¹ Ngwana Samuele a direla Modimo Yahweh ka fa tlase ga ga Eli. Lefoko la Modimo Yahweh le ne le sa tlwaelesega go utlwiwa mo matsatsing ao; go ne go sena ponatshegelo ya seporofito e e neng e bonala gantsi. ² Ka nako eo, fa Eli, yo matlho a gagwe a neng a setse a simolotse go fifala mo a neng a sa bone sentle, o ne a rapame mo bolaong jwa gagwe. ³ Lebone la Modimo le ne le ise le time, mme Samuele o ne a rapametse go robala mo tempeleng ya Modimo Yahweh, fa letlole la Modimo le neng le beilwe teng. ⁴ Modimo Yahweh a bitsa Samuele, yo o neng a re, ''Ke fano.'' ⁵ Samuele a tabogela kwa go Eli mme a re, ''Ke fano, gonne o mpiditse.'' Eli a re, ''Ga ke a go bitsa; rapama fa fatshe gape.'' Jalo Samuele a ya go rapama. ⁶ Modimo Yahweh a bitsa gape, ''Samuele.'' Gape Samuele a ema ka dinao a ya kwa go Eli mme a re, ''Ke fano, gonne o mpiditse.'' Eli a araba, ''Ga ke a go bitsa, morwaaka;rapama gape.'' ⁷ Jaanong Samuele o ne a ise a nne le maitemogelo a go dirisanya le Modimo Yahweh, le fa e le molaetsa ope go tswa kwa go Modimo Yahweh a ise a o senolelwe. ⁸ Gape Modimo Yahweh a bitsa Samuele la boraro. Gape Samuele a ema ka dinao a ya kwa go Eli mme a re, ''Ke fano, gonne o mpiditse.'' Foo Eli a lemoga gore Modimo Yahweh o biditse mosimane. ⁹ Foo Eli a raya Samuele a re, ''Tsamaya o rapame gape; fa a ka go bitsa gape, o re, 'Bua, Modimo Yahweh, gonne motlhanka wa gago o reeditse.''' Jalo Samuele a tsamaya a ya go rapama fa a neng a ntse teng gape. ¹⁰ Modimo Yahweh a tla a ema; a bitsa gape jaaka ka dinako tse dingwe, ''Samuele, Samuele.'' Foo Samuele a re, ''Bua, gonne motlhanka wa gago o reeditse.'' ¹¹ Modimo Yahweh a raya Samuele a re, ''Bona , ke gaufi la go dira sengwe mo Iseraele se se tla dirang gore ditsebe tsa mongwe le mongwe yo o tla utlwang ka sone di lele ditshipi. ¹² Mo letsatsing leo ke tla diragatsa sengwe le sengwe kgatlhanong le Eli se ke se buileng ka ntlo ya ga Eli, go tloga kwa tshimologong go ya kwa bokhutlong. ¹³ Ke mmoleletse gore ke gaufi la go atlhola ntlo ya gagwe go fetsa ka ntata ya boleo jo a neng a itse ka ga jone, gonne barwae ba tsisitse phutso mo go bone mme ga a a ka a ba emisa. ¹⁴ Ka ntata ya se ke ikanetse ntlo ya ga Eli gore maleo a ntlo ya gagwe ga a kitla a tlhapisiwa ka setlhabelo kgotsa moneelo.'' ¹⁵ Samuele a rapama go fithlelela mo mosong; foo a bula mabati a ntlo ya Modimo Yahweh. Mme Samuele o ne a boifa go bolelela Eli ka ponatshegelo. ¹⁶ Foo Eli a bitsa Samuele mme a mo raya a re, ''Samuele, morwaaka.'' Samuele a re, ''Ke fano.'' ¹⁷ A re, ''Lefoko le a le buileng le wena la reng? Tsweetswee o se ka wa le mphitlhela. A Modimo a go dire jalo, a go dire go le gontsi, fa o ka mphitlhela sepe sa mafoko otlhe a a a buileng le wena.'' ¹⁸ Samuele a mmolelela sengwe le sengwe; a se ka a mo fitlhela sepe. Eli a re, ''Ke Modimo Yahweh. A a dire se se lebegang se le molemo mo go ene.'' ¹⁹ Samuele a gola, mme Modimo Yahweh o ne a na le ene, mme a se ka a lesa lefoko lepe la seporofito la gagwe go pala go nna boammaaruri. ²⁰ Iseraele otlhe go tswa kwa Tene go fitlha kwa Beeresheba ba itse gore Samuele o tlhomilwe go nna moporofiti wa Modimo Yahweh. ²¹ Modimo Yahweh a iponatsa gape kwa Shilo, gonne o ne a iponaletsa Samuele ka lefoko la gagwe kwa Shilo.