¹ Non reprendas o ancián, senón exhórtao coma a un pai; os mozos coma a irmáns; ² as anciás, coma a nais; as máis mozas, coma a irmás, con toda pureza. ³ Honra as viúvas que o son de verdade; ⁴ pero se hai algunha viúva que ten fillos ou netos, que aprendan primeiro estes a ser piadosos coa súa propia familia, e a corresponderlle aos seus pais, porque isto é agradable diante de Deus. ⁵ Agora ben, a que é viúva de verdade, aquela que quedou desamparada, ten posta a súa esperanza en Deus, e persevera nas súplicas e nas oracións noite e día; ⁶ pero aquela que se bota aos placeres, xa está morta en vida. ⁷ Manda tamén estas cousas para que sexan irreprensibles, ⁸ porque se algún non coida dos seus, e maiormente dos da súa familia, é peor ca un non crente e arrenegou da fe. ⁹ Inclúe na lista á viúva non menor de sesenta anos, muller dun só marido, ¹⁰ aprobada polas boas obras: se criou fillos, se foi hospitalaria, se lavou os pés dos santos, se axudou os aflixidos, e se adicou a toda boa obra. ¹¹ Pero non inscribas as viúvas máis novas, porque cando son impulsadas pola paixón, desexan casar, afastándose do Mesías, ¹² expoñéndose a seren acusadas por quebrantar a primeira promesa, ¹³ e aprenden a ser preguiceiras, indo de casa en casa; e non só preguiceiras, senón tamén laretas e baralleiras, falando de cousas que non deben. ¹⁴ Polo tanto, desexo que as máis mozas casen, críen fillos e gobernen ben a súa casa, non dando ao adversario ningunha oportunidade de maldicir; ¹⁵ porque algunhas xa se extraviaron seguindo a Satanás. ¹⁶ Se algunha crente ten viúvas, que as asista, de xeito que a igrexa non sexa gravada para poderen axudar as que realmente son viúvas. ¹⁷ Os anciáns que guían dun xeito apropiado, son dignos de dobre honor, especialmente os que traballan duro na palabra e no ensino. ¹⁸ Porque a Escritura di: "Non porás bozo ao boi que trilla", e: "O obreiro ten dereito ao seu xornal". ¹⁹ Contra un ancián non permitas acusación, agás na presenza de dúas ou tres testemuñas. ²⁰ A aqueles que sigan pecando, repréndeos diante de todos, para que tamén os demais teñan temor. ²¹ Pídoche de corazón diante de Deus, e de Cristo Xesús e máis dos anxos escolleitos, que obedezas estes consellos sen prexuízos, e sen facer nada con parcialidade. ²² Non impoñas as mans deseguida nin te fagas cómplice de pecados alleos; consérvate puro. ²³ Xa non bebas auga, senón un pouco de viño por mor do teu estómago e das túas frecuentes doenzas. ²⁴ Os pecados dalgunhas persoas maniféstanse antes do xuízo, mentres que os doutros están a seguilos en verdade. ²⁵ Do mesmo xeito, as boas obras son evidentes, e as que non o son, non se poden agachar.