¹ Paulusi naye ghakeyire kuDeibe nokuLisitra, namukathishongero ghumweya ghodina Timoteusi moghakarire naye momo, katughuru ghomana mbuyama ghomuJuda ghomutawi; ene wihe ne ghakarire muhirika. ² Haghambathanine hatawi kuhatera kukwendi yoyiwa wa hakarire muLisitra nomuIkoniyumu. ³ Paulusi ghashanine kuyenda nendi, ghamushimbire noghakamukenyine pamurandu wawaJuda wa hakarire mumango gho, wahe hayidimukire eshi wihe ne muhirika. ⁴ Oku wo ne pakuyenda mundhira dhawo ghupita dho yitata, hatapire madimukithero kumangirishe podiyo eshi hatawe, madimukithero gha hapwire kutjanga Hapostoli nawamayami muJerusalema. ⁵ Mangirishe ghapwire kutanaritha pamupepo nokukuwedherera muthitara kehe diyuwa. ⁶ Paulusi nawaghendhendi hayendire ghupita mu yiko ya Phrygia na Galatiya, kutunda pa wawashwenekire Mupepo Ghokupongoka mukuyuvitha manando mu thiko thaAsia. ⁷ Ghopa hakumine pepi nothiko thMysiya, hayerekire kwingena muBithyniya, ene Mupepo waJesusi wawashwenekire. ⁸ Mukupita dhaMysia, haghurumukire muthitata thaTroasi. ⁹ Paulusi gharotire mughuthiku; katughuru ghomu Masedoni ghemanine paya, ghana kumukumbera eshi; '' Mwiye muMasedoniya namutughamwene.'' ¹⁰ Ghapa ghamonine Paulusi yirota yi, popo vene twapakire mo mukuyenda ku Masedoniya, mukuyimanitha eshi Nyambi ghanatwitha mukayuvitha mbudhi dhodhiwa kukwawo ¹¹ Twavoghedhire kutunderera muTroyasi, ghotwa yendire ndhira dho kughororokera kuSamathrase, nomudiyuwa dyo kurandako tweyire kuNeopolisi. ¹² Kutunda ko twayendire kuFilippi, thitata tha Masedoniya, thitata thomudyo muthiko no thawarawero waRoma, notwakakarire muthitata thi mayuwa ghongandji. ¹³ Mudiyuwa dyo Sabata twayendire panunda dhombombwa dhorware, oku twaghayarere kukara dyango dyo mandapero. Twakahungumanine ghotwakaghambire nawambuyama wa heyire pofotji. ¹⁴ Mbuyama ghumweya oyu hatire shi Lydia, mughurithi ghomakehe ghothina ndhirure muthitata tha Thyatira, yu ghakarere Nyambi, ghatutegherere. Fumu ghayandhurure mutjima wendi ghategherere koyi ghaghambire Paulusi. ¹⁵ Apa ghapwire kuyogha naghe nawakadighumbo dyendi ghatukumbere ghuninga shi; '' ngeshi munanimono eshi nakara noghutawedhi kwaFumu, mwiye no mukakare mundhugho dhange.'' no ghatukandere. ¹⁶ Yahokokire ngeno oku twe ne pakuyenda kudyango dyo mandapero, mukamadi ghana yu ghakarire nomupepo ghokupumba ghatumonine. Gharetere mukuru wendi yiyeramo kupitera mu kupumba yokughutho. ¹⁷ Mbuyama yu ghakuthire munyima dhetu naPaulusi no ghakughererire ghuninga eshi, '' Hatutughuru wa ne hapika waNyambi Shokuru. Hanakumuyuvithera ndhira dho makomweneno.'' ¹⁸ Ghayirughanine yi mayuwa ghomengi. Ene Paulusi mukukara shi yamuyedhire thikuma, ghapirukire nokughamba kumupepo ghu shi, '' Nakukurawera mudina dya Jesusi Kristus mukushwagha mwendi.'' nowamushwayire popo vene. ¹⁹ Apa ghayimonine mukuru wendi esh makurupero ghawo ghokutenda masherenyi ne ghana shwaghamo, hawashaghekithire haPaulusi naSilasi nokuwakokera mudyango dyo maghurithero kughutho wakamuragho. ²⁰ Apa hakawaretire kwawapanguri, haghambire eshi; Awa hatutughuru ne ho hana kureta maghukukutu muthitata thetu. Awo ne Hayuda. ²¹ Kuna kuyuvitha muhingo wapira kukara muveta dhokupira kutambura endi kutenda hakaroma ²² Mbunga dhemanganyene haPaulusi naSilasi; mupanguri hapayaghurire mapurapure ghawo no hawarawerire hawamwashure nomatjupa. ²³ Apa hamanine kuwamwashura, hawavukumene mukashitiko no kurawera mukungi ghawakunge thiwana. ²⁴ Munyima dhokuwana marawero gha, mukungi ghawavukumene mukashitiko kokwishi nokughangerera maghuru ghawo kumaghundhi. ²⁵ Pakatji koghuthiku Paulusi naSilasi harapererire wimba membo kwaNyambi nohanu hamwe homukashitiko hawateghererire. popo vene kokukara makineno ghomuve ghomakuru, nokashema ndhugho kokashitiko kashekeshire; ²⁶ Popo vene makungu ghomahe ghayandhurukire, nomenge ghomahe ghayomuhe ghashutaghukire. ²⁷ Mukungi gho kashitiko ghayakumukire muturo no ghamonine mathero ghanayandhuruka; ghashimbire thimende thendi noghashanine ghakupaghe thinda, yoyishi ghaghayarire shi hakakashitiko ne hanomboroka. ²⁸ Ene Paulusi ghakughererire nodiywi dyodikuru, ghuninga eshi; '' Wakwipitha ghothinda, yoyishi twahe motudi.'' ²⁹ Mukungi ghamunekire munyenge noghengenine mwishi ghututuma kuwoma, no ghakuvamine kughutho waPaulusi naSilasi, ³⁰ noghawaretire panunda no kughamba eshi, '' Mwakamakuto, yipi shonikone kutenda nipwe kughamwena?'' ³¹ Haghambire, ''Tawe mwaFumu Jesusi, noghunakupwa kughamwena, nowe nodighumbo dyoe.'' ³² Haghambire nando dhaFumu kukwendi nawakadighumbo dyendi. ³³ Mukungi ghawashimbire dhodho viri dhofotji dhoghuthiku, no kayogha yitombo yawo, ndani naye no dighumbo dyendi dyodiheya hapwire kuyogha popo vene. ³⁴ Ndani apa gharetire ha Paulusi na Silasi mundhugho dhendi ghanawaturere yokudya. Ghashambererire thikuma nawakadighumbo dyendi eshi, ghana tawa mwaNyambi. ³⁵ Apa dyavire diyuwa, hapanguri hatumine mbudhi kwawakungi, ghuninga eshi, '' Muthiye waya hatutughuru hayende.'' ³⁶ Mukungi ghanatongore kwa Paulusi, ghuninga eshi, '' haraghuri hanatumu mbudhi mukumuthiya muyende. Pano keho mushwaghe no kuyenda muthiraro.'' ³⁷ Ene Paulusi ghawahutha eshi; ngahatupumura thitunu meho nokutupangura temba, ngambi kemo atwene twatungimo homuRoma no hatupakire mukashitiko. Gho hanashana kututuma tuyende mughudhindo? Mbadi kemo! mukawatongwere hakeye hathinda nohatushwayithe.'' ³⁸ Hakungi hakatapire manando gha kwawapanguri, apa hakayuvire eshi haPaulusi naSilasi ne hakaRoma ne hayapire. ³⁹ Haraghuri hakeyire no hanawarombire mathiyerero no kunawashwayitha, nokuwaninga hashwaghe muthitata. ⁴⁰ HaPaulusi naSilasi hashwayire mu kashitiko no hakeyire kundhugho dha Lydia. Apa hana monine haPaulusi naSilasi hatawi, hanawatjokedhire ndani ghohashwayire muthatata.