¹ Despois disto, aconteceu que David derrotou os filisteos e someteunos, e tomou Gat e as súas aldeas da man dos filisteos. ² Tamén derrotou a Moab, e os moabitas viñeron ser servos de David, traéndolle tributos. ³ David tamén derrotou a Hadad-Ezer, rei de Soba, preto de Hamat, cando este ía establecer o seu dominio xunto ao río Éufrates. ⁴ E David capturou del mil carros e sete mil homes de a cabalo e vinte mil homes de a pé; e David tronzou polos xarretes os cabalos de todos os carros, deixando só os cabalos para cen carros. ⁵ E cando os arameos de Damasco viñeron axudar a Hadadezer, rei de Soba, David matou vinte e dous mil homes dos sirios. ⁶ Entón David puxo gardas na Siria de Damasco; e os sirios foron os servos de David, traéndolle tributos. E Iahveh daba a victoria a David onde queira que fora. ⁷ E David colleu os escudos de ouro que tiñan os servos de Hadadezer, e tróuxoos a Xerusalém. ⁸ Así mesmo David colleu unha gran cantidade de bronce de Tibhat e de Cun, cidades de Hadad-Ezer; e Salomón fixo con el o mar de bronce, as columnas e todos os utensilios de bronce. ⁹ E soubo Tou, rei de Hamat, que David derrotara a todo o exército de Hadad-Ezer, rei de Soba. ¹⁰ Mandou o seu fillo Adoram ao rei David para saudalo e bendicilo porque Hadad-Ezer pelexara con el e o derrotara, pois Hadad-Ezer estivera en guerra con Tou. E regaloulle toda clase de obxectos de ouro, prata e bronce. ¹¹ Estes tamén os consagrou o rei David a Iahveh, xunto coa prata e o ouro que tomara de tódalas nacións: de Edom, de Moab, dos fillos de Amón, dos filisteos e de Amalec. ¹² E Abisai, fillo de Sarvia, derrotou a dezaoito mil edomitas no val do sal. ¹³ E puxo gardas en Edom, e todos os edomitas foron servos de David, porque Iahveh daba victoria a David onde queira que ía. ¹⁴ E David reinou sobre todo Israel, e administrou xustiza e xuízo a todo o seu pobo. ¹⁵ Ioab, fillo de Sarvia, era o xeneral do exército; e Iosafat, fillo de Ahilud, era o cronista; ¹⁶ e Sadoc, fillo de Ahitob, e Abimelec, fillo de Abiatar, eran os sacerdotes; e Savasá era o secretario; ¹⁷ e Benaías, fillo de Iohada, era o xefe dos cereteos e peleteos; e os fillos de David eran os príncipes ao lado do rei.