¹ Apa ghapitire mumambara gha Amufipolis na Apoloniya, hakumine mumbara Tesalonika, oku dyakarire dyango dyo mapongero ghawaJuda. ² Thika dyodi yakarire mumihingo wa Paulusi, ghayendire kwawo, no maSabata mahatu ghakuwire nawo mumatjangwa. ³ Ghayandhururire matjangwa noghatjwathanithire eshi yakarire mudyo kwaKristusi ghanyande mukufa no kuvumbuka mwawafu. Ghaghambire eshi; ''Oyu Jesusi nakuyuvitha kukwenu ne yodighe Kristusi. ⁴ HaJuda hamwe yawaningithire mukukupakerera kwa Paulusi na Silasi, pofotji no thivarero thothikuru tho hatawi hohahirika, nombadi hapiterithi hohapu hohambuyama. ⁵ Ene haJuda wa hapirire kutawa, hakarire nonya, hashimbire hanu hohamango mumaghurithero, ha kongwedhire mbunga pofotji, no ha dhongere mbara dhodhiheya. Ha homokere ndhugho dhaJason, ha shanine kushwayitha Paghulusi naSilasi kughutho wawanu. ⁶ Apa ha dhirire kuwawana kwawo, ha purundundire Jason no hatawi hamweya kughutho wawakamuragho mumbara, ghukuyererire eshi, ''Harume wahareta maghukukutu mukaye hanana kumu karo muno mumwetu. ⁷ Harume awa gha tamburire Jason hana reya muragho wafumu; awo kuna kughamba eshi poghadi fumu ghumweya -Jesusi.'' ⁸ Mbunga nawa kamuragho ha tanganine pakuyuva yinu yi. ⁹ Ene ha ka muragho haruwerithire Jason masherenyi, no kuwa thiya ha kayende. ¹⁰ Ghuthiku ghogho hatawi ha tumine haPaghulusi naSilasi kuBeregha. Apa ha ka kumine, ha ka yendire musinagoge wawaJuda. ¹¹ Hanu wa ha karire nodikuto kupitaka ho mu Tesalonika, awo ha tamburire nando no makuroyithero mumaghano, ha konakonine matjangwa kehe diyuwa no kukengurura eshi eyi yinu ne kemo. ¹² Wingi wawo hatawire, rambanga ko nowa hakarire nongcamu hambuyama nawa tutughuru hohengi. ¹³ Ene apa ha yuvire haJuda homuTesalonika eshi Paghulusi ne kuna kayuvitha nando dhaNyambi muBeregha, hayendire ko ha ka dhongere no katokotitha mbunga. ¹⁴ Popo vene, hatawi hatumine Paghulusi gha yende kudikurtuviya, ene Silasi naTimoteghusi ha thiyarire. ¹⁵ Awa hapiterithire Paghulusi ha mu shimbire kupitakana mbara dho muAtenisi. Nopa ha kamuthiyire Paghulusi koko, hawanine marawero kukwendi kuhatera kwaSilasi naTimoteghusi eshi heye pawangu-wangu. ¹⁶ Oku shime Paghulusi shime gha wa taterera muAtenisi, mupepo wendi wamupethire mwimi dhendi apa gha monine thitata thina yara noyitjwandjo. ¹⁷ Nga kongathananga musinagoge nawa Juda nawa mwe awa nga ha kugha nga Nyambi, nomumango gho kughurithera no wa nga ha karangamo. ¹⁸ Ene hamweya homuEpikuriyeni nawa porofeta homu Stoyiki ha kuwanekerire nendi, Hamwe ha ghambire eshi, ''Yinu yongepi ghana kushana kughamba yu thiyavingeri?'' Hamwe eshi, ''Aye kumoneka yira ghumwe ghna kwitha hanu ha karere nyambi ghombango,'' yoyishi aye kwayuvithire mbudhi dhaJesusi no muvumbukero. ¹⁹ Hashimbire Paghulusi no kumutwara kuAreghopangusi, ghughamba eshi, ''Kukona tudimuke twe yihonga yoyipya eyi ghuna kuhonganga ndi? ²⁰ Eyi ghureta yinu yoyipya mumatwi ghetu. Podigho eshi, tuna shana kudimuka eshi nye yina kutongora yinu yi.'' ²¹ (Haka Ateniyasi wahe nawa mutundakure awa ha tungiremo mbadiko eyi nga ha ruwananga shimengwa kuthimwetwedha no kutegherera kuyinu yoyipya.) ²² PAghulusi ghemanine mukatji kawa Areghopangusi no gha ningire eshi, ''Amwe mwanu ho mu Atenisi, na mono eshi amwe mwa kara nomatawero mundhira dhenu. ²³ Apa na kupitanga no kukengurura yinu yenu yo kuraperitha, nawana thiyambero apa hatjanga eshi, ''Nyambi gho Kupira Kudimuka.'' Amwene kuna rapereranga ghupira thinga, eyi kuna kuyimutongwera. ²⁴ Nyambi oyu gha tendire kaye noyoyiheya eyi yakara mo, apa gha kara eshi ayene Fumu gho diwiru nomuve, mbadi gha tunga mumangirishe gho kutenda nonyara. ²⁵ No karo yene mbadi hamukareranga nonyara dhamunu, yira aye gha nyanda kehe yino, yoyishi eye thinda yo gha tapa moyo nomunu no kehe yino kwawanu. ²⁶ Mwamunu ghofotji gha tendire kehe dino diko no kutunga pano peghuru dhomuve, gha rikanyithire no kuturithapo yivaka nomayindha mumatungo ghawo ghomango, ²⁷ podigho eshi ha kone kushana Nyambi no pamweya ha ghayare mundhira dhawo dho kukwendi no kumuwana. No karo mbadi ghakara kayenda kwakehe yu gho papetu. ²⁸ Mumwendi twa para, no kuyenda, no kuwana ghunu wetu, thika kenge edi gha yi ghambire mutunuri wetu eshi, 'Natwe karo twa hana ho kwendi.' ²⁹ Ene kenge twe eshi twa hana hoka waNyambi, mbadi twa kona kughayara eshi ngcamu dhoghunyambi ne dhapitura ne dhapitura ngorondo endi siliveri, endi diwe - yishwi eyi ha tenda muyighanekera yawanu. ³⁰ Ene Nyambi gha kengurura kupitakana ruvedhe rokupira thinga, ene yene kuna kurawera hanu kokuhe hapiruke. ³¹ Yoyishi aye gha turapo diyuwa edi mbo gha pangura kaye mughuhunga mwa katughuru oyu ga torora. Nyambi ghatapa thishupo tho katughuru kwakeheyu pakumu tumuna muyifa.'' ³² Pakuyuva hanu homu Atenesi muvumbukero wawafu, hamewe hamuhekire Paghulusi, ene hamwe ha ghambire eshi, ''Mbo tuna tegherera karo kukoye kuhatera koyi.'' ³³ Kutunda po Paghulusu ghawa thiyire. ³⁴ Ene harume hamwe ha kupakere nendi no kutawa, pofotji naDighonisius ghomu Areghopagie, no mukamdi ghodina Damaris, nohamweya kengeyo.