¹ Veu a min a palabra de Iahveh, dicindo: ² -Fillo de home, había dúas mulleres, fillas dunha mesma nai, ³ e prostituíronse en Exipto; fornicaron na súa mocidade; alí deixáronse apertar os seus seos, alí acariciaron os seus peitos virxinais. ⁴ O nome da maior era Ahola, e o nome da súa irmá, Aholibá. Despois chegaron a ser miñas e deron a luz fillos e fillas. E os seus nomes foron: Samaria é Ahola; e Xerusalém, Aholibá. ⁵ E Ahola, sendo miña, prostituíuse namorándose dos seus amantes, os asirios: ⁶ guerreiros vestidos de púrpura, gobernadores e comandantes, mozos cobizosos todos eles, xinetes que montaban cabalos. ⁷ E ela prostituíuse con eles, con todos os máis escollidos dos fillos dos asirios, e contaminouse con todos os ídolos de todos aqueles dos que namorou. ⁸ E non deixou de fornicar cos exipcios, que na súa mocidade deitaran con ela acariñando os seus peitos virxinais e vertendo nela a súa luxuria. ⁹ Por iso entregueina na man dos seus amantes, na man dos fillos dos asirios, aqueles polos que ela ansiaba. ¹⁰ Eles descubriron a súa nudez, arrebatáronlle os seus fillos e as súas fillas, e matárona a espada; e chegou a ser famosa entre as mulleres, por como a escarneceron. ¹¹ E a súa irmá Aholibá viuno, toleou de luxuria aínda máis ca ela, e as súas fornicacións foron maiores que as fornicacións da súa irmá. ¹² Namorouse dos fillos dos asirios, os seus veciños, gobernadores e comandantes, vestidos con roupas excelentes, xinetes que ían a cabalo, todos eles mozos codiciables. ¹³ E vin que se contaminaba: as dúas ían polo mesmo mesmo camiño. ¹⁴ E ela aumentou as súas fornicacións; pois cando viu a homes pintados no muro, imaxes de caldeos pintados de moitas cores, ¹⁵ cinguidos polos seus lombos con talabartes, e turbantes de moitas cores sobre as súas cabezas, tendo todos eles a aparencia de capitáns, coma os homes de Babilonia, nados en Caldea. ¹⁶ E namorouse deles tan pronto como os viu, e mandoulles mensaxeiros á terra dos caldeos. ¹⁷ Así que os homes de Babilonia achegáronse a ela no seu leito de amor e contaminárona coas súas fornicacións, pero tan pronto como foi deshonrada, a súa alma deixou de amalos. ¹⁸ Así deixou ver as súas fornicacións e ela descubriu a súa nudez; polo que eu tamén me cansei dela, xa como a miña alma se tivera cansado da súa irmá. ¹⁹ Pero ela aínda multiplicou as súas fornicacións, lembrando os días da súa mocidade, nos que fornicara na terra de Exipto. ²⁰ Ardeu en desexo polos seus amantes, que teñen falo de burros e exaculan coma cabalos. ²¹ Deste modo repetiches unha vez máis a luxuria da túa mocidade, cando os exipcios acariñaban os teus seos, e apalpaban os tus peitos mozos. ²² Por tanto, Aholib, así di Iahveh o Señor: "Velaquí, Eu espertarei contra ti os teus amantes, dos que a túa alma se afastou, e fareinos vir contra ti de todas as partes; ²³ os de Babilonia e todos os caldeos, os de Pecod, Soa e Coa, e todos os asirios con eles: mozos desexables, gobernadores e comandantes, notables e homes de renome, todos a cabalo. ²⁴ Virán contra ti con exércitos e carros, e con multitude de pobos; poranse contra ti en formación con escudos, paveses e cascos, e Eu encargareilles que te xulguen de acordo os seus costumes. ²⁵ E porei o meu celo contra ti, e actuarán contigo con ira; quitaranche o teu nariz e as túas orellas, e o que quede de ti morrerá a espada. Arrebatarán os teus fillos e as túas fillas, e o teu remanente será consumido polo lume. ²⁶ Despoxarante das túas roupas e quitaranche todos os adornos da túa fermosura. ²⁷ Deste xeito farei que remate a túa luxuria e as túas prostitucións que trouxeches de Exipto, de xeito que non mires máis para eles nin te lembres máis de Exipto. ²⁸ Porque así di Iahveh o Señor: "Velaquí, Eu entrégote na man daqueles que aborreces, na man daqueles de quen a túa alma se desgustou. ²⁹ Eles han te tratar cheos de odio, e quitaranche todo o froito do que traballaches, e deixarante núa e sen nada, e quedará descuberta a inmundicia das túas fornicacións, da túa luxuria e da túa prostitución. ³⁰ Faránche estas cousas porque fornicaches tras dos pobos, e te contaminaches cos seus ídolos. ³¹ Porque andaches no camiño da túa irmá. Polo tanto, Eu porei a súa copa na túa man. ³² Así di Iahveh o Señor: "Beberás da copa profunda e ancha da túa irmá. As nacións hanse burlar de ti e escarnecerante. ³³ Chegarás a estar bébeda de dor. Copa de soidade e desolación é a copa da tua irmá Samaria. ³⁴ Si, ti beberala ata esgotala, e lamberás as borras e rasgarás os teus peitos; porque Eu falei, di Iahveh o Señor. ³⁵ Por tanto, así di Iahveh o Señor: Xa que te esqueciches de min e me botaches detrás das túas costas, carga ti mesma a túa luxuria e as túas fornicacións! ³⁶ E dixome Iahveh: -Fillo de home, non xulgarás ti a Ahola e a Aholibá? Entón decláralles as súas abominacións! ³⁷ Porque cometeron adulterio e hai sangue nas súas mans, e fornicaron cos seus ídolos; e aínda os seus fillos que me deron a luz, queimáronos, facéndoos pasar polo lume. ³⁸ E aínda engadiron algo máis: contaminaron o meu santuario nese mesmo día e profanaron os meus días de repouso. ³⁹ Pois despois de teren sacrificado os seus fillos aos seus ídolos, naquel mesmo día entraron no meu santuario para contaminalo; iso foi o que fixeron na miña casa! ⁴⁰ Tamén mandaches por homes que viñeran de lonxe, mandábaslles mensaxeiro, e axiña viñan. Por amor a eles lavácheste, pintaches os teus ollos e ataviácheste cos teus enfeites, ⁴¹ repousaches nun leito ben pomposo, diante del foi preparada unha mesa; e sobre ela puxeches o meu incenso e o meu aceite. ⁴² E sentíase alí o balbordo da multitude que se entretía con ela; eran moitos homes, bébedos, traídos do deserto, que lles poñían brazaletes nos brazos e fermosas coroas sobre ámbalas dúas cabezas. ⁴³ E dixen da que era consumida en adulterios: - Agora ela segue entregándose ás súas prostitucións. ⁴⁴ Porque viñérona buscar como quen anda atrás dunha prostituta. Así viñeron a buscar a estas mulleres depravadas, Ahola e a Aholibá. ⁴⁵ Mais os xustos xulgaranas segundo a lei das adúlteras e pola lei das que derraman sangue; porque son adúlteras e hai sangue nas súas mans. ⁴⁶ Por iso, así di Iahveh o Señor: Érganse multitudes contra delas, e sexan entregadas ao espanto e o saqueo! ⁴⁷ E as turbas acantazaranas con pedras, e traspasaranas coas súas espadas. Matarán os seus fillos e as súas fillas, e consumirán as súas casas con lume. ⁴⁸ E farei cesar tan detestable lascivia na terra, e tódalas mulleres escarmentarán, polo que xamais farán conforme a vosa detestable lascivia. ⁴⁹ E porán sobre vós as vosas execrables lascivias, e cargaredes cos pecados das vosas idolatrías; e saberedes que Eu son Iahveh o Señor.