¹ Foo merafe yotlhe ya Iseraele ya tla kwa go Tafita kwa Heberone, mme ba re, ''Leba, re nama le marapo a gago. ² Mo bogologolong jo bo fetileng, Saulo a santse a le kgosi ya rona, e ne e le wena yo o eteletseng sesole sa Iseraele. Modimo Yahweh o ne a go raya a re, 'O tla disa batho ba me ba Iseraele, gape o tla nna mmusi mo Iseraele.''' ³ Jalo bagolwane botlhe ba Iseraele ba tla kwa kgosing kwa Heberone, mme kgosi Tafita a dira kgolagano le bone fa pele ga Modimo Yahweh. Ba tlotsa Tafita go nna kgosi mo Iseraele. ⁴ Tafita o ne a le dingwaga di le 30 fa a simolola go busa, mme o ne a busa dingwaga di le 40. ⁵ Kwa Heberone o ne a busa Juta dingwaga di le 7 le dikgwedi di le thataro, mme mo Jerusalema o ne a busa Iseraele otlhe le Juta dingwaga di le 33. ⁶ Kgosi le banna ba gagwe ba ya Jerusalema go tlhasela Bajebusi, banni ba lefatshe leo. Ba raya Tafita ba re, ''Ga o na go tla fa ntleng le gore o busediwe morago ke difofu le digole. Tafita ga a ka ke a tla fa.'' ⁷ Le fa go ntse jalo, Tafita o ne a gapa boremelelo jwa Sione, jo jaanong e leng jone toropokgolo ya ga Tafita. ⁸ Ka nako eo Tafita a re, ''Bao ba tlhaselang Bajebusi ba tla tlamega go ralala moedi wa metsi go fitlha kwa 'difofung le digoleng', ba e leng baba ba ga Tafita.'' Ke sone se batho ba reng, ''A 'difofu le digole' di se ka tsa tsena mo ntlong ya bogosi.'' ⁹ Jalo Tafita a nna mo boremelelong, mme a bo bitsa Toropokgolo ya ga Tafita. A e agelela mo go thata go e dikologa, go tswa ka kwa ntle go ya ka kwa teng. ¹⁰ Tafita a nna maatla mo go golo gonne Modimo Yahweh, Modimo wa masomosomo, o ne a na le ene. ¹¹ Foo Hiramo kgosi ya Tire a romela barongwa kwa go Tafita, le ditlhare tsa mesetara, le babetli, le bathudi ba matlapa. Ba agela Tafita ntlo. ¹² Tafita o ne a itse fa Modimo Yahweh a mo tlhomile kgosi mo Iseraele le gore o tsholeditse bogosi jwa gagwe ka ntata ya batho ba gagwe ba Iseraele. ¹³ Morago fa Tafita a sena go tswa mo Heberone a ya kwa Jerusalema, a oketsa dinyatsi le basadi ba gagwe mo Jerusalema, mme a tsholelwa barwa le barwadi ba le bantsi. ¹⁴ A ke maina a bana ba a neng a ba tsholelwa mo Jerusalema: Shamua, Shobabe, Nathane, Solomone, ¹⁵ Ibara, Elishua, Nefege, Jafia, ¹⁶ Elishama, Eliata, le Elifelete. ¹⁷ Jaanong fa Bafilisitia ba utlwa fa Tafita a tloditswe go nna kgosi mo Iseraele, ba ne ba tswela kwa ntle ba mmatla. Mme Tafita a utlwa ka se mme a ya kwa boremelelong. ¹⁸ Jaanong Bafilisitia ba ne ba tsile ba ikanamisa mo mokgatsheng wa Refaime. ¹⁹ Foo Tafita a kopa thuso go tswa kwa go Modimo Yahweh. A re, ''A ke tlhasele Bafilisitia? A o tla mpha phenyo mo go bone?'' Modimo Yahweh a raya Tafita a re, ''Tlhasela, gonne ammaaruri ke tla go neela phenyo mo Bafilisitieng.'' ²⁰ Jalo Tafita a tlhasela kwa Bale Perasimi, mme a ba fenya koo. A bua jaana, ''Modimo Yahweh o phunyeleditse mo gare ga baba ba me fa pele ga me jaaka go phunyeletsa ga morwalela wa metsi.'' Jalo leina la lefelo leo la nna Bale Perasimi. ²¹ Bafilisitia ba tlogela medingwana ya disetwa ya bone koo, mme Tafita le banna ba gagwe ba e rwala ba tsamaya ka yone. ²² Foo Bafilisitia ba tla gape, mme ba anama gape mo mokgatsheng wa Refaime. ²³ Jalo Tafita a batla thuso kwa go Modimo Yahweh gape, mme Modimo Yahweh a mo raya a re, ''O se ka wa ba tlhasela o tswa kwa pele ga bone, mme o ba dikologe ka kwa morago mme o tle mo go bone fa gare ga ditlhare tsa mamurubele. ²⁴ Fa o utlwa modumo wa dikgato tsa masole mo phefong e e fokang mo ditlhoeng tsa mamurubele, foo o tlhasele ka dikgoka. Dira se gonne Modimo Yahweh o tla bo a tsamaile kwa pele ga gago go tlhasela sesole sa Bafilisitia.'' ²⁵ Jalo Tafita a dira jaaka Modimo Yahweh a mo laotse. A bolaya Bafilisitia go tswa kwa Geba go fitlha kwa Gesere.