¹ Kutunda payinu yi Paghulusi gha shwayire muAtenesi no kuyenda kuKorinte. ² Gha ka kuwanine no muJuda ghodina eshi Akwila, muJuda gho mu kakoghatji kapontusi, oyu nga ka tunda muItaly na didhiko dyendi Prisila, yoyishi Klaghudighusi gha rawere haJuda waheya ha shwaye muRoma. Paghulusi ghawa yendere, ³ ene yoyishi gha ruwanine kuyirughana yofotji, gha karire nawo no kurughana, awo ha karire harughani homatende. ⁴ Podigho Paghulusi gha yuvithire musinagoge kehe yuno sabata, ghu yerekerako kukondjitha haJuda nawa Hirika. ⁵ Nopa haSilasi naTimoteghusi ha ghurumukire kutunda muMasedoniya, Paghulusi gha kutapire kunando, ghutapa ghushupi kwawaJuda eshi Jesusi ne yo Kristusi. ⁶ Ene haJuda hamu kananine no kumutuka, Paghulusi ghawa yaghumwene dirwakani dyendi no kughamba kukwagho eshi, ''Kukona manyinga ghenu ghakare padhimitwi dhenu mwathinda; Ame ne nakeni. Kutunda pano nanyi ni yende kwawaHayidena.'' ⁷ Munyima gha shwayirepo nu kuyenda kundhugho dhaTitusi Justusi, katughuru yu gha kuyire Nyambi. Ndhugho dhendi dha karire pepi nosinagoge. ⁸ Krispusi, mupiterithi gho mkusinagpoge, ghatawire mwaFumu, pofotjio nawa dighumbo dyendi waheya; nothingi thawa Korinte awa ha yiyuvire hatawire no hapwire kuyogha. ⁹ Fumu gha ghambire kwaPaghulusi ghuthiku muthimona meho eshi, ''Wayapa, ene ghambe no waporera. ¹⁰ Ame noye nidi, no mbadiko oyu sha kone kukuyuvitha tjitju, no ame na kara nohanu hohengi muno mumbara.'' ¹¹ Paghulusi gha tungire mo ghure ghomwaka ghofotji no tughonda kwoko nokofotji, ghuhonga nando dhaNyambi mukatji kawo. ¹² Ene apa gha karire Gallio nduna wawaAchaia, haJuda hemanganyene Paghulusi nodighano dyofotji noha mutwarire kuthipuna thomapangwero; ¹³ ha ghambire eshi, ''Katughuru yu ne kukondjitha hanu hakughe Nyambi mumuhingo gho kukutjaka kumuragho.'' ¹⁴ Ene apa gha shanine kughamba Paghulusi, Gallio gha ghambire kwawaJuda eshi, ''Amwe mwaJuda, ngeshi yikare eshi, ghukaro ghoghumngo endi ghukarakathi ghoghuyi, nanyi yikare yina hungama kurughana nenu. ¹⁵ Ene apa yina kara eshi ogha ne ghomepwero nomena nomuragho wenu, muyi koshonone mwathinda. Mbadi nahimi ni kare mupanguri gho yinu yi.'' ¹⁶ Gallio gha waningithire hashwaye mundhango dhomapangwero. ¹⁷ Podigho waheya ha gahukere Sosthenes, muraghuri gho musinagoge, no ha mupumine kughutho ghothipura thomapangwero. Ene Gallio mbadi gha karire nothinga koyi ha tendire. ¹⁸ Paghulusi, munyima dho kutunga mo mayuwa gho mengi, gha thiyire hayendhendi no kuvoghedha kuSiriya naPrisilia na Akwila. Kughutho gho kushwagha padiya, Cenchrea, gha kukururire huki dhendi pamurandu gho medhero agha ghedhere. ¹⁹ Apa heyire kuEfesusi, Paghulusi gha thiyire haPrisilla naAkwila popo, ene yene gha yendire musinagoge no kakondjitha haJuda. ²⁰ Apa ha mwipurire Paghulusi gha ka kare rure, gha shwenine. ²¹ Ene pakushwagha kukwagho gha ghambire eshi, ''Nanyi na kahuke karo kukwenu pamahimeno ghaNyambi.'' Gha kuthekire gha shwaye muEphesus. ²² Apa Paghulusi gha ka kavere kuCaesarea, gha ka yendire no gha ka tapire dirumeritho kungirishe dhaJerusalema no ghaka ghurumukire kuAntiok. ²³ Munyima dho kakarako kanako ghana, Paghulusi gha tundireko no kupitera muyiko yaGalatiya naPhrygia no katanaritha hakathishongero waheya. ²⁴ Podigho muJuda ghumweya gho dina dyoApollos, mukaAlexandria mukakoghatji, gheyire kuEfesus. Ayene muhunga muyighamba nongcamu muyiparatjangwa. ²⁵ Apollos hamu rawere mumakuhongo ghaFumu. Mukukara mutanavu pamupepo, gha ghambire no kuhonga thiwana yinu kuhatera kwaJesusi, ene gha dimukire ngenyu yo kuhatera kudiyoyero dyaJohanesi. ²⁶ Apollos gha tamekire kughamba noghutjima musinagoge. Ene apa ha muyuvire haPrisilla na Akwila, ha mukokere kumbadi no ka mutjwathanithera ndhira dhaNyambi mughuhunga. ²⁷ Apa gha himine kupitera muAchiya, hayendhendi ha mutjokedhire pa kutjangera kwawaka thishongero muAchiya ha ka mutambure. Apa gha ka kumine, ha ka mughamwenine awa hatawire pathineke. ²⁸ Apollos gha neghedhire haJuda nongcamu munambwe gho mumbunga, ghu neghedhanga kutwara muyiparatjangwa eshi Jesusi ne Kristusi.