¹ Kgosi Beleshasara o ne a direla banna ba batlotlegi ba gagwe ba ba 1000 moletlo o mogolo, a nwa mofine fa pele ga bone botlhe ba ba 1000. ² Fa Beleshasara a santse a utlwa mofine, kgosi Beleshasara a ntsha taolo gore go ntshiwe dijana tsa gauta kgotsa selefera tse Nebukatenesara rraagwe a di tsereng mo tempeleng kwa Jerusalema, tse ene, banna ba batlotlegi, basadi ba gagwe le dinyatsi tsa gagwe ba neng ba ka nwa ka tsone. ³ Batlhanka ba tsisa dijana tsa gauta tse di tserweng mo tempeleng, ntlo ya Modimo, kwa Jerusalema. Kgosi, banna ba batlotlegi ba gagwe, basadi ba gagwe le dinyatsi tsa gagwe, ba nwa ka tsone. ⁴ Ba nwa mofine ba boka medingwana ya bone ya disetwa e e dirilweng ka gauta, selefera, kgotlho, tshipi, legong le letlapa. ⁵ Ka nako yone eo menwana ya seatla sa motho ya bonala fa pele ga setlhomo sa lebone e kwala mo leboteng mo ntlong ya segosi. Kgosi o ne a bona bontlha jwa seatla jaaka se ne se kwala. ⁶ Go tloga foo sefatlhego sa kgosi sa fetoga, dikakanyo tsa gagwe tsa mo tshosa, maoto a gagwe a palelwa ke go mo tshegetsa, mangole a gagwe a itaana. ⁷ Kgosi a goa taelo gore go tsisiwe ba ba ikayang ba bua le baswi, borramatlhale, le balepi ba metsamao ya dinaledi. Kgosi a raya ba ba itsegeng ka botlhale jwa bone mo Babilona a re, ''Ope yo o tla tlhalosang mokwalo o le gore o raya eng o tla apesiwa mmala o o phepole le keetanyana ya gauta mo molaleng. O tla nna le taolo ya mmusi wa bo 3 yo o kwa godimo mo bogosing.'' ⁸ Foo banna botlhe ba kgosi ba ba neng ba itsewe ka botlhale jwa bone ba tsena ka kwa teng, mme ba palelwa ke go bala mokwalo le go tlhalosetsa kgosi gore o raya eng. ⁹ Foo kgosi Beleshasara a tlhantshega mo go golo le tebego ya sefatlhego sa gagwe ya fetoga. Banna ba gagwe ba batlotlegi ba gakgamala. ¹⁰ Jaanong mohumagadi a tla a tsena mo ntlong ya meletlo ka lebaka la se kgosi le banna ba batlotlegi ba se buileng. Mohumagadi a re, ''Kgosi, tshelela ruri! Se letlelele dikakanyo tsa gago go go tshwenya. Se letlelele tebego ya sefatlhego sa gago go fetoga. ¹¹ Go na le monna mo bogosing jwa gago yo o nang le mowa wa badimo ba ba boitshepo. Mo dinakong tsa ga rraago, lesedi le go tlhaloganya le botlhale, botlhale jaaka jo bo mo badimong bo ne jwa bonwa mo go ene. Kgosi Nebukatenesara, kgosi rraago, o ne a mo dira moeteledipele wa borramasalamose, ba ba ikayang ba bua le badimo, borramatlhale le balepi ba metsamao ya dinaledi. ¹² Mowa o o gaisang, kitso , go tlhaloganya, go ranola ditoro, go tlhalosa diane le go rarabolola mathata - dilo tsotlhe tse di tlhokafalang tse di ne tsa bonwa mo monneng yo, Taniele, yo kgosi a neng a mmitsa Beleteshasara. Jaanong bitsa Taniele o tla tla a go bolelela gore se se kwadilweng se raya eng.'' ¹³ Taniele a tsisiwa fa pele ga kgosi. Kgosi a mo raya a re, ''O Taniele yole, mongwe wa batho ba bayalejwa ba Juta, ba kgosi, rre, a neng a ba tsaya kwa Juta. ¹⁴ Ke utlwile ka ga wena, gore mowa wa badimo o mo go wena, le gore lesedi le go tlhaloganya le botlhale jo bo gaisang di bonwa mo go wena. ¹⁵ Jaanong banna ba ba itseweng ka botlhale, le ba ba ikayang ba bua le baswi, ba ne ba tsisitswe kwa go nna, go bala mokwalo o le go nkitsise thanolo ya one, mme ba paletswe ke go bolela thanolo ya one. ¹⁶ Ke utlwile gore o kgona go fa dithanolo le go rarabolola mathata. Jaanong fa o ka bala mokwalo o wa ba wa mpolelela gore o raya eng, o tla apesiwa bophepole le keetanyana ya gauta mo molaleng o bo o nna le taolo ya mmusi wa bo 3 mo bogosing.'' ¹⁷ Foo Taniele a araba fa pele ga kgosi, ''A dimpho tsa gago di nne tsa gago. Dikatso tsa gago o di neele motho yo mongwe. Le fa go ntse jalo, kgosi, ke tla bala mokwalo ke bo ke go bolelela gore o raya eng. ¹⁸ Fa e le wena, kgosi, Modimo Mogodimodimo o file Nebukatenesara rraago bogosi, bogolo, tlotla le borena. ¹⁹ Ka lebaka la bogolo jo Modimo a bo mo neileng, batho, ditshaba le diteme di ne di roroma di bo di mmoifa. O ne a bolaya ba a neng a batla ba swa, o ne a somarela ba a neng a batla ba tshela. O ne a tsholetsa ba a neng a ba batla, o ne a folosa maemo ba a neng a eletsa go ba folosa. ²⁰ Mme e rile fa pelo ya gagwe e le makgakga le mowa wa gagwe o kwakwaletse mo a neng a itsholetsa, o ne a folosiwa mo setilong sa bogosi, mme ba tsaya borena jwa gagwe. ²¹ O ne a lelekelwa kwa ntle ga batho, o ne a nna letlhaloganyo ya phologolo, a bo a tshela le ditonki tsa naga. O ne a hula bojang jaaka pholo. Mmele wa gagwe o ne o kolobeiwa ke monyo wa magodimo go fitlhela a ithuta gore Modimo Mogodimodimo o busa magosi a batho le gore o a neela ope yo a eletsang go a mo neela. ²² Wena morwa wa gagwe, Beleshasara, ga o a kokobetsa pelo ya gago, mme o ntse o itse se. ²³ O itsholeleditse kwa godimo kgatlhanong le Morena wa legodimo. Go tswa mo ntlong ya gagwe ba ne ba go tsisetsa dijana tse wena, batlotlegi ba gago, basadi ba gago, le dinyatsi tsa gago le neng la nwa mofine ka tsone, la bo la boka medingwana ya disetwa ya lona ya gauta, selefera, kgotlho, tshipi, legong le letlapa - medingwana ya disetwa e e sa boneng, e e sa utlweng e bile e sa itse sepe. Ga o a tlotla Modimo yo o tshotseng mowa wa gago mo seatleng sa gagwe, yo o itseng ditsela tsotlhe tsa gago. ²⁴ Foo Modimo a romela seatla go tswa kwa bolengteng jwa gagwe mme mokwalo o wa dirwa. ²⁵ O ke mokwalo o o neng wa dirwa; 'Mene, mene, tekel, le pharsin.' ²⁶ Go raya se; 'Mene,' 'Modimo o file bogosi jwa gago palo e bile o bo tsisitse kwa bokhutlong.' ²⁷ 'Tekel,' 'O a kalwa mo sekaleng mme o fitlhelwa o tlhaela.' ²⁸ 'Peres,' 'Bogosi jwa gago bo kgaogantswe e bile bo neetswe Bamete le Baperesia.''' ²⁹ Go tloga foo Beleshesara a ntsha taolo, ba apesa Taniele bophepole. Keetanyana ya gauta a e apesiwa mo molaleng, kgosi a bolela phatlalatsa gore o tla nna le taolo ya mmusi wa bo 3 mo bogosing. ³⁰ Bosigong joo, Beleshasara, kgosi ya Bababilona a bolaiwa, ³¹ mme Tariase wa Momete a amogela bogosi a le dingwaga di le 62.