¹ Ngechi honi koku ka kala kuviana ava vali muli Kilistu Yesu. ² Muomu mashiko a Sipilitu ua muono muli Yesu Kilistu na natu vatula ku mashiko a milonga na kuthsa. ³ Vije koathele mashiko kupanga mukonda kakele na nzhili omo lia nthitu, Kalunga ua viathele. Ua tumine munendi umo lika muchifua cha muvila ua nthitu mukupua chikombelo cha milonga, ua vuanene milonga mu nthitu. ⁴ Ua vi pangele evi muku puitha mo mashiko kuli yetu, Etu kotue kuenda mu chifua cha nthitu, vuno tue kuenda mu chifua cha Spilitu. ⁵ Ava voshe vovokela munthitu va haka mana avo mu viuma via nthitu, vuno ava vovokela mu Spilitu va haka mana avo mu viuma via Spilitu. ⁶ Muomu a mana ova haka mu nthitu akeuo kuthsa, vuno mana ova haka mu Spilitu akeuo muono na chivovo. ⁷ Mana amu nthitu akala na vimpata kuli Kalunga, muomu kolie kuononoka kulishiko lia Kalunga, nambe kuatha kupanga ngocho kuahi. ⁸ Voshe vali mu nthitu kovatha kuya Kalunga ku mbunge. ⁹ Nambe ngocho, ove keti ua ku nthitu vunoni ua mu Spilitu, ambe Spilitu ya Kalunga yakala muli yove vuino vuino. Vuno nga umo ueni kethi na Spilitu ya Kilistu, ka tiamene kuli yendi. ¹⁰ Nga Spilitu ali muli yeni, muvila una thsi kushuama ku mulonga, Spilitu ali na muono kushuama ku vuchili. ¹¹ Nga Spilitu uendi uje ua hinduile Yesu kukuthsa ali muli yove, uje ua hinduile Kilistu kukuthsa aka hana muono lalo ku mivila yeni ya kuthsa kuhitila hali Spilitu, uje ali muli yeni. ¹² Keho honi, vamunanana, tuva ka makongo. Vuno keti nthitu yovokele ha nthitu nayi kuavo. ¹³ Mukonda ambe uovokela munthitu, ove uli muku thsa, vunoni nga uhaka Spilitu mu nthitu ya vilinga via kuthsa, ukovoka. ¹⁴ Mukonda vaje voshe voye ku tuamenena Spilitu ua Kalunga, ava vakevo vana va Kalunga. ¹⁵ Eni komua tambuile Spilitu ua vundungo linga mukale na liova lalo, vunoni mua tambula Spilitu, uje uo tue kulilila, "Abba", Tata. ¹⁶ Spilitu endi vavenia ua pua mbangi kuli Spilitu uetu nguavo etu vana va Kalunga. ¹⁷ Nga etu tu vana vaKalunga, keho netu lalo tu thisuana tha Kalunga. Etu tu thisuana thiva vandakana na Spilitu, ambe tuyanda hamo nendi linga netu vaka tu shangale hamo lika nendi. ¹⁸ Mukonda ange njivi thinganieka nguange aku kuyanda kua nthimbu yino kaka tuvakanene ku ketheketha na vumpahu ovuo vuva katu muetha. ¹⁹ Muomu liaku yongola ku tatelela kua kupanga na kutatelela kumuetha kua vana va Kalunga. ²⁰ Mukonda kutanga kua themenenene ku vungocho, vunoni keti ku chiyongola chavio, nkumani mukonda liendi ou uavi hakele ngocho, muku tatelela, ²¹ nguendi viakutanga avio vavenia vaka viamena muku vula vundungo, evi vika kovela mu vuovoke mu vumpahu ku vana va Kalunga. ²² Mukonda tuzhivuka nguetu vioshe via kutanga vili na ku teta mukonda lia kuvavala visho ngechi. ²³ Keti ovio lika, vunoni nambe yetu vavenia, etu tuli na vushuka vua chili vua kulivanga vua Spilitu, netu tuli, mukatati naku tatelela mu kama Kalunga aku tu puithe vana vendi, na ku kula mivila yetu. ²⁴ Muku thselela kuetu mukemuo mu tuovokela. Ngechi kuthselela kova mona keti kuthselela. Muomu yiya athselela evi via mona? ²⁵ Vuno nga kuthselela vije visha kanda tumone, tuvi tatelela naku kaniama. ²⁶ Mukemo lalo, Spilitu lalo ueku tuamena muvu theye vuetu. Omu mutu zhivuka vati tuna fuila kulomba, vunoni Spilitu vavenia ueku tu lombela kuli Kalunga na majui a kulila aje kotuatha kutumbula. ²⁷ Vunoni uje ueku tala muvimbunge vietu azhivuka mu via fua viyongola via Spilitu, mukonda Spilitu ueku kuatelamo kulombela kua vantu va Kalunga vaku jela kutuala muavi yonguela Kalunga. ²⁸ Tuzhivuka nguetu vaje voshe vayongola Kalunga, ueku panga vioshe via chili, kuvaje vamu yongola. Kuli vaje vene vova na thana ku chizhango chendi. ²⁹ Mukonda vaje va hanguile Kalunga vakevolalo va hanguile kuva puitha ngue munendi nguendi yikeye a pue munendi ua mbeli ha kati ka zhi ndualume voshe. ³⁰ Vunoni vaje voshe va thanene Kalunga, vaje va thanene, ovo navo ua va thambuethele. Vaje va thambuethele, avo navo uava shangalele. ³¹ Keho vika tuka handeka kutuala ku viuma evi? Ambe Kalunga ali netu, yiya atui manena? ³² Yikeye ka kohiela munendi vunoni yikeye aka muhana muku tu kuatelamo yetu, vati ajeneka lalo kuvutuka muku tu hana viuma vioshe? ³³ Yiya atha kuvangeya vaje vana hangula Kalunga? Kalunga ikeye muka kuva thambuetha. ³⁴ Iya cho umo atha kuvihitha? kanda Yesu Kilistu, uje ua thsile ayoya, uje ua hindukile uje ali ku livoko lia chilio lia Kalunga, muku tu handekela ko kuli Kalunga. ³⁵ Iya cho atha ku tu tunditha ku ngozhi ya Kilistu? Tuyando, vishoti, kuyandetha, njala, vuzhi, vushonde ndi mukuale? ³⁶ Ngue mua handeka mathona nguao, "Munganio yove etu vana tu thsihila mo matangua oshe. Vana tu puitha ngue zhinjui zhiya kuku zhi thsiha." ³⁷ Muli vioshe viuma evi yetu tuna tuvakana muli ikeye uje ua tu yongola yetu. ³⁸ Mukonda njina tava nguange nambe kuthsa, nambe muono, nambe tungelo, nambe nguvulu, nambe viahi viliho, nambe viahi vikeja, nambe vinzhili, ³⁹ nambe vulahe, nambe vulove, nambe nkala chuma cha ku tanga, viatha ku tu tepetha ku ngozhi ya Kalunga, uje ali muli Muene uetu Yesu Kilistu.