¹ Pois quero que saibades a loita tan grande que teño por vós e polos que están en Laodicea, e por todos os que non me viron persoalmente. ² Eu traballo para que os seus corazóns sexan alentados e unidos en amor, e acaden tódalas riquezas que veñen dunha plena seguridade de entendemento, resultando nun verdadeiro coñecemento do misterio de Deus, é dicir, de Cristo; ³ en quen están todos os tesouros da sabedoría e do coñecemento. ⁴ Isto dígovolo para que ninguén vos engane con razoamentos persuasivos. ⁵ Porque mesmo que estou lonxe de vós no corpo, estou con vós en espírito, alegrándome de ver a vosa boa disciplina e a estabilidade da vosa fe en Cristo. ⁶ E así como recibistes ao Señor Xesús, o Mesías, camiñade como El; ⁷ firmemente enraizados e edificados nel e confirmados na vosa fe, tal e como fostes ensinados, revertendo de gratitude. ⁸ Mirade que ninguén vos cative con filosofías e especulacións baleiras, segundo as tradicións humanas, conforme aos principios fundamentais deste mundo e non segundo Cristo. ⁹ Porque nel reside corporalmente toda a plenitude da Deidade. ¹⁰ E vós estades completos nel, que é a cabeza sobre todo poder e autoridade; ¹¹ nel tamén fostes circuncidados non cunha circuncisión feita por mans de homes, senón quitando o corpo da carne mediante a circuncisión de Cristo; ¹² sepultados con El no bautismo, no que tamén resucitastes con El pola fe na acción do poder de Deus, que o resucitou de entre os mortos. ¹³ E cando estabades mortos nos vosos pecados e na incircuncisión da vosa carne, deuvos vida xuntamente con El, perdoándonos todos os pecados; ¹⁴ tendo anulado o documento con todos os decretos que había en contra de nós, ¹⁵ botándoo fóra e cravándoo na cruz. Despoxando os gobernos e autoridades, fixo deles un espectáculo público, triunfando sobre eles por medio del. ¹⁶ Así que ninguén vos xulgue polo que comedes ou bebedes, ou polo día de festa, ou pola lúa nova, ou polo día de repouso; ¹⁷ cousas que só son sombras do que vai vir, pero o corpo pertence a Cristo. ¹⁸ Que ninguén vos prive do premio na súa falsa humildade e na adoración dos anxos, baseándose en visións que tivo, envaidecido pola súa mente carnal, ¹⁹ mais non suxeitándose á cabeza, pola que todo o corpo, alimentado e unido polas xuntas e tendóns, medra cun crecemento que é de Deus. ²⁰ Se morrestes aos principios do mundo con Cristo; por que, como se aínda vivírades no mundo, vos sometedes aos preceptos como: ²¹ non toques, non gustes, non apalpes? ²² (Todo isto refírese a cousas destinadas a desfacerse co uso), segundo os preceptos e ensinanzas de persoas. ²³ Tales cousas teñen de verdade a aparencia de sabedoría nunha relixión humana, na humildade e no maltrato do corpo, mais non teñen valor algún contra os apetitos da carne.