¹ Pero o Espírito fala claramente que nos tempos derradeiros algúns se afastarán da fe, escoitando a espíritos mentireiros e a doutrinas de demos, ² pola hipocrisía de argallantes que foron cauterizados na súa mesma conciencia; ³ estes prohiben casar e mandan privarse de alimentos que Deus creou para que, dando grazas, os crentes, aqueles que coñeceron a verdade por completo, poidan participar deles. ⁴ Porque todo o que Deus creou é bo, e non se debe rexeitar en absoluto cando se toma con gratitude, ⁵ pois é santificado por medio da palabra de Deus e da oración. ⁶ Propoñéndolles estas cousas aos irmáns, serás un bo servo de Cristo Xesús, alimentado coas palabras da fe e da boa doutrina que seguiches de preto. ⁷ Rexeita as fábulas profanas e os contos de vellas; exercítate na piedade, ⁸ porque o exercicio do corpo para pouco aproveita, pero a piedade é útil para todo, tendo promesa para esta vida e para a que vén. ⁹ Esta palabra é fiel e digna de ser aceptada por todos. ¹⁰ Porque para isto traballamos arreo e loitamos, pois puxemos a esperanza no Deus vivo, que é o Salvador de tódalas persoas, maiormente das que cren. ¹¹ Non deixes de proclamar e ensinar estas cousas. ¹² Que ninguén faga pouco de ti por seres mozo, senón sé exemplo dos crentes na palabra, na conduta, no amor, na fe, e na pureza. ¹³ Ata que chegue aí, adícate á lectura, á exhortación e ao ensino. ¹⁴ Non descoides o don que hai en ti, que se che deu por medio da profecía coa imposición de mans de parte dos anciáns. ¹⁵ Medita sobre todas estas cousas, mantente nelas para que todos vexan o teu progreso. ¹⁶ Coida da doutrina e a ti mesmo, persiste en todas estas cousas; porque facéndoo, te salvarás ti e máis a aqueles que te escoitan.