¹ Palabra fiel é esta: se alguén ansía ocupar cargo de coidar os demáis, desexa a mellor obra. ² Pero cómpre que o supervisor sexa irreprensible, marido dunha soa muller, sobrio, asisado, decoroso, acolledor, didáctico, ³ non dado ao viño, non pelexador, senón amable, pacífico, sen avaricia, ⁴ que goberne ben os da súa propia familia, tendo os seus fillos en obediencia con todo respecto ⁵ ( pois se algún non ten coidado dos seus, como ha coidar a igrexa de Deus? ); ⁶ non un novo convertido, non sexa que ensoberbeza e caia no xuízo do demo. ⁷ Cómprelle ter un bo testemuño dos de fóra para que non caia en inxurias ou na rede do demo. ⁸ Así mesmo, os servidores, deben ser de palabra, sen dobrez, non dados a moito viño, nin apegados ás ganancias deshonestas, ⁹ que garden o misterio da fe cunha conciencia limpa. ¹⁰ Probádeos primeiro, e se son irreprensibles, que se poñan a servir. ¹¹ Así mesmo as mulleres, sexan honestas, non calumniadoras, sobrias, fieis en todo. ¹² Os servidores sexan maridos dunha soa muller, gobernando tamén os seus propios fillos. ¹³ Pois os que serviron excelentemente como servidores gañan para si unha excelente posición e moita confianza na fe que é en Cristo Xesús. ¹⁴ Escríboche estas cousas, agardando chegar pronto onda ti, ¹⁵ para que, se me retardo, teñas sabido como debe conducirse un na casa de Deus, que é a igrexa do Deus vivo, columna e alicerce da verdade. ¹⁶ E indiscutiblemente, grande é o misterio da piedade: "El manifestouse como home, xustificado no Espírito, visto polos anxos, proclamado entre os xentís, crido no mundo, recibido arriba na gloria".