¹ Keho vaka kufuetetha liximu na vaka vuvi navo vedthile kuli Yesu vaku mutolilile. ² Va Faliseu navo voxe valininguithile, nguavo, "Ou mumala aka tambula vaka vupi nakulia lalo navo." ³ Yesu uatele cithimo, nguendi, ⁴ "Iya ueni, ambe ali nacihita ca vinjui keho hadthimbale umo, katha vije makumi atanu na auana, vinjui mutanu na auana mumuthenge, linga athetele uje ua kudthimbala kamane amuuane? ⁵ Keho mua muuana, amuhaka ha chithsili keho ajola jola. ⁶ Muakuheta hembo, athana vakuavovana lihata nendi, 'Njijoletheniko, injui yane njina yiuana.' ⁷ Njimileka nguange nambe ngoco, mukakala kujolela muilu ambe muka vupi nambe umo lika atenguluka, kutuvakana makumi mutanu na auana na vatanu navauana vaje vatenguluka laja. ⁸ Indi mukenu muka ali navimbongo likumi, ambe yimo idthimbala, katangeka mutangeko, kukomba munjivo na kuthetela muacili noho naiuana? ⁹ Omu mua yiuana, athana vakuavo nava vamuhata, nguendi, 'Njijoletheniko, njina uana mbongo yange.' ¹⁰ Mukemo lalo nguange kuli kujolela kumexo atungelo va Kalunga kuli uoxe atenguluka." ¹¹ Keho Yesu nguendi, "Mumala umo uakele na vana vendi vavali vavamala, ¹² keho uamunike ualeka ixe nguendi, 'Tata, njihaneko vufuko vuange.' Keho mukemuo mua vatepelele. ¹³ Ku ahitile matangua amengi, munike ua kunguiyiye vufuko vuendi uayile kucifuti cahale, kuje kukeko kuaka vihithilile vufuko na kuyoya muakuviha. ¹⁴ Keho muamanene vioxe, njala yakama yalixandele mucifuti cije, keho uahutuile. ¹⁵ Keho ua lihanene ku umo uamucifuti cije, ou uaka mutumine kulitha vingulu. ¹⁶ Ikeye nendi ualile vutumbu vuje vuvalile vingulu, mukonda uahi ua muhanene viakulia. ¹⁷ Omuo mua lithinganyekele, ualileka nguendi, 'Vindungo vangahi vali kuli tata valia muacili, keho ange yange ou kuno, njithsa kunjala! ¹⁸ Njikatuka njiya kuli tata, njika muleka nguange, "Tata, njina vihitha kuli Kalunga na kuli yove. ¹⁹ Keti lalo unjithane munove; nange njipuithe ngue ndungo yove.''' ²⁰ Keho munike ua katukile uayile kuli ixe. Te kanda acili hale, ixe uamumuene ua muvuilile ngodthi, mukemuo mua muxatukilile na kuka mudthengeya mavoko na kukamutsemba. ²¹ Munendi nguendi, 'Tata, njina vihitha kumexo aKalunga na kuli yove. Keti lalo unjithane munove. ²² "Ixe ualeka vindungo vendi, 'Neheni vuathi vikovelo viacili mumudthaleke naku mudthaleka cikungu kulivoko liendi, na vinkaku kumianja yendi. ²³ Keho neheni ntueyi ya kuhindala muyi thsihe. Tujoleleni cilika na kukala hamo! ²⁴ Munange uatsile, ngeci nahinduka. Uadthimbalele, ngeci natumbuka.' Keho ua xangumukile kujolela. ²⁵ "Kunima mona ua mukuluntu ua kotokele muliha. Muahetele hamuhehi na limbo, uavuile miatho na kukina kua vantu. ²⁶ Uathaneneko ngamba umo ua muihula. ²⁷ Ngamba ua mulekele nguendi, 'Munanoko neja keho ixo ngeci namuthsihila ntueyi mukonda nahiluka na vukangule.' ²⁸ "Mona uje hakeho ha nyenguele ua vianene kukovela muimbo, keho ixe ua tuhukileko uamudthembeleka. ²⁹ Vuno mona ua muleka nguendi, 'Tata tala, maka yoxe eyi njina kupangela, hahi njajeneka kukuononoka, keho koua njihanene nambe muna mpembe njilithambe navakuetu, ³⁰ Vuno muaneja munove, ou navihitha vilinge viove vioxe viove na vupangala, una muthsihila ntueyi ya kuhindala. ³¹ Ixe nguendi munange, ove nange uakala, viange vioxe viove. ³² Chalili tulithambe na kujolela, mukonda munanoko uathsile, ngeci ali na muono, uadthimbalele, ngeci natumbuka.'''