¹ Ciuano cakulia mbolo cakele muhiehi, covatumbula pasovala. ² vakuluntu vavasasendote, na vakakukombelela, vathetelele ngila ika yakuthsiha yesu, vunoni vakele na liova lia vantu. ³ Ngoco satana uakovelele muli yunda sakaliota, umo uavaje likumi navavali, ⁴ Yunda uayile kuvasasendote vakama na tupitau nakuthimutiya navo vati aka muenda vungungu nakuvanehelaye. ⁵ Vajolelelele nakuliuvuathana vamuhane vimbongo. ⁶ Uetavele nakuthetela ngila ika yavahana yesu mumavoko avonthsimbu kanda mbunga yahiho. ⁷ Ngoco litangua lia mbolo yakujena hingo liahetele, ha kuthsiha vana va vindjui vakukombelela pasovala. ⁸ Ngoco yesu uatumine Petulu na Yoano nguendi, ''Yenimuye mukatuvuahethele pasovala tukalie.'' ⁹ Ngoco vamuihuile nguavo,''Kuiko uyongola tuka kuvuahetheleyo?'' ¹⁰ Ua vakumbuluile nguendi, "Taleni, mumuka kovela mumbongi, muka uana muntu nambata njava ya mema. Muxuameni na munjivo muje muakakovela. ¹¹ Ngoco vene handekeni na vavena njivo ngueni, Mulongithi na tutumu kuli yove kuakala njivo ya vangendthi, mkukeko kunja kulila Pasovala na vangendthi vange?" ¹² Endi aka mileketha njivo ya kama ya helu. Muli na vitenga vioxe tuvuahetheleni kuje." ¹³ Mukemo va yile, vauanene vilema vioxe ngue muavalekele. Mukemuo va vuhethele viakuli via ciuano ca Pasovala. ¹⁴ Omo nthimbu yahetele, Yesu ua tumamene na vapostolo. ¹⁵ Yesu ua valekele nguendi, "njili nalixungu muakama liakulia pasovala eyi munthimbu kanda njiyande. ¹⁶ Njimileka nguange, kunji kayili lalo, noho inapuithamo muvumuene vua Kalunga." ¹⁷ Ngoco Yesu ua tambuile nganja, na yilombelele, nguendi, "Tambuleni na kulixumuinayo hakati keni. ¹⁸ Njimileka nguange, ange kunjikanu lalo kuvuxuka vua viniu vumuene vua Kalunga vukeja. ¹⁹ Ngoco ua tambuile mbolo, ua yilombelele, ua yipamuine, na kuvahanayo, uahandekele nguendi, Ou ukeuo muvila uange, uva mihana. Vilinga lingeni muku njivuluka ange.'' ²⁰ Omo va namane kulia uatambuile nganja ua handekele nguendi, ''Eyi nganja inapu litavathano lia liha liamu maninga ange, avana mimbalumuina. ²¹ Vunoni tolileni. Livoko lia muka kunjenda vungungu lilinange kuno kumesa. ²² Muomu muna muntu akaya ngue muje mua vitumbika. Vunoni ngongo ya uje aka muenda vungungu!" ²³ Vaxangumukile ku lihothola yiya honi aka linga viuma evi? ²⁴ Mukemo kua katukile vimpata hakati kavo yiya honi hakati kavo uva katumbula ua kama. ²⁵ Ua handekele navo, ''Vimiene vaka kujeneka kuthselela vakevo vali helu liavo, navaje vali nampoko hali vakevo veku vatumbula vakakukuatha. ²⁶ Vunoni keti vipue ngue ngeci kuli yeni. Vunoni ou uakama hakati keni apue ua mundende, nou napu ntuama hakati keni napande kupua ndumbo. ²⁷ Iya uakama, Uje natumama kumesa, ndi uje avathela viakulia? Keti ou na tumama kumesa ndi? Mukemuo munjili yange hakati keni ngue muka kuavathela. ²⁸ Vunoni yeni mu nexuala hamo nange mu tuyando tuange. ²⁹ Njihaka ku vu muene ngue omo tata ua njihanenevio. ³⁰ Yeni mukalia na kunua ku mesa yange muvumuene vuange, neni muna tumama ha vituamo via vumuene kuthompetha mixovo likumi na ivali ya Isaleli. ³¹ ''Simoni, Simoni, takametha, Satana ua kulombe ku kutambula, aku pekula ngue tiliku. ³² Vunoni nja kulombelelele, linga kuthselela kuove keti ku-ue. Omo una tenguluka luhua koletha va munanoko. ³³ Petulu ua mukumbuluile nguendi, ''Muene, njina livuahethela laja kuya mumo nove nambe mukamenga ndi mu kuthsa.'' ³⁴ Yesu ua mukumbuluile nguendi, ''Njikuleka, Petulu, Vuthsiki vunovene, nthimbu ndemba nolo atambeke, uka njiviana lutatu nguove kounjithivuka.'' ³⁵ Mukemuo Yesu ua valekele nguendi, ''Muje munja mitumine na nkombe yahi, na njeke yahi, ndi vinkaku, muajenekele cuma cimo ndi?'' Va kumbuluile nguavo, viahi.'' ³⁶ Mukemuo Yesu ua valekele nguendi, vunoni mualolo, uoxe ali nankombe ambate, na njeke lalo. Na uoxe kethi na muele na pande ku landetha kapote kendi alande muele umo. ³⁷ Njimileka nguange, vije viva thonene via kunjitumbuila yange vina pande kupuamo, nguavo vamu tandele hamo nava kavupi.'' Muomu vije viva nji tumbuilile vinapuithamo.'' ³⁸ Vahandekele nguavo, ''Muene, tala! tuli na miele ivali.'' Ikeye ua handekele navo nguendi, ''Vinapumo.'' ³⁹ Yesu ua ile, ngue mua kele nakulinga, ku mukinya ua Oliveta navandongethi va muxuamene. ⁴⁰ Omo vahetele, Ikeye ua valekele nguendi, ''Lomeni linga keti mukovele mu vietheko.'' ⁴¹ Ua tundile mukati kavo uayile vulahe vuaco ngue kuaxa livue liheta, Uathsikamene na kulomba, ⁴² nguendi, ''Tata, nga utava, nganja eyi injitunde, vunoni keti ngue kuciyongola cange, Vunoni cithango cove cilingiue.'' ⁴³ Mukemuo kangelo ua muilu uethile kuli ikeye, ua mukolethele. ⁴⁴ Mukukaluua navua navua, Ua lombelele muakama kama, na litukuta liendi lia himpukile ngue manothi akama amaninga aholomokele hanthi. ⁴⁵ Omo ua hetukile ku kulombela kuendi, uethile ku vandongethi uaku vauanene vanandanda mukonda lia vuthiua vuvakele navuo. ⁴⁶ Ua vehuile nguendi, "Vati mu nandanda? Hindukeni mulombele, linga keti mukovele mu vietheko.'' ⁴⁷ Omuo te nolo acili mukuhandeka, mbunga ya hetele, na Yundasa, umo uavaje likumi na vavali, muku vatuamenena. Ikeye uethile muhiehi na Yesu na kumuthsemba, ⁴⁸ Vuno Yesu ua mulekele nguendi, "Yundasa, uenda muna muntu vungungu na ku muthsemba?" ⁴⁹ Mukemuo omo vathengelekele Yesu vamuene vije via jombolokele, nguavo, "muene, citava tu lue na muele?" ⁵⁰ Mukemo umo uavo ua vetele ngamba ua Sasendote uakama, na kumuvatula litui liendi lia cilio. ⁵¹ Yesu nguendi, "Keho likele!" Ikeye ua kuatele kulitui liendi, ua mukanguithile. ⁵² Yesu ua lekele va Sasendote va kama, na tupitau va tembele, na vakuluntu vaje vethile muku muluitha, "Muneja muku njikuata ngue cithi, na miele na milamu? ⁵³ Munjakele neni matangua oxe mutembele, kumua njikambekele mavoko eni. Vunoni eyino ikeyo nthimbu yeni, na ndhzili ya mithithi." ⁵⁴ Va mukuatele va mutualele kunjivo ya sasendote ua kama. Vunoni Petulu ua xuameneko hana xondoloka. ⁵⁵ Muva xuamekele tuhia mukati ka citali na omo muva tumamene hamo, Petulu ua tumamene mukati kavo. ⁵⁶ Omo ndungo ua mukentu ua mumuene mua tumamene muceke ca tuhia ha ku lisungama nendi ua hendekele nguendi, "Ou mumala ou lalo nendi vakele mumo nendi." ⁵⁷ Vunoni Petulu ua livianene, nguendi, "Ove mukentu, ange kunjimuithiva." ⁵⁸ Kunima ya kanthimbu ka kandende uaye ua mumuene, ua handekele nguendi, "Ove lalo umo uavo." Vunoni Petulu nguendi, "Ove muntu keti yange." ⁵⁹ Kunima nthimbu ya kufu ola imo yahitilemo muntu uaye ua muthininikile nguendi, "Via vu cili muntu ou lalo uakele nendi, mukonda ikeye ka Ngalileya." ⁶⁰ Vunoni Petulu ua handekele nguendi, "Ove muntu, kunjivithiva ovio viu handeka. "Vuathi-vuathi te acihandeka, ndemba ua tambekele. ⁶¹ Muene Yesu ua tengulukile ua talele kuli Petulu, na Petulu ua vulukile lijui lia muene Yesu, ngue muje mua mulekele nguendi, "Munthimbu nolo kanda ndemba atambeke litangua lino lia lelo uka njiviana lutatu." ⁶² "Petulu ua tuhukile hanja ua lilile muakama. ⁶³ Mukemuo vamala va niungile Yesu vamu thsopele na kumupupa, ⁶⁴ Va mufuikile kumexo vamuihuile nguavo, "Tuleke! iya na kupupu?" ⁶⁵ Na viuma viavio via vingi va mutumbuililevio, viaku muxaula. ⁶⁶ Muje mulia kile litangua, vakuluntu vavantu va likunguluile, hamo na vakuluntu va vasendote na vaka kuthona. Mukemuo vamutualele kumpunga ⁶⁷ nakuhandeka nguavo, ''Nga yove u kilistu, tuleke" Vunoni ua valekele nguendi, nambe nga njimileke kumuthelela, ⁶⁸ Nambe nji mihule, kumu njilimbululula. ⁶⁹ Tunde hano, muna muntu akatummama kulivoko lia cilio lia ndhzili ya Kalunga.'' ⁷⁰ Mukemuo voxe va handekele nguavo, "kuma ove umuna Kalunga ndi?'' Yesu ua valekele nguendi, ''Omuo vene mumu nahandeka yange vene.'' ⁷¹ Vahandekele nguavo, ''Vika lalo tuthetela. Vumbangi? Etu vavenia tuna liuvuilako via kutunda mukanua kendi vavenia."