e a resina. ¹⁸ Damasco traficaba contigo pola abundancia dos teus produtos e pola abundancia de toda riqueza; negociaban contigo con viño de Helbón e a máis branca lá. ¹⁹ Dan e o errante Iaván viñan ás túas feiras para comerciar na túa praza con ferro labrado, mirra destilada e cana aromática. ²⁰ Dedan comerciaba contigo coas mantas de montar. ²¹ Aínda Arabia e tódolos príncipes de Cedar traficaban contigo con años, carneiros e castróns; estes eran os teus comerciantes. ²² Os comerciantes de Sheba e de Raama eran tamén os teus comerciantes; viñan ás túas feiras co mellor bálsamo, e con toda clase de pedras preciosas, e ouro. ²³ Harán, Cane, Edén e os comerciantes de Sheba, de Asiria e de Quilmad negociaban contigo. ²⁴ Traficaban contigo con tecidos finos, mantos de azul e bordados, e caixas de roupas preciosas, enredadas con cordóns e ben aseguradas; en todo isto traficaban contigo. ²⁵ As naves de Tarsis eran coma largas caravanas que levaban as túas mercadorías, e así chegaches a ser opulenta e te multiplicaches grandemente no corazón dos mares. ²⁶ Os teus remeiros conducíante entre as moitas augas, ata que o vento do leste quebrantoute no medio dos mares, ²⁷ coas túas riquezas, as túas mercadorías e os teus bens, cos teus remeiros, os teus capitáns, e os que tapan as túa xuntas, con todos os oficiais dos teus negocios, e todos os teus homes de guerra. E toda aquela xente que estaba contigo e que caeu no medio dos mares no día da túa destrución. ²⁸ Ao berro estrondoso dos teus mariñeiros, as costas tremeron. ²⁹ E todos os que empuñaban os remos, e os mariñeiros e os patróns do mar, todos saltaron das súas naves para quedar en terra. ³⁰ Farei que se escoiten a súas voces chorando amargamente por ti, e espallarán po sobre as súas cabezas, e envorcaranse en cinza. ³¹ Por ti raparanse o cabelo da súa cabeza, cinguiranse de cilicio, e laiaranse por ti con amargos lamentos, con amargura da alma. ³² E levantarán sobre ti cantos fúnebres, e lamentarán por ti, dicindo: quen é coma Tiro, fortificada no medio do mar? ³³ Cando as túas mercadorías saían dos barcos, saciabas a moitos pobos; enriqueciches aos reis da terra coa multitude das túas riquezas e do teu comercio. ³⁴ Agora, quebrantada polo mar, na profundidade das augas, coas túas mercancías e toda a tripulación caída no medio de ti, ³⁵ Todos os habitantes das costas quedarán abraiados pola túa causa, e os seus reis tremerán de terror; e os seus rostros quedarán abatidos. ³⁶ Os comerciantes de entre os pobos asubiarán cheos de asombro, e virás ser un espanto, e para sempre deixarás de ser.