1
Dafite o ne a opelela Modimo Yahweh mafoko a sefela se mo letsatsing le Modimo Yahweh a mo namotseng mo seatleng sa baba ba gagwe botlhe, le mo seatleng sa ga Saulo.
2
A rapela, ''Modimo Yahweh ke lefika la me, kago ya phemelo ya me, ene yo o nnamolang.
3
Modimo ke lefika la me. Ke tshabela mo go ene. Ke thebe ya me, lenaka la poloko ya me, maitsetsepelo a me, botshabelo jwa me, ene yo o mpolokang mo kiteong.
4
Ke tla bitsa Modimo Yahweh, yo o tshwanelwang ke go galalediwa, mme ke tla bolokwa mo babeng ba me.
5
Gonne makhubu a loso a ntikologile, metsi a a gogolang a tshenyo a nkimetse.
6
Dithapo tsa felo ga baswi di ntikologile; diselaga tsa loso di ntshwere.
7
Mo patikesegong ya me ke biditse Modimo Yahweh; ke biditse Modimo wa me; o utlwile lentswe la me go tswa kwa tempeleng ya gagwe, mme go bitsa ga me mo go batlang thuso ga tsena mo ditsebeng tsa gagwe.
8
Foo lefatshe la tshikhinyega la bo la roroma. Mealo ya magodimo ya roroma ya bo ya tshikhinngwa, gonne Modimo o ne a tenegile.
9
Mosi wa tlhatloga o tswa mo diphatlheng tsa dinko tsa gagwe, mme molelo o o tukang ka bogale wa tswa mo molomong wa gagwe. Magala a ne a tukisiwa ke one.
10
A bula magodimo mme a fologela tlase, mme lefifi le le loileng le ne le le ka fa tlase ga dinao tsa gagwe.
11
A pala cheruba mme a fofa. A bonwa mo diphukeng tsa phefo.
12
A dira lefifi tente e e mo dikologileng, a kgobokanya maru a a bokete a pula mo mafaufaung.
13
Go tswa mo legadimeng le le fa pele ga gagwe ga wa magala a molelo.
14
Modimo Yahweh a duma jaaka maru go tswa magodimong. Mogodimodimo a goa.
15
A hula metswi a phatlalatsa baba ba gagwe - dikgadima mme a ba gasagasa.
16
Foo mesele ya metsi ya bonala; mealo ya lefatshe ya senoga ka go goa ga ntwa ga Modimo Yahweh, ka go foka ga phefo ya diphatlha tsa dinko tsa gagwe.
17
A tlhaeletsa fa fatshe go tswa kwa godimo; a ntshwara! A ntsha mo metsing a a gogomogang.
18
A nnamola mo mmabeng wa me yo o maatla, mo go ba ba ntlhoileng, gonne ba ne ba le maatla thata mo go nna.
19
Ba ne ba tla kgatlhanong le nna mo letsatsing la patikesego ya me, mme Modimo Yahweh o ne a le letshego la me.
20
O ne gape a ntshetsa kwa ntle kwa lefelong le le atlhameng. O ne a mpoloka ka gore o ne a itumela ka nna.
21
Modimo Yahweh o nkatswitse go ya ka selekanyo sa tshiamo ya me; o mpuseleditse go ya ka selekanyo sa bophepa jwa diatla tsa me.
22
Gonne ke tshegeditse ditsela tsa Modimo Yahweh mme ga ke a dira boikepo ka go fapoga mo Modimong wa me.
23
Gonne ditaolo tsa gagwe tse di tshiamo di ntse di le fa pele ga me; fa e le melawana ya gagwe, ga ke a fapoga mo go yone.
24
Gape ke ntse ke sena molato fa pele ga gagwe, ebile ke ithibile mo boleong.
25
Jalo he, Modimo Yahweh o mpuseleditse go ya ka selekanyo sa tshiamo ya me, go ya ka seelo sa bophepa jwa me mo ponong ya gagwe.
26
Mo go yo o boikanyego, o itshupa o le boikanyego; mo monneng yo o senang molato, o itshupa o sena molato.
27
Mo go ba ba phepa o itshupa o le phepa, mme o maswe mo go ba ba sokameng.
28
O boloka batho ba ba tlhokofaditsweng, mme matlho a gago a kgatlhanong le ba ba ikgodisang, mme o ba folosetsa tlase.
29
Gonne o lebone la me, Modimo Yahweh. Modimo Yahweh o bonesa lefifi la me.
30
Gonne ka wena ke ka taboga fa godimo ga sekganedi; ka Modimo wa me ke ka tlola lebota.
31
Fa e le ka ga Modimo, tsela ya gagwe e itekanetse. Lefoko la Modimo Yahweh le phepa. Ke thebe mo mongwe le mongweng yo o tshabelang mo go ene.
32
Gonne Modimo ke mang fa e se Modimo Yahweh? Gape ke mang lefika fa e se Modimo wa rona?
33
Modimo ke botshabelo jwa me, mme o etelela motho yo o senang molato mo tseleng e e leng ya gagwe
34
O dira dinao tsa me bofefo jaaka tsa phala mme o mpaya mo dithabeng tse di kwa godimo.
35
O katisetsa diatla tsa me ntwa, le matsogo a me go oba bora jwa kgotlho.
36
O nneetse thebe ya gago ya poloko, mme botsalano jwa gago bo ntirile mogolo.
37
O diretse dinao tsa me lefelo le le atlhameng, jalo dinao tsa me ga di a relela.
38
Ke alotse baba ba me mme ke ba sentse. Ga ke a ka ka boela morago go fitlhelela ba senngwa.
39
Ke ba komeditse ka bo ka ba thubaganya; ga ba ka ke ba emelela. Ba wetse ka fa tlase ga dinao tsa me.
40
O beile thata mo go nna jaaka lebante la ntwa; o beile ka fa tlase ga me bao ba ba tsogologang kgatlhanong le nna.
41
o nneetse bomorago jwa melala ya baba ba me; ke nyeleditse ba ba ntlhoileng.
42
Ba ne ba lelela go thusiwa, mme ga go a nna ope yo o ba bolokang; ba ne ba lelela kwa go Modimo Yahweh, mme ga a a ka a ba araba.
43
Ke ne ka ba itaya gore ba nne ditoki tse di nnye jaaka lerole le le fa fatshe, ka ba duba jaaka mmopa o o mo mebileng.
44
Gape o nkgolotse mo dikgotlhang tsa batho ba gaetsho. O ntshegeditse jaaka tlhogo ya ditshaba. Batho ba ke sa ba itseng ba a ntirela.
45
Batswakwa ba ne ba patikiwa go inkobela. Ka bonako fela jaaka ba utlwa ka ga me, ba a ntheetsa.
46
Batswakwa ba tsile ba roroma go tswa mo maremelelong a bone.
47
Modimo Yahweh o a tshela! A lefika la me le galalediwe. A Modimo a tsholediwe, lefika la poloko ya me.
48
Yo ke Modimo yo o mpusolossetsang, ene yo o tsisang batho ka fa tlase ga me.
49
O nkgolola mo babeng ba me. Ammaaruri, o ntsholelelditse kwa godimo ga ba ba ntsogologetseng. O nnamola mo banneng ba thubakanyo.
50
Jalo he, ke tla go neela malebogo, Modimo Yahweh, fa gare ga ditshaba; ke tla opelela leina la gago dikgalaletso.
51
Modimo o neela kgosi ya gagwe phenyo e kgolo, mme o supetsa yo a mo tloditseng boikanyego jwa kgolagano, Dafite le dikokomane tsa gagwe ka bosakhutleng.''