¹ Cando alguén toma a unha muller, casa con ela e resulta que non lle é agradable porque atopou algo reprobable nela, poderá escribir unha carta de divorcio, darlla na man e despedila da súa casa. ² Cando ela marche da casa del poderá ir e ser doutro home. ³ Se o segundo home tamén a aborrece e escríbelle carta de divorcio, dálla na man e a despídea da súa casa, ou este último home morre, ⁴ non lle estará permitido volver casar con ela ao primeiro marido, logo de se contaminar, pois sería abominable aos ollos de Iahveh, e non farás que se corrompa a terra que Iahveh o teu Deus che dá por herdanza. ⁵ Cando un home estea recén casado, non irá ao exército ni se lle imporá ningún deber. Quedará libre na súa casa por un ano para facer feliz á muller coa que casou. ⁶ Ningún tomará por prenda o muiño ou a pedra de moer**moa** porque sería tomar como prenda a propia vida. ⁷ Se se descobre a un home que teña secuestrado a alguén dos seus irmáns israelitas e trátao con violencia ou véndeo, entón ese ladrón morrerá. Así quitarás o mal de medio de ti. ⁸ En canto á infección da gafura, ten conta de observares dilixentemente e actúa de acordo con todo o que os sacerdotes levitas vos ensinen. Como lles teño mandado, asi coidarás de facer. ⁹ Lembra o que Iahveh o teu Deus fixo a Miram no camiño, cando saístes de Exipto. ¹⁰ Cando emprestes calquera cousa ao teu próximo, non irás á súa casa para collerlla como fianza. ¹¹ Quedarás fóra, e o home a quen fixeches o préstamo traerache a fianza. ¹² E se é un home pobre non te deitarás retendo aínda a súa fianza. ¹³ Has devolver por enteiro a fianza antes de poñerse o sol, para que durma coas súa roupa e te bendiga; e para ti será unha obra xusta diante de Iahveh o teu Deus. ¹⁴ Non oprimirás ao xornaleiro pobre e ao necesitado, ben sexa alguén do teu pobo ou un dos estranxeiros que vive na túa terra e nas túas cidades. ¹⁵ Daraslle o seu salario o mesmo día antes de que se poña o sol porque é pobre e puxo niso o seu corazón, non sexa que clame contra ti a Iahveh e sexa pecado para ti. ¹⁶ Os pais non morrrerán polos seus fillos nin os fillos morirán polos seus pais. Cada un morrerá polo seu pecado. ¹⁷ Non has torcer a xustiza debida ao forasteiro nin ao orfo, nin tomarás en prenda a roupa da viúva, ¹⁸ senón que lembrarás que fuches escravo en Exipto e que Iahveh o teu Deus rescatoute, polo tanto, eu mándoche que fagas isto. ¹⁹ Cando segues a túa més no teu campo e esquezas algunha gavela no campo, non regresarás a recollela; será para o forasteiro, para o orfo e para a viúva, para que Iahveh o teu Deus bendiga todo canto fagas. ²⁰ Cando sacudas as túas oliveiras, non has repasalas despois, serán para o forasteiro, para o orfo e para a viúva. ²¹ Cando recollas o froito da túa viña, non a rebuscarás, será para o forasteiro, para o orfo e para a viúva. ²² Lembra que ti fuches escravo na terra de Exipto; polo tanto, eu mándoche que fagas isto.