¹ Go ne ga itumedisa Tariase go tlhoma mo bogosing jwa gagwe balaodi ba dikgaolo ba le 120 ba ba tla busang mo bogosing jotlhe. ² Godimo ga bone go ne go le batsamaisibagolo ba le 3, Taniele o ne a le mongwe wa bone. Batsamaisibagolo ba ba ne ba tlhometswe go okamela balaodi ba dikgaolo gore kgosi a se ka a latlhegelwa ke sepe. ³ Taniele o ne a itlhaotse mo batsamaisibagolong le balaoding ka gonne o ne a na le mowa o o sa tlwaelesegang. Kgosi o ne a rulaganya go mo tlhoma go okamela bogosi jotlhe. ⁴ Foo batsamaisi ba bangwe le balaodi ba batla diphoso mo tirong e Taniele a e direlang bogosi. Mme ba se ka ba bona go senya kgotsa go palelwa mo tirong ya gagwe gonne o ne a le boikanyego. Diphoso le go latlhelela ga se ka ga bonala mo go ene. ⁵ Foo banna ba ba re, ''Ga re ka ke ra bona lebaka la go ngongorega ka Taniele yo, fa e se re ka bona sengwe mo go tse di amang molao wa Modimo wa gagwe.'' ⁶ Foo batsamaisi ba le balaodi ba tsisa leano fa pele ga kgosi. Ba mo raya ba re, ''Kgosi Tariase, tshelela ruri! ⁷ Batsamaisibagolo botlhe ba bogosi, balaodi ba dikgaolokgolo, balaodi ba dikgaolo, bagakolodi, le balaodi ba rerisantse mmogo ba swetsa gore wena, kgosi, o tshwanetse go ntsha taolo o bo o patike gore e dirwe, gore ope yo o isang kopo kwa modimong ofe kgotsa kwa mothong mo matsatsing a le 30, ntleng le go bo a kopa mo go wena, kgosi, motho yoo o tshwanetse a latlhelwe mo legageng la ditau. ⁸ Jaanong, kgosi, ntsha taolo o bo o beye monwana pampiri gore e se ka ya fetolwa, jaaka o kaelwa ke molao wa Bamete le Baperesia, ga o ka ke wa sutlhiwa.'' ⁹ Jalo kgosi Tariase a baya pampiri monwana gore taolo e nne molao. ¹⁰ E rile fa Taniele a utlwa gore pampiri e beilwe monwana go nna molao, a tsena mo ntlong ya gagwe ( jaanong matlhabaphefo a gagwe a ne a butswe kwa kamoreng e e kwa godimo go leba kwa Jerusalema ), a khubama ka mangole a gagwe, jaaka a ne a tlwaetse go dira ga 3 ka letsatsi, a rapela a fa malebogo fa pele ga Modimo wa gagwe, jaaka a kile a dira go le pele. ¹¹ Foo banna ba ba neng ba logile segwenegwene mmogo ba bona Taniele a kopa a bo a batla thuso mo Modimong. ¹² Go tloga foo ba atamela kgosi ba bua le ene ka taolo ya gagwe, ''A ga o a ntsha taolo e e reng ope yo o kopang modimo ope kgotsa motho ope, ntleng le fa a kopa wena, kgosi, mo matsatsing a a 30 a a tlang, o tshwanetse go latlhelwa mo legageng la ditau?'' Kgosi a araba, ''Kgang e weditswe go ya jaaka re kaelwa ke molao wa Bamete le Baperesia; ga e ka ke ya sutlhiwa.'' ¹³ Foo ba fetola kgosi, ''Ene motho gotweng Taniele, yo e leng mongwe wa bayalejwa ba Juta, ga a na sepe le wena, kgosi, le taolo e o e beileng monwana. O rapela Modimo wa gagwe ga 3 ka letsatsi.'' ¹⁴ E rile kgosi a utlwa se, a tshwenyega mo go golo, a akanya thata ka go namola Taniele mo katlholong e. A kgaratlha go boloka Taniele go fitlhela letsatsi le phirima. ¹⁵ Foo banna ba ba logileng segwenegwene ba kopana le kgosi ba mo raya ba re, ''Itse, kgosi, gore ke molao wa Bamete le Baperesia, ga go na taolo epe le molawana ope o o ntshiwang ke kgosi o o ka fetolwang.'' ¹⁶ Kgosi a ntsha taelo, ba tsisa Taniele, ba mo latlhela mo legageng la ditau. Kgosi a raya Taniele a re, ''A Modimo wa gago yo o mo direlang ka dinako tsotlhe, a go namole.'' ¹⁷ Letlapa la bewa fa kgorong ya legaga, mme kgosi a le baya setlanyo le letshwao la mhitshana wa gagwe mmogo le mehitshana ya batlotlegi ba gagwe gore go se nne se se ka fetolwang ka ga Taniele. ¹⁸ Foo kgosi a ya kwa ntlong ya gagwe ya segosi, a nna bosigo jotlhe a ikiditse dijo. Tse di kgatlhisang tsa se ka tsa tsisiwa fa pele ga gagwe, le boroko a se ka a bo bona. ¹⁹ E rile fa letsatsi le tlhaba kgosi a ya ka bonako kwa legageng la ditau. ²⁰ Jaaka a atamela legaga, a bitsa Taniele ka lentswe le le utlwileng botlhoko, a raya Taniele a re, ''Taniele, motlhanka wa Modimo yo o tshelang, a Modimo wa gago, yo o mo direlang ka dinako tsotlhe o kgonne go go boloka mo ditaung?'' ²¹ Foo Taniele a raya kgosi a re, ''Kgosi, tshelela ruri! ²² Modimo wa me o rometse morongwa, o tswetse melomo ya ditau, ga di a nkutlwisa botlhoko. Gonne ke bonwe ke sena molato fa pele ga gagwe le fa pele ga gago, kgosi, e bile ga ke a go golafatsa.'' ²³ Foo kgosi a itumela thata. A ntsha taelo gore Taniele a ntshiwe mo legageng. Ke gone Taniele a ntshiwa mo legageng. Ga fitlhelwa a sa golafala gope, gonne o ne a tshepile mo Moding wa gagwe. ²⁴ Go tloga foo kgosi a ntsha taelo, ba tsisa banna ba ba neng ba patika Taniele ba latlhelwa mo legageng la ditau - bone, bana ba bone le basadi ba bone. Pele ba wela fatshe, ditau tsa ba rubelela tsa ba roba marapo go nna dikarolwana. ²⁵ Foo kgosi Tariase a kwalela batho botlhe, ditshaba, le diteme tse di nnang mo lefatsheng lotlhe: ''A kagiso e le ntsifalele. ²⁶ Ke le fa, ke ntsha taolo gore gope kwa bogosi jwa me bo laolang teng, batho ba rorome ba bo ba boife fa pele ga Modimo wa ga Taniele, gonne ke Modimo yo o tshelang e bile o tshelela ruri, bogosi jwa gagwe ga bo ka ke jwa senngwa; go busa ga gagwe ga go na phelelo. ²⁷ O a re boloka ebile o a re namola, o dira dikai le dikgakgamatso kwa legodimong le mo lefatsheng; o somaretse Taniele mo thateng ya ditau.'' ²⁸ Jalo Taniele o ne a atlega ka nako ya puso ya ga Tariase le ka nako ya puso ya ga Saerase wa Moperesia.