¹ Ndi muvi zhivuka, vamunanana (moumu nji kuania na vantu va zhivuka lishiko), ngue lishiko lishika muntu ku nkala nthimbu ya kuyoya kuendi? ² Muomu mukentu ua kuambata vana mu vandakana ku liala nthimbu a yoya, vuno honi ambe liala a thsa, vamu vutula ku mashiko a vulo. ³ Keho honi, nthimbu liala liendi a yoya, ambe akala na liala ueka, vaka muthana nguavo muka vupangala. Vuno honi, ambe liala a thsa, na vutuka ku mashiko, keho endi keti muka vupangala nambe akale na liala ueka. ⁴ Keho hani, va munanana, vami thsihila kumashiko kuhitila mumuvila ua Kilistu. Evi kulingila vami vandakane ku umo na mukuavo, ikeye uje, kuli kuli yauje uva hinduile kukuthsa, mungila yo tuima vushuka vua Kalunga. ⁵ Muomu mu tua kele munthsitu, viyongola via milonga vi lia hindula lishiko, via pangethele mbunga yetu linga yime vushuka vua kuthsa. ⁶ Vuno honi ngechi vana tu vutula ku lishiko. Tuna thsi kuli vije via tu vindikile. Evi linga tupangele muli Spilitu mua muha, keti lalo mumukanda ua laja. ⁷ Vika tuka kuania? Lishiko vavenia mulonga ndi? Keti mukemo. Vuno honi, mulonga nga konja zhivukile, ambe bga keti lia mashiko. Muomu nga konja zhivukile kuliveya noho ha akuania mashiko nguao, "Keti uliveyele." ⁸ Vuno honi mulonga ua kovelela mu lishiko na ku nehetha mulonga uoshe ua kuliveyela muli yange. Muomu ambe nga lishiko liahi, mulonga unathsi. ⁹ Kunthimbu yimo njovokele mukua jenekele lishiko, vuno hani muli neja lishiko, mulonga ua uanene muono, keho ange nja thsile. ¹⁰ Lishiko lije te nga lineha muono ku likelio lia njinehela kuthsa. ¹¹ Muomu mulonga ua uanene ngila mulishiko linga unjikuithe. Kuhitila mulishiko ua nji thsiha. ¹² Keho lishiko lia jela, na mashiko ao lalo ajela, atoka, achili. ¹³ Keho vije via kele via chili vi pua kuthsa kuli yange? Keti mukemo. Vuno mulonga, linga upue ku ulekesa ngue mulonga, ua neha kuthsa muli yange kuhitila muliavije via kele via chili, na kuhitila mulishiko mulonga uatha ku tuvakanena. ¹⁴ Muomu tuzhivuka nguetu lishiko lia kala ha Spilitu, vuno honi ange muka nthitu. Va nji landetha muvundungo ku milonga. ¹⁵ Muomu vinje kupanga, kunje ku vikuata vuino-vuino. Moumu vinji yongola kupanga, kunje ku vi panga, keho vinja jeneka kuyongola, nje ku vi panga. ¹⁶ Vuno honi amba njina panga vije kunja yonguele, nji kuatetha ko lishiko nguange lishiko lia chili. ¹⁷ Vuno ngechi keti yange lalo nje kuvipanga, vuno honi mulonga uje ua kala muli yange. ¹⁸ Muomu njina zhivuka nguange muli yange, kukuania nguavo munthitu yange, kumua kele via chili. Muomu kuli veyela vuchili kuli muli yange, vuno honi kunji viatha kuvi panga. ¹⁹ Muomu vuchili vuje vunji yongola, kunje ku vupanga, vuno vuno honi mulonga uje kunja yonguele, ukeuo unji panga. ²⁰ Ngechi honi ambe njipanga vinji na jeneka kuyongola kupanga, ngocho keti yange njivi panga vuno honi ni mulonga uje ua kala muli yange. ²¹ Keho, nji uana lishiko: Ambe nji yongola kupanga via chili, oho vene na mulonga uneja kuli yange. ²² Muomu nji jolela mu lishiko lia Kalunga na muntu ali mukati kange. ²³ Vuno honi njimona lishiko lia kuli thedha mu vantu vange. Likelio lie ku lipatana na lije lili mu mana ange. Vika nji tambula na kunji kuta na lishiko lia mulonga uje ua kala mu mitambela ya muvila uange. ²⁴ Ange nji muntu ua kayando! Yiya aka njamena ku muvila ou ua kuthsa? ²⁵ Vuno honi vishangala kuli Kalunga Tata kuhitila muli Yesu Kilistu Muene uetu! Keho honi, ange vavenia njipanga lishiko lia Kalunga Tata na mana ange. Vuno nambe ngocho, na nthitu njipanga lishiko lia mulonga.