¹ Así que se resucitastes con Cristo, buscade as cousas de arriba onde Cristo está sentado á dereita de Deus. ² Centrádevos nas cousas de arriba, e non nas da terra. ³ Vós morrestes, e a vosa vida está oculta con Cristo en Deus. ⁴ Cando Cristo, a vosa vida, se manifeste, entón vós tamén seredes presentados xunto con El en gloria. ⁵ Sendo isto así, tede en conta os vosos corpos e facede morrer neles toda a inmoralidade sexual, a impureza, as paixóns, os malos desexos, e a avaricia, que é idolatría. ⁶ Por estas cousas é que vén a ira de Deus sobre os fillos de desobediencia. ⁷ Nestas cousas andastes vós antes cando viviades nelas. ⁸ Mais agora tendes que desfacervos de todas estas cousas: ira, xenreira, malas intencións, insultos, e palabras obscenas das vosas bocas. ⁹ Non mintades uns aos outros , xa que vos desfixestes da vosa vella natureza cos seus malos costumes, ¹⁰ e vos vestistes da nova natureza que vos vai renovando cara un verdadeiro coñecemento, de acordo á imaxe de Aquel que a creou, ¹¹ onde non hai grego nin xudeu, circuncisión nin incircuncisión, bárbaro, escita, escravo ou libre, senón que Cristo é todo e está en todos. ¹² Entón, como escollidos de Deus, santos e amados, vestídevos de compaixón e misericordia, de bondade, humildade, sede mansos e pacientes, ¹³ soportándovos e perdoándovos uns aos outros, se algún ten algunha queixa en contra doutro; perdoade como Cristo vos perdoou. ¹⁴ E por riba de todo isto, vestídevos de amor, que é o que vos une. ¹⁵ E que a paz de Cristo goberne nos vosos corazóns, esa paz pola que fostes chamados nun só corpo, e sede agradecidos. ¹⁶ Deixade que a palabra de Cristo viva en vós en abundacia, ensinádevos e amoestádevos con toda sabedoría uns aos outros con salmos, himnos e cantigas espirituais, cantando a Deus con acción de grazas nos vosos corazóns. ¹⁷ E calquera cousa que fagades, por palabras ou por feitos, facédeo todo no nome do Señor Xesús, dando grazas a Deus o Pai por medio del. ¹⁸ Mulleres, estade suxeitas aos vosos maridos, como convén no Señor. ¹⁹ Maridos, amade as vosas mulleres e non as amarguedes. ²⁰ Fillos, obedecede os vosos pais en todo, porque isto é o que lle agrada ao Señor. ²¹ Pais, non fagades que os vosos fillos se anoxen sen ter motivo para que non se desanimen. ²² Servos, obecedede en todo os vosos señores na terra, non para serdes vistos, como os que queren compracer os demais, senón con sinceridade de corazón, temendo ao Señor. ²³ E todo o que fagades, facédeo de corazón, como para o Señor e non para as persoas, ²⁴ sabendo que recibiredes a recompensa da herdanza. Vós servides a Cristo Xesús. ²⁵ Porque todo o que fai inxustiza, sufrirá as consecuencias desa inxustiza, sen acepción de persoas.