¹ Mo matsatsing ao, fa go neng go se na kgosi mo Iseraele, go ne go na le monna, molefi, a nna ga nakwana kwa lefelong le le fitlhegileng mo lefatsheng la dithaba la Iforeimi. A itseela mosadi, nyatsi go tswa kwa Bethelehema mo Juta. ² Mme nyatsi ya gagwe e ne e se boikanyego mo go ene; a mo tlogela a boela morago kwa ntlong ya ga rraagwe kwa Bethelehema wa Juta. A nna koo dikgwedi di le nne. ³ Foo monna wa gagwe a ema a mo latela gore a tle a mo gogele ka puo gore a boe. Motlhanka wa gagwe o ne a na le ene le ditonki di le pedi. Mosadi a mo tsisa mo ntlong ya ga rraagwe. Fa rraagwe mosetsana a mmona, a itumela. ⁴ Mogwegadi wa gagwe, rraagwe mosetsana, a mo gogela ka puo go nna matsatsi a mararo. Ba ja ba nwa, ba lala bosigo koo. ⁵ Mo letsatsing la bone ba tsoga maphakela a matona mme a ipaakanyetsa go tsamaya, mme rraagwe mosetsana a raya mogwe wa gagwe a re, ''Ithatafatse ka borotho bo le bonnye, ke gone o bo o ka tsamaya.'' ⁶ Jalo bobedi jwa bone jwa nna fa fatshe ba ja ba nwa mmogo. Foo rraagwe mosetsana a re, ''Tsweetswee eletsa go lala bosigo mme o nne le nako e ntle.'' ⁷ Fa molefi a ema ka dinao go tsamaya, rraagwe kgarebe a mo rotloetsa go nna, jalo a fetola lenaneo a lala bosigo foo gape. ⁸ Ka letsatsi la botlhano a tsoga maphakela a matona go tsamaya, mme rraagwe mosetsana a re, ''Ithatafatse, leta go fitlha mo tshokologong.'' Jalo bobedi jwa bone jwa ja mmogo. ⁹ Fa molefi, nyatsi ya gagwe le motlhanka wa gagwe ba emelela go tsamaya, mogwegadi wa gagwe, rraagwe mosetsana, a mo raya a re, ''Bona letsatsi le tsamaela go ya kwa maitseboeng. Tsweetswee lala bosigo jo bongwe gape, mme o nne le nako e ntle. O ka tsoga maphakela thata kamoso o bo o boela gae.'' ¹⁰ Mme molefi o ne a sa ikemisetsa go lala. A ema ka dinao a tsamaya. A tsamaela kwa Jebuse (ke gore Jerusalema). O ne a na le ditonki tse pedi tse di nang le disale - mme nyatsi ya gagwe e ne e na le ene. ¹¹ Fa ba le gaufi le Jebuse, letsatsi le ne le le gaufi le go phirima, mme motlhanka a raya mong wa gagwe a re, ''Tla, a re fapogele kwa toropokgolong ya Bajebusi mme re lale bosigo mo go yone.'' ¹² Mong wa gagwe a mo raya a re, ''Ga re fapogele mo toropokgolong ya batswakwa ba e seng batho ba Iseraele. Re tla tswelela re ya kwa Gibea.'' ¹³ Molefi a raya mokau wa gagwe a re, ''Tla, a re ye kwa lengweng la mafelo a mangwe ale, mme re lale mo Gibea kgotsa Rama.'' ¹⁴ Jalo ba tswelela, mme letsatsi la phirima jaaka ba atamela kwa Gibea, mo lefatsheng la Benjamene. ¹⁵ Ba fapoga foo go lala bosigo mo Gibea. A tsena mo teng a nna fa fatshe mo patlelong ya toropokgolo, gonne go ne go se na ope yo o ba tseelang kwa ga gagwe go lala teng. ¹⁶ Mme foo monnamogolo mongwe a tla a tswa kwa tirong ya gagwe kwa tshimong mo maitseboeng ao. O ne a tswa kwa lefatsheng la dithaba la Iforeimi,mme a nna ka nakwana mo Gibea. Mme banna ba ba neng ba nna mo lefelong leo e ne e le Babenjamene. ¹⁷ A tsholetsa matlho a gagwe mme a bona mosepedi mo patlelong ya toropokgolo. Monnamogolo a re, ''O ya kae? O tswa kae?'' ¹⁸ Molefi a mo raya a re, ''Re mo tseleng go tswa Bethelehema mo Juta re ya kwa lefelong le le fitlhegileng mo lefatsheng la dithaba la Iforeimi, gone kwa ke tswang teng. Ke ne ke ile kwa Bethelehema mo Juta, mme ke ya kwa ntlong ya Modimo Yahweh, mme ga go na ope yo o tla ntseelang kwa ntlong ya gagwe. ¹⁹ Re na le letlhaka le dijo tsa ditonki tsa rona, gape go na le borotho le mofine wa me le motlhanka wa gago wa mosadi yo, le monnana yo o nang le batlhanka ba gago yo. Ga re tlhoke sepe.'' ²⁰ Monnamogolo a ba dumedisa, ''Kagiso e nne le lona! Ke tla le tlamela ka tsotlhe. Mme fela le se ka la lala mo patlelong.'' ²¹ Jalo monna a tsisa molefi mo ntlong ya gagwe, mme a fa ditonki dijo. Ba tlhapa dinao tsa bone, ba ja ba nwa. ²² Fa ba santse ba itumedisa dipelo tsa bone, banna bangwe mo toropokgolong, banna ba ba senang mosola, ba dikaganyetsa ntlo, ba itaya lebati. Ba bua le monnamogolo, mong wa ntlo, ba re, ''Ntshetsa kwa ntle monna yo o tseneng mo ntlong ya gago, gore re tle re robalane le ene.'' ²³ Monna, mong wa ntlo, a tswela kwa ntle kwa go bone mme a ba raya a re, ''Nyaa, barwarre, tsweetswee le se ka la dira selo se se bosula se! Ka gonne monna yo ke moeng mo ntlong ya me, le se ka la dira selo se sa boikepo! ²⁴ Bonang, morwadiake wa kgarebana le nyatsi ya gagwe ba fa. Mma ke ba tsise jaanong. Ba beteleleng le dire sepe se le se ratang ka bone. Mme le se ka la dira selo sa boikepo se se ntseng jalo ka monna yo!'' ²⁵ Mme banna ba se ka ba mo reetsa, jalo monna a tsaya nyatsi ya gagwe a e ntshetsa kwa ntle kwa go bone. Ba mo tsaya, ba mmetelela, ba mo dirisa botlhaswa bosigo jotlhe, mme ka maphakela a matona ba mo lesa. ²⁶ Maphakela a matona mosadi a tla mme a wela fa fatshe fa lebating la ntlo ya monnamogolo kwa mong wa gagwe a neng a le teng, mme a rapalala foo go fitlha go nna lesedi. ²⁷ Mong wa gagwe a tsoga mo mosong a bula mabati a ntlo mme a tswela kwa ntle gore a tsamae. O ne a kgona go bona nyatsi ya gagwe e rapaletse fa lebating, diatla tsa gagwe di tshwere bontlha jwa lebati. ²⁸ Molefi a mo raya a re, ''Tsoga. A re tsamae,'' Mme ga se ka ga nna le karabo. A mmaya mo godimo ga tonki, mme monna a ya gae. ²⁹ Fa molefi a goroga kwa ntlong ya gagwe, a tsya thipa, a tshwara nyatsi ya gagwe, mme a mo kgaoganya, serwe ka serwe, a dira ditoki tse lesome le bobedi, mme a romela ditoki gongwe le gongwe mo Iseraele. ³⁰ Botlhe ba ba neng ba bona se ba re, ''Selo se se ntseng jaana ga se ise se dirwe kgotsa sa bonwa go tloga ka letsatsi le batho ba Iseraele ba duleng kwa lefatsheng la Egepeto go fitlha gompieno. Akanya ka sone! Re fe kgakololo! Re bolelele gore re dire eng!''