¹ Yesu ua handekele na vandonge vendi nguendi, "vucili kupua mavue a kupunduka, vuno kuvindama kumuntu uje uakakovelela! ² Haxako vamukutiye mavue munthsingo yendi linga vamumbile mumema aKalunga kutuvakana apunduitheko vanike. ³ Litaleni. Amba munanoko navihitha, muviane, amba alihiluitha, munoneneho. ⁴ Amba nukuvihitha vinthsimbu vitanu navivali mulitangua, keho eja naua vinthsimbu vitanu navivali nguendi, 'Ndjinalihiluitha,' nolo muecele!" ⁵ Vandongisi nguavo, 'Muangana.' Ilanetha lukulahelo luetu.'' ⁶ Muangana nguendi, ''Amba muekele naluthsilielo ngue mbuto, mukahandeketha muti ngueni, 'Tukuka, keho vakutombeke mumema akalunga,' keho ukamiononoka. ⁷ Vuno liaueni, ali nangamba apupula ndi alitha vampanga, amuleka mukutunda vene kumahia nguendi, 'Ija vene utumame ulie'? ⁸ Nkuma kamuleke nguendi, 'Ndjipangele viakulia ndjilie, keho likute muiva muvidhala viove undjiniunge kamane ndjinamane kulia nakunua. Amba nove ulia nakunua'? ⁹ Kekuxangala ngamba yendi muafua napanga vianamutumu, ndi axangala? ¹⁰ Nambe yeni lalo, amba unapanga viva nakutumu, handekeni ngueni etu vangamba vangoco. Tunapanga lika vipanga viatutumbukila."' ¹¹ Viakele ngeci muaile kuJelusalema, uaxuamethele vingamba viaSamalia naNgalileya. ¹² Mualingile akovela muimbo limo, vamuuanene vamala likumi vakatulepa. Vamuimanenene hale hale keho ¹³ vatambakana, nguavo, ''Yesu, muene, tuvuile ngodhi.'' ¹⁴ Muavamuene, uavaleka nguendi, ''Yamuyeni kuli vaSasendote vakamimone.'' Muva tundileho vana toko. ¹⁵ Umo uavo muamuene nguendi nakanguka, uatengulukile kunima, uatambakana mukuxangala kalunga. ¹⁶ Uauithila cihanga cendi kumiandja yayesu, nakumuxangala. keho endi uapuile kaSamalia. ¹⁷ Keho yesu nguendi, "Vantu vaje likumi kovatokelendi? ¹⁸ Kuakele vakuavo vahilukile kuakuxangala xuku, kutundithako ou uakumuyati ueka ndi?'' ¹⁹ Uamuleka nguendi, ''Katuka, uye. Luthsilielo luove lunakukanguitha.'' ²⁰ Vafaliseu vamuihula nthsimbu yakuindja kuamuangana, yesu nguendi, ''Kumukavutala vuovuindja. ²¹ Ndi vakamileka nguavo, 'Taleni, vuavuno!' ndi, 'Vuavuje!' Muafua taleni, vuangana vuakalunga muvuli muli yeni.'' ²² Ualeka vandongisi, "Matangua akeja amukaliveyela kumona litangua lia muna muntu, vuno kumukalimono. ²³ Keho vakamileka nguavo, 'Taleni, vuavuno!' Taleni, vuavuje!' vuno keti mukayeko ndi mukavaxuame, ²⁴ muafua muyikemuna mihiato muilu, mukemo muli kafua litangua liamuna muntu. ²⁵ Vuno mbangelo napande kumona tuyando nakumuviana kumuyati ou. ²⁶ Ngue muviafuile kumatangua aNoua, mukemo lalo muvikafua kumatangua amuna muntu. ²⁷ Valile, vanuine, vambatele keho valihangelele kamane litangua liakovelele Noua muvuato-nalivadhi liadhile keho liavathsihile voxe. ²⁸ Ngoco vene, via kele hamatangua aLote valile na kunua, valandele na kulandetha, vakunine na kutunga. ²⁹ Vunoni halitangua lije Lote uatundile ku Sandoma, kuanokele tuhia na fofo via muilu, via vathsihile voxe. ³⁰ Kunima yanthsimbu cifua cije cikakala halitangua liakumona muna muntu. ³¹ Halitangua olio kucikatava kumuntu uje ali hakancongua kuxukula linga akatuhuithe vitenga viendi mundjivo, keho lalo uahi akatunda mulihia akahiluke. ³² Vulukeni mukentu uaLote. ³³ Uoxe athetela muono uendi vakaudhimbalethe, na uoxe adhimbaletha muono uendi akaniunga. ³⁴ Ndjimileka, vuthsiki ovuo kukakala vantu vavali hamuhela. Umo vakamuhitula, umo vakamutha. ³⁵ Kukakala vakentu vavali kumo, umo vakamuhitula, umo vakamutha.'' ³⁶ Vavali vakakala mulihia, umo vakamuhitula, mukuavo vakamutha. ³⁷ Vamuihula,''Kuiko, muene?'' Uavaleka nguendi, ''Kuoxe kuli muvila, makuvi nao akalikunguluilako.