¹ Keho vika vitu ka handeka honi? Tupukule mu mulonga linga kavumbi kalane ndi? ² Keti ngocho. Etu tua thsile mu mulonga, vati lalo tuovokela mo? ³ Kumu zhivuka ngueni vaje voshe va vengi vava mbuitikile muli Kilistu Yesu vava mbuitikile hamo nendi mu kuthsa kuendi? ⁴ Vatu shitikile nendi muva tu mbuitika ngue mu kuthsa kuendi. Ngue omo muva hinduile Yesu ku kuthsa mu vumpahu vua ishe, netu lalo tuatha kuenda mu muono ua uha. ⁵ Muomu amba tuna lifu nendi mu chifua cha kuthsa kuendi, mukemuo lalo muva ka tu vandakana hamo nendi na kuhinduka kuendi kuku thsa. ⁶ Evi tuvi zhivuka nguetu, vuntu vuetu vavu mbambeyele hamo nendi linga va vihitheho muvila ua mulonga. Evi mukemuo mo via kele linga keti tu kale mu vundungo vua mulonga. ⁷ Uoshe uje nathsi ikeye na thambua ku milonga. ⁸ Keho hani ambe tuna thsi na Kilistu, tuna tava nguetu tangua tu kovoka hamo nendi. ⁹ Tunazhivuka nguetu muomu Kilistu ha kuhinduka ku kuthsa, kahatha ku thsa lalo; kuthsa ngechi kuli kuinthi liendi. ¹⁰ Muomu kushuama kukuthsa kua thsile ku mulonga, ua thsile mua lumo lika. Vuno honi muono ua yoya, ayoyela Kalunga. ¹¹ Omuo vene, neni lalo muna fuila ku kala ngue mua thsila ku mulonga, vunoni muyoya kuli Kalunga muli Kilistu Yesu. ¹² Mukemo hani keti muethelele mulonga upangethe mivila yeni ya kuthsa mu kuononoka kumashungu a uo. ¹³ Keti muethelele vaka mbunga yeni va vihithe, vapue vitua via ku pangetha mashevu. Vuno li leketheni kuli Kalunga ngue vaje va va hindula kukuthsa na kuva neha ku muono, keho leketheni vaka mbunga yeni kuli Kalunga ngue vitua via ku pangetha mu vuchili. ¹⁴ Keti mutavethele milonga yimituvakane. Muomu eni keti vaka mashiko, vuno vaka kavumbi. ¹⁵ Keho vati? Tulinge mulonga muomu keti tuva ka muinthi lia mashiko, vuno vaka kavumbi, keti mukemuo? ¹⁶ Kumua zhivukile ngueni amba muli hana ngue vandungo, muna pu vandungo kuli ou u muononoka? Eni kuatha mu pue vandungo ku milonga, eyi yi mi tualetha kukuthsa, ndi vandungo ku kuononoka, oku kumi tuala ku vuchili. ¹⁷ Vuno honi tu shangala Kalunga! Muomu mua kele vandungo va milonga vuno mu nononoka na vimbunge kuvi longetha viva mi hanene. ¹⁸ Vana mi vutula ku milonga, naku mi puitha vangamba mu vuchili. ¹⁹ Ange ku kuania ngue muntu ua ngocho muomu milonga ya nthsitu yeni. Muomu muje mumua leketha vaka mbunga yeni ngue vandungo kuku juala na muvushiko, vinehetha muamo vushiko, mukemuo lalo mumu va leketha mu vuchili vua ku toketha. ²⁰ Muomu mo muakele vandungo va milonga, mua vutukile ku vuchili. ²¹ Kunthimbu ije, vushuka vuka mua uana mu vuima via ku mi koletha nchuama? Muomu fueto yuvuo ni kuthsa. ²² Vuno honi omo vana mivutula ku milonga keho vana mi kutu vundungo kuli Kalunga Tata, muli na vushuka vua kutoketha evi vikalengela mu kuovoka kua miaka yoshe. ²³ Muomu fueto ya milonga kuthsa, vuno vuana vua Kalunga Tata muono ua miaka yoshe muli Kilistu Yesu Muene uetu.