¹ No seu tempo, Nabucodonosor, rei de Babilonia, subiu a Xerusalém. E Ioacim foi o seu servo por tres anos, pero despois cambiou de xeito de pensar e rebelouse en contra del. ² Entón Iahveh mandou contra Ioacim bandas de caldeos, de sirios, de moabitas e de amonitas. Mandounos contra Xudá para destruíla, conforme a palabra de Iahveh que falara por medio dos seus servos os profetas. ³ Certamente isto aconteceu sobre Xudá pola palabra de Iahveh para quitalo da súa presenza, por mor dos pecados de Manasés con todo o que el fixera; ⁴ e tamén polo sangue inocente que derramara, pois encheu Xerusalém con sangue inocente; e Iahveh non quixo perdoalo. ⁵ O resto dos feitos de Ioacim, e todo o que fixo, non está escrito no libro das Crónicas dos reis de Xudá? ⁶ E Ioacim durmiu cos seus pais, e reinou o seu fillo Ioaquim no seu lugar. ⁷ E o rei de Exipto non saíu máis da súa terra, porque o rei de Babilonia conquistou todo o que lle pertencía, dende o río de Exipto ata o río Éufrates. ⁸ Ioaquim tiña dezaoito anos cando comezou a reinar, e reinou tres meses en Xerusalém. A súa nai chamábase Nehusta, filla de Elnatán de Xerusalém. ⁹ E fixo o que era malo aos ollos de Iahveh, conforme todo o que fixera o seu pai. ¹⁰ Naquel tempo os servos de Nabucodonosor, rei de Babilonia, subiron contra Xerusalém, e a cidade foi sitiada. ¹¹ Tamén Nabucodonosor, rei de Babilonia, veu contra a cidade cando os seus servos a sitiaban. ¹² Entón Ioaquím, rei de Xudá, rendiuse ao rei de Babilonia, el e a súa nai, os seus servos, os seus príncipes e os seus oficiais; e o rei de Babilonia prendeuno no ano oitavo do seu reino. ¹³ E sacou de alí todos os tesouros da casa de Iahveh e os tesouros da casa real, e partiu en anacos todos os utensilios de ouro que Salomón, rei de Israel, fixera na casa de Iahveh, tal como falara Iahveh. ¹⁴ E levou en cativerio a toda Xerusalém, a tódolos príncipes e a tódolos homes valentes: dez mil prisioneiros, e a tódolos artesáns e forxadores; non quedou ninguén, agás os máis pobres do pobo da terra. ¹⁵ Tamén levou cativo a Babilonia a Ioaquim, e á nai do rei, e ás mulleres do rei, aos seus oficiais e aos poderosos do país; levounos cativos dende Xerusalém a Babilonia. ¹⁶ E a tódolos homes de guerra, sete mil, e aos artesáns e forxadores, mil, e a tódolos valentes guerreiros. O rei de Babilonia levounos cativos a todos. ¹⁷ E o rei de Babilonia puxo por rei a Matanías, o seu parente, no lugar de Ioaquím, e mudou o seu nome para chamalo Sedequías. ¹⁸ Sedequías tiña vinte un anos cando comezou a reinar, e reinou once anos en Xerusalém. A súa nai chamábase Hamutal, filla de Xeremías de Libna. ¹⁹ E fixo o malo aos ollos de Iahveh, conforme todo o que fixera Ioacim. ²⁰ E porque veu a ira de Iahveh contra Xerusalém e Xudá para botalos da súa presenza, Sedequías rebelouse contra o rei de Babilonia.