¹ Cando entredes na terra que Iahveh o teu Deus che dá por herdanza e tomes posesión dela e vivas alí, ² collerás as primicias de todos os froitos que recollas da terra que Iahveh o teu Deus che dá, e poralas nunha cesta e irás ao lugar que Iahveh o teu Deus escolla para establecer alí o seu nome. ³ Irás onda o sacerdote que estea de servicio naqueles días e diraslle: declaro hoxe diante de Iahveh o meu Deus, que entrei na terra que Iahveh xurou aos nosos pais que daría. ⁴ O sacerdote collerá a cesta da túa man e colocaráa diante do altar de Iahveh, o teu Deus. ⁵ E contestarás e dirás diante de Iahveh, o teu Deus: o meu pai foi un arameo errante que baixou a Exipto con moi poucos homes e viviu alí, mais chegou a ser un pobo grande, forte e numeroso. ⁶ Pero os exipcios maltratáronnos, oprimíronnos e impuxéronnos cruel servidume. ⁷ Entón clamamos a Iahveh, o Deus dos nosos pais e Iahveh escoitou a nosa voz e viu a nosa aflición, o noso traballo e a nosa opresión. ⁸ E Iahveh sacounos de Exipto coa súa man forte e o seu brazo estendido, con grande terror, sinais e milagres ⁹ e tróuxonos a este lugar e deunos a terra, unha terra na que mana leite e mel. ¹⁰ Agora, velaí que trouxen a este lugar as primicias dos froitos da terra que ti, iahveh, me deches". Entón poralas diante de Iahveh, o teu Deus, e adorarás diante de Iahveh, o teu Deus. ¹¹ E has alegrarte, ti e mais o levita e o estranxeiro que estea no meio de ti por todo o ben que Iahveh, o teu Deus, che deu a ti e a túa casa. ¹² E cando remates de dar todo o décimo das túas colleitas no terceiro ano, ano do décimo, entón darás ao levita, ao forasteiro, ao orfo e á viuva para que poidan comer nas túas cidades ata que fartaren. ¹³ E dirás diante de Iahevh, o teu Deus: saquei da miña casa a parte consagrada e xa lla dei ao levita, ao estranxeiro, ao orfo e á viuva conforme aos mandamentos que ti me mandaches, non transgredín ningún dos teus mandamentos nin os esquecín. ¹⁴ Non comín dela cando estaba de loito, nin collín dela mentres era inmundo, nin lle ofrecín parte aos mortos. Escoitei a voz de Iahveh, o meu Deus, e fixen conforme a todo o que me mandaches. ¹⁵ Mira dende a túa morada santa, dende os ceos, e bendice ao teu pobo Israel e a terra que nos deches, unha terra na que mana leite e mel, como xuraches aos nosos pais. ¹⁶ Iahevh, o teu Deus, mándache hoxe que cumpras estes preceptos e decretos. Terás coidado de cumprilos con todo o teu corazón e con toda a túa alma. ¹⁷ Hoxe declaraches solemnemente que Iahveh é o teu Deus, que andarás nos seus camiños e que gardarás os seus preceptos, os seus mandamentos e os seus decretos, e que escoitarás a súa voz. ¹⁸ E Iahveh declarou hoxe que ti es o seu pobo, o seu tesouro especial, como El prometeu, e que debes de gardar todos os seus mandamentos, ¹⁹ El porate en alto sobre todas as nacións que creou para gabanza, renome e honra, e serás un pobo consagrado a Iahveh, o teu Deus, tal como prometeu.