¹ Xa que Cristo padeceu na carne, armádevos vós tamén co mesmo propósito, pois quen padeceu na carne terminou co pecado, ² para non vivir o tempo que lle queda na carne, nos desexos humanos, senón na vontade de Deus. ³ Porque o tempo pasado xa foi suficiente para terdes feito o que agrada aos xentís, andando en sensualidade, luxurias, borracheiras, orxías, esmorgas e idolatría abominable. ⁴ E así estráñanse ao veren que non andades con eles no mesmo desenfreno de vicios, e insúltanvos; ⁵ mais eles darán conta a Aquel que está preparado para xulgar a vivos e mortos. ⁶ Porque con esta fin foi proclamado o evanxeo aínda aos mortos, para que sendo xulgados segundo a carne como seres humanos, vivan no espírito segundo Deus. ⁷ Mais a fin de tódalas cousas está preto; sede pois prudentes e vixiantes nas oracións. ⁸ Sobre tódalas cousas, sede ferventes no voso amor os uns polos outros, xa que o amor cubre multitude de pecados. ⁹ Sede hospitalarios os uns para os outros, sen murmurar. ¹⁰ Como cada un de vós recibiu un don especial, usádeo servíndovos uns aos outros como bos administradores da multiforme graza inmerecida de Deus. ¹¹ O que fala, que fale conforme a palabra de Deus; o que sirve, que o faga pola fortaleza que Deus dá, para que en todo Deus sexa glorificado mediante Xesús Cristo, a quen pertence a gloria e o poder polos séculos dos séculos. Amén. ¹² Amados, non vos sorprendades polo lume da proba que saíu de en medio de vós para probarvos, coma se algunha cousa rara estivese a acontecer; ¹³ mais ben alegrádevos, na medida en que compartides os padecementos de Cristo, para que tamén na revelación da súa gloria relouquedes de ledicia. ¹⁴ Se sodes aldraxados polo nome de Cristo, benaventurados sodes, pois o espírito da gloria e de Deus repousa en vós. Certamente, por eles El é blasfemado, mais por vós é glorificado. ¹⁵ Pero que ningún de vós sufra como asasino, ou ladrón, ou malfeitor, ou por entremetido. ¹⁶ Mais se algún sufre como cristián, que non se avergoñe, senón que, como tal, glorifique a Deus. ¹⁷ Porque é tempo de que o xuízo comece pola casa de Deus; e se comeza primeiro por nós, cal será o fin dos que non obedecen o evanxeo de Deus? ¹⁸ E se o xusto se salva con dificultade, que será do impío e do pecador? ¹⁹ Por conseguinte, os que sofren conforme á vontade de Deus, encomenden as súas almas ao Creador, facendo o ben.