¹ Liakele litangua lia Sapalalo, muayile munjivo yaumo ntuamena uava Faliseo mukulia mbolo, hakeho hovakamu muenenene hamuhiehi. ² Nthimbu ije, kulutue luendi kuakele mumala ua vavalele vuvedthi vuendi endema. ³ Yesu uehuile vakamana mumaxiko ava Yundeya nava Faliseu, "Lixiko liacili lia kuthaka mulitangua lia Sapalalo, ndi kuahi?" ⁴ Vunoni avo vaholokele. Yesu hakeho hamukuetele, ua mukanguitha, na kumuthela aye. ⁵ Uavaleka nguendi, "Iya hakani keni amona munendi ua mumala ndi cidhama ceni nauila mucina litangua lia sapalalo vunoni kamunonomo oho vene?" ⁶ Vakevo kuvathele kukumbululako kuvilinge evi. ⁷ Yesu mua muene nguendi ovo vavathaneneko vana lihanguila vituamo via kutuntuka, uatele cithimo, ⁸ "Amba vana kuthana kucilika cavulo, keti utumame mumuhela ua kutuntuka, muafua hamo kuali uauo lalo uvanathana uakukutuvakana. ⁹ Muaheta vavenya uje navathana, akuleka nguange, 'Hana muhela kumukueni; keho muuvua njuama uka tambula cituamo cacindende ndende. ¹⁰ Vuno honi ambe vana kuthana, yauye ukatumame mumuhela ua undende, mueja uje nakuthana, akuleka nguendi, 'Yaya, londa kumuhela uakama; Keho vaje voxe vatumama nove kumesa vakuthingimike. ¹¹ Mukonda uje uoxe alixangala endi vavenya vaka mukehetha, na uje akalikehetha vaka muxangala." ¹² Yesu nendi ualekele uje ua muthanene, "Amba uhana njandale ndi cilika, keti uthaneko vakueni ndi vamunanoko vavamala ndi vuxoko vove ndi mumua lihatela, mukonda navo vaka kuthana, keho vika lifueta. ¹³ Vuno umba uhaka cilika, thana vihutu, vilema, vaka kupokoka mahindi na vaka kuthsa mexo, ¹⁴ keho ukavedthuka, muomu kuvakatha kukufueta. Muomu vaka kufueta ha chixitukilo cavaka vucili." ¹⁵ Muaviuvuile umo uavo vatumamene kumesa na Yesu, ua muleka nguendi, "uavedthuka uje akalia mbolo muvumuene vua Kalunga!" ¹⁶ Vuno Yesu ua mulekele nguendi, "Kuakele mumala umo ua thanene vantu vavengi vakulie nendi viakulia via vuahethele. ¹⁷ Hanthimbu ya kulia kua cinguedthi, ua vatuminine ngamba uendi, 'ijeni, muomu vioxe vina vuaha.' ¹⁸ "Voxe vaje vahandekele via kulivindika. Uambangelo ua mulekele nguendi, 'Ange njina landa liha, ngeci njinapande kuka litala, njinalombo kuethela.' ¹⁹ "Mukuavo nguendi, 'Ange njina vihove vivali, keho njici kavietheka, njinalombo unjethele.' ²⁰ "Mukuavo nedi nguendi, 'Njinambata mukenu, keho kunjijako.' ²¹ "Ngamba uje uahilukile uakalekele xokuayina nguengi, keho xokuaina ua nyenguele nakuleka ngamba yendi nguendi, 'Xatuka vuathi muvingila na kuvinchongo via membo ukaxake vihutu, vilema, na vaka kuthsa mexo na vivendthi.' ²² Keho ngamba nguendi, 'xukulu, viunanjitumine vinahu kulinga, keho nolo kuli nthimbu ikuavo.' ²³ "Xokuaina nguendi, 'Yauye mumatapalo nakuvaleka vakukovele, nguove njivo yange mualolo ixula. ²⁴ Mukonda ange njikuleka nguange uahi hakati kavo vamala vanjinathanene vaka makele viakulia.''' ²⁵ Keho mbunga yakama ya muxuamene, endi ua tenguluka, nakuvaleka nguendi, ²⁶ "Ambe umo eja kuli yange na kudthinda yixe, indi vaina, mukemuo nendi, vana vendi, vamunaina ndi muono uendi kuahi, kakapu ndonge yange. ²⁷ Uoxe kambata cilindakano cendi vavenya nakunjixuama kakapu ndonge yange. ²⁸ Yiya ueni aluveyela kutunga litungo keho katumama alinge muomu ambe ali navioxe viakupangetha? ²⁹ Vanga amba atateka vuno kamanuthula, voxe vamumona vaxangumuka kukuania viakuviha kuli yendi, ³⁰ nguavo, 'Mumala ou uatatekele kutunga vuno liamuhona kumanetha.' ³¹ Ndi muene, muka atha kukauana muene mukuavo mundthita, katumama atolilile via kumuleka mba akatha kukalua navamala vendi vakupua likumi lia makulukadthi ku muene uauo akamuluitha na vendi vakapua ku makulukadthi likumi na avali? ³² Ambe keti ngocho, mukuavo acendela hale, endi akamutumina tunganda nakumuihula ambe valiuvua mukuhaka ciyulo. ³³ Mukemo honi nguange, anbe hali mukati keni kahana vufuko vuendi kakakala ndonge yange. ³⁴ Mongua uacili, vuno honi unathimbaletha kutovala, vati vaka utovaletha lalo? ³⁵ Kukuethi natheho kulivu, indi nambe kuvuilo. Vaumbila kuti. Ou ali namatui akuvua, ovue."