¹ Viakele ngeci muva likunguiye vantu vadthengelekele Yesu na ku nakutolilila majui aKalunga, nguavo endi uemanene ku lixali lia Ngelesalete. ² Endi uamuene mato avali va akoka ku chingela cha lixali. Omuo muakele vaka kulovela vakele nakukuxa manda avo. ³ Yesu ua londele vumo vua mato oo, avuo vua Simoni, ua mulombele linga uvuthindikile kantunda kakandende kutunda kuntunda. Ngoco endi ua tumamenemo ualongethele vantu kutundilila muvuato. ⁴ Omuo muamanene kuhandeka, ualekele Simo,ni nguendi, "Tambula vuato xuenetha kuje kumema kulova ute manda ove linga ulavule." ⁵ Simoni ua mukumbuluile nguendi, "muene" etu tunapanga vuthsiki vuoxe kutualavuile, vuno kulijui liove ange njita manda." ⁶ Muvalingile omuo, vakunguiye vinthi via vingi, na manda avo atavokele. ⁷ Ngoco uathanene vakuavo vaka vuato linga veje vaku vakuatetheko. Vakuavo vedthile vaxulithile mato avo. Ngoco vatamekele kuvombela. ⁸ Vuno Simoni Petulu, muavimuene ngoco, uauililile ku mavuli a Yesu nguendi, tunda kuli yange, mukonda ange njimuntu ua kuviha, muene. ⁹ Endi uakomokele na vakuavo voxe vakele nendi, muomu lia vinthi vije vivalavuile. ¹⁰ Vali vandakanene Tiango na Yoano, vana va Sembendeu, vaje vakele vakuavo ya Simoni. Yesu ua kuanyene na Simoni, keti uvue liova. Mukonda ove kuktunda hano ukapua muka kukuata vantu. ¹¹ Omu muvanehele mato avo kuntunda, avo vathile viuma vioxe vamuxuamene. ¹² Evi vienthile hakanthimbu omo umo ua vaka membo aje. Kuakele mumala umo uakele na vikeka. Omuo muamuene Yesu uauile ku cihanga cendi hanthi na kumulambelela, nguendi, "Muene, nga uyongola, njikanguithe. ¹³ Mukemuo Yesu uoluele livoko ua mukambekele, nguendi, njiyongola, kanguka muvuathi vuathi vikeka via muthile. ¹⁴ Endi ua mukikiyiye keti aleketheko umo, vunoni ua mulekele nguendi, yauye vundthi vuove uka lilekethe ove vavenya kuli Sasendote ukalihane chikombelo omo una kanguka, mukutuala ngue muje muavexikile Mosesa, muka vaketheko vumbangi. ¹⁵ Vunohoni vihandeka viendi via hetele hale, na vimbunga via kama via vantu vethile hamo muku mutolilila mualongetha na kukanguitha mavedthi avo. ¹⁶ Vunoni endi nthimbu yoxe uaile kumuhela ua mumuthenge na kulomba. ¹⁷ Evi viethile ngue halitangua lia matangu aa alongethele, kuakele va Faliseo na valongixi vamaxiko va tumamene kuje, vaje va tundile kumembo aku Ngalileya naa aku Yundeya nakutunda kuYelusalema. Na ndthili ya muene ya kele hamo nendi muku kanguitha. ¹⁸ Ngechi vamala vamo vambatele muhela hakele mumala muka kayekele, vatalelele ngila yakumuneha muinthi vaku mulangeke kulutue lua Yesu. ¹⁹ Avo kuva uanene ngila ya kumuneha muinthi mukonda lia mbunga, mukemo vaile helu lia njivo vamuxuluithile mulipudthu ha muhela uendi, mukati kati kavantu, muchixunga vene kulutue lua Yesu. ²⁰ Mukumona kuthselela kuavo,Yesu nguendi, "Mumala, vuvihe vuove vana vuethela. ²¹ Vakamathona nava faliseo vatamekele kuihula evi nguavo, "Iya ou akuania na kapayo? Iya atha kuethela vuvi vuno Kalunga lika?" ²² Vuno Yesu, uedthivile vije viva thinganyekele, uavakumbuluile nguendi, "Vika mulihola evi muvimbunge vieni? ²³ Vikevio via viathi kukuanya, 'Vuvi vueni vana vuethela' Indi nguavo katuka enda'? ²⁴ Vuno honi, munapande kuthivuka ngueni muna muntu ali nampoko hano hanthi," -ya kuthela vuvi." -Endi uakuanyene na mumala muka kayekele njikuleka, katuka kakula muhela uye kunjivo yove." ²⁵ Uakatukile vuathivuathi kulutue luavo, uakakuile muhela uje uandandele. Ngoco uayile kunjivo yendi, na kudthumba Kalunga. ²⁶ Nkala umo uakomokele vadthumbokele Kalunga. Vaxulile na liova, nguavo, "Etu tunamona viuma via kamakama lelo. ²⁷ Munima ya viuma ovio via jombolokele, Yesu ua tundile oho uaile uamuene muka kutambula liximu lidthina liendi Levi natumama ku mbalaka ya kutambuila liximu. Uakuanyene nendi nguendi, "Njixuame." ²⁸ Ngocho Levi uakatukile uamuxuamene, uathile viuma vioxe munima. ²⁹ Ngoco Levi ua hanene lijumbu liakama kuli Yesu. Kuje ku kuakele vaka kutambula liximu vavengi na vantu vakuavo vaje vali dthengelekele kumesa mukulia navo. ³⁰ Vuno vafaliseo na vaka mathona valinyenyetele ku vandongi vendi, nguavo, "Vati mulia na kunua navaka kutambula liximu na vaka vupi?" ³¹ Yesu ua valimbuluile, "Vantu vaje vali muacili kuvayongola chimbanda, vamuyongola vaje lika vavavala. ³² Ange kunjethile mukuthana vaka vucili, vuno honini vaka vuvi kukutenguluka." ³³ Vamukuanyene nguavo, "vandongi va Yoano nthimbu kunthimbu vadthilila kulomba, navangonge lalo vava Faliseu navo vene vapanga ngoco. Vunohoni vandonge vove kulia lika na kanua." ³⁴ Yesu uavalekele nguendi, "kuatha umo ueni apanga vulo aketha vaje vali munjivo vadthiliye nthimbu vali na ndungi mukati kavo? ³⁵ Vuno matangua akeja omuo muakeja vavena ndungi akuvatunditha muliavo, Umba honi vaka chilinga matangua oo." ³⁶ Umba lalo Yesu uava telele chithimo. "Na umo uahi atuvula kachi nchancho kachithala kutunditha ku chikovelo chaciha achipangethe mukuvandeka kuchikovelo cha laja. Nga endi alinga ovio, atavuitha chikovelo caciha, umba lalo kachinchancho kantanga kanatundu ku chikovelo chachiha kuka kafuila kuntanga ya chikovelo chalaja. ³⁷ Naumo uahi ahaka vinyu via viha mu ndjeke ya chikanda ya laja. Nga endi apanga ovio, ovio vinyu via viha vitavula chikanda vinyu vikaxumpoka, na ndjeke ya chikanda yika viha. ³⁸ Kumani vinyu via viha viafuila kuvihaka mundjeke yaiha. ³⁹ Naumo uahi na livanga kunua vinyu via laja ayongole via viha, endi nguendi, 'Axako via laja.'''