¹ Mo ngwageng wa bo 1 wa go busa ga ga Beleshasara, kgosi ya Babilona, Taniele a nna le toro le diponatshegelo a santse a rapame mo bolaong jwa gagwe. Foo a kwala tse a neng a di bona mo torong ya gagwe. O ne a kwala ditiragalo tse di botlhokwa: ² Taniele a tlhalosa, ''Mo ponatshegelong ya me bosigo ke ne ka bona diphefo tse 4 tsa legodimo di fudua lewatle le le golo. ³ Diphologolo tse 4 tse ditona, nngwe e farologanye le e nngwe, tsa tswa mo lewatleng. ⁴ Ya bo 1 e ne e tshwana le tau mme e na le diphuka tsa ntsu. Jaaka ke santse ke lebile, diphuka tsa yone tsa kumulwa mo go yone, ya tsholediwa go tswa fatshe, ya bewa ka maoto a a 2, jaaka motho. Ya neelwa tlhaloganyo ya motho. ⁵ Go tloga foo ga nna le phologolo ya bo 2, e tshwana le bera, e iname; e ne e tshotse dikgopo tse 3 ka meno a yone mo molomong wa yone. E ne ya tewa gotwe, 'Emelela o kometse batho ba le bantsi.' ⁶ Morago ga se, ka leba gape. Go ne go na le phologolo e nngwe gape, e e tshwanang le lengau. Mo mokwatleng wa yone e ne e na le diphuka tse 4, diphuka tse e keteng tsa nonyane, gape e na le ditlhogo tse 4. E ne ya neelwa taolo ya go busa. ⁷ Morago ga se ka bona mo torong ya me bosigo, phologolo ya bo 4, e boitshega, e le maatla. E ne e na le meno a magolo a tshipi; e ne e kometsa, e robaganya, e gata ka maoto sepe se neng se setse. E ne e farologanye le diphologolo tse dingwe, e na le dinaka tse 10. ⁸ Fa ke santse ke akanya ka dinaka, ka leba ka bona lonaka lo longwe lo gola fa gare ga tsone, lonaka lo lo nnye. Dinaka tse 3 mo go tsa ntlha, tsa kumolwa ka medi. Mo lonakeng lo ka bona matlho, matlho a eketeng ke a motho le molomo o o neng o ikgantsha ka dilo tse dikgolo. ⁹ Jaaka ke ne ke lebile, ditilo tsa bogosi di ne tsa tlhongwa, mme Wa Matsatsi A Bogologolo a nna setilo sa gagwe. Diaparo tsa gagwe di ne di le ditshweu jaaka kapoko, moriri wa tlhogo ya gagwe o tshwana le boboa jwa nku jo bo phepa. Setilo sa bogosi sa gagwe e ne e le dikgabo tsa molelo, mme maotwana a sone e le molelo o o tukang. ¹⁰ Noka ya molelo ya elelela kwa ntle go tswa fa pele ga gagwe; ba le di 1000 000 ba mo direla, mme ba le 100 000 000 ba ne ba eme fa pele ga gagwe. Kgotla ya ditsheko e ne e tsweletse, dibuka di ne di bulwa. ¹¹ Ke ne ka tswelela ke lebile ka lebaka la mafoko a boikgantsho a a neng a buiwa ke lonaka. Ka leba fa phologolo e bolaiwa, le fa mmele wa yone o senngwa, ya bo ya isiwa go tshubiwa. ¹² Fa e le ka diphologolo tse 4 tse dingwe, taolo ya tsone ya go busa e ne ya tsewa, mme matshelo a tsone a leelefadiwa ka nako e e beilweng. ¹³ Mo diponatshegelong tsa me bosigo joo, ke ne ka bona mongwe a tla le maru a legodimo jaaka morwa motho; o ne a tla kwa go Wa Matsatsi A Bogologolo, a tsisiwa fa pele ga gagwe. ¹⁴ Taolo ya go busa, kgalalelo, maatla a segosi a di neelwa gore batho botlhe, ditshaba, le diteme di mo direle. Taolo ya gagwe ya go busa ke taolo ya bosakhutleng e e se kitlang e feta, le bogosi jwa gagwe ke jo bo se kitlang bo senngwa. ¹⁵ Fa e le nna, Taniele, mowa wa me o ne o hutsafetse mo teng ga me, le diponatshegelo tse ke neng ke di bona mo tlhaloganyong ya me di ne tsa ntshwenya. ¹⁶ Ke ne ka ya fa mongweng wa ba ba neng ka eme foo, ka kopa gore a mpontshe gore dilo tse di raya eng. ¹⁷ 'Diphologolo tse ditona tse, tse 4 ka palo, ke magosi a a 4, a a tla emelelang mo lefatsheng. ¹⁸ Mme batho ba ba boitshepo ba Mogodimodimo ba tla amogela bogosi, gape ba tla bo tshola go ya go ileng.' ¹⁹ Foo ka batla go itse go le gontsi ka phologolo ya bo 4 - e ne e farologanye le tse dingwe thata, ebile e boifisa ka meno a yone a tshipi le dinala tsa kgotlho; e ne e kometsa, e robaganya go nna dikarolwana, e gata ka maoto mo go neng go setse. ²⁰ Ke ne ke batla go itse ka dinaka tse di 10 tse di mo tlhogong ya yone, le ka lonaka lo longwe lo lo neng lwa gola, le dinaka tse 3 tse dingwe tse di neng tsa wa fa pele ga lone. Ke ne ke batla go itse ka lonaka lo lo neng lo na le matlho, le molomo o o neng o ikgantsha ka dilo tse dikgolo, lo lo neng lo lebega lo le legolo go feta tse dingwe. ²¹ Jaaka ke ne ke lebeletse, lonaka lo lo ne lwa bolotsa ntwa kgtlhanong le batho ba ba boitshepo lo bile lo ba fenya, ²² go fitlhela Wa Matsatsi A Bogologolo a tla, mme tshiamelo ya neelwa batho ba Mogodimodimo. Foo ga tla nako e batho ba ba boitshepo ba neng ba amogela bogosi. ²³ Se ke se motho yoo a neng a se bua, 'Fa e le ka phologolo ya bo 4, e tla nna bogosi jwa bo 4 mo lefatsheng jo bo tla farologanang le magosi a mangwe. Bo tla kometsa lefatshe lotlhe, bo tla le gata ka dinao, bo bo bo le thuba diphatlo. ²⁴ Fa e le ka dinaka tse 10, go tswa mo bogosing jo dikgosi tse 10 di tla emelela, mme e ngwe e tla emelela fa morago ga tsone. E tla bo e farologanye le tsa pele, gape e tla fenya dikgosi tse 3 tse. ²⁵ E tla bua kgatlhanong le Mogodimodimo, ebile e tla gatelela batho ba ba boitshepo ba Modimo Mogodimodimo. E tla leka go fetola mekete le molao. Dilo tse di tla neelwa mo seatleng sa yone ngwaga e le 1, tse 2, le sephatlo sa ngwaga. ²⁶ Mme kgotla ya ditsheko e tla bo e tsweletse, ba tla e tseela maatla a yone a segosi gore e tle e komediwe e bo e senngwe kwa bofelong. ²⁷ Bogosi le puso, le bogolo jwa magosi a a ka fa tlase ga legodimo lotlhe, a tla neelwa batho ba e leng bagagabo batho ba ba boitshepo ba Mogodimodimo. Bogosi jwa gagwe ke bogosi jo bo sa khutleng, mme magosi a mangwe otlhe a tla mo direla a bo a mo utlwa.' ²⁸ Fa ke bokhutlo jwa kgang. Fa e le nna, Taniele, dikakanyo tsa me di ne tsa ntlhantsha mo go golo le go lebega ga sefatlhego sa me ga fetoga. Mme ke ne ka ipeela dilo tse mo pelong.''